ەكسپو-2017 حالىقارالىق مامانداندىرىلعان كورمەسىن وتكىزۋگە دايىندىق شەڭبەرىندە استانا قالاسىنىڭ اكىمدىگى گيد-اۋدارماشىلاردى دايىنداۋ بويىنشا جوبانى ىسكە اسىرۋدا, دەپ حابارلادى ەلوردا اكىمدىگىنىڭ ءباسپاسوز قىزمەتى.
1-28 اقپان ارالىعىندا «استانا كونۆەنشن بيۋرو» جشس-ىندە اقىسىز نەگىزدە گيد-اۋدارماشىلار رەتىندە وقۋدان وتۋگە نيەت بىلدىرگەن جانە كاسىبي قىزمەتىن ەكسكۋرسيالىق ىسپەن بايلانىستىرۋدى جوسپارلاعان شەت تىلدەرىن بىلەتىن ادامداردى قابىلداۋ باستالادى.
كۋرستارعا 18 جاسقا تولعان, قازاق, ورىس تىلدەرىن, شەت ءتىلىن (Upper Intermediate تومەن ەمەس), استانا قالاسىنىڭ تاريحىن, كورىكتى جەرلەرىن, كارتاسىن جاقسى بىلەتىن, مادەني جانە ىسكەرلىك قارىم-قاتىناس داعدىلارى, تۋريزمگە قىزىعۋشىلىعى بار ازاماتتار قاتىسا الادى.
وقىتۋ ەكى اي بويى جالعاسادى, وعان اۋديتوريالىق ء(دارىس) جانە تاجىريبەلىك ساباقتار كىرەدى, كۋرس اياقتالعاندا گيد-اۋدارماشى سەرتيفيكاتى تابىس ەتىلەدى.
جوباعا قاتىسۋ ءۇشىن جوعارى, اياقتالماعان جوعارى نەمەسە ارنايى ورتا ءبىلىمى بارىن قۋاتتايتىن قۇجاتتاردىڭ كوشىرمەسىن; شەت ءتىلىن مەڭگەرۋ دەڭگەيىن قۋاتتايتىن قۇجاتتاردىڭ (ديپلوم, سەرتيفيكات) كوشىرمەسىن; قىلمىستىق قۇقىق بۇزۋشىلىقتى جاساعانى تۋرالى مالىمەتتەردىڭ جوقتىعى نەمەسە بار ەكەنى تۋرالى انىقتامانى; پسيحونەۆرولوگيالىق ديسپەنسەردەن انىقتامانى; ناركوديسپانسەردەن انىقتامانى تاپسىرۋ قاجەت.
جوباعا قاتىسۋعا وتىنىشتەر كەلەسى پوشتا مەكەن-جايلارى بويىنشا قابىلدانادى: ainur.welcome@gmail.com, yessilova.a@gmail.com, kadnikovaolga2015@gmail.com, visitastana.kz@gmail.com