ۇلتتىق اكادەميالىق كىتاپحانادا وتكەن «امىرە پاريجدە» اتتى كىتاپتىڭ تۇساۋكەسەرىندە مادەنيەت جانە سپورت ءمينيسترى ارىستانبەك مۇحامەدي ۇلى قازاقتىڭ تانىمال ءداستۇرلى ءانشىسى امىرە قاشاۋباەۆ تۋرالى اعىلشىن تىلىندە كينو ءتۇسىرىلىپ جاتقانىن ايتتى. ونىڭ ايتۋىنشا, كوركەم فيلم الداعى ماۋسىم ايىندا جارىققا شىعادى. ءانشى امىرەنىڭ رولىنە تالانتتى جاس اكتەر سانجار ماديەۆ تاڭداپ الىنعان. «ءبىز كوركەم ءفيلمدى دۇنيەجۇزىلىك پروكاتقا دايىنداپ جاتىرمىز. ءبىز امىرەنى ءار قازاققا دارىپتەۋىمىز كەرەك. سونداي-اق, دۇنيە جۇزىنە دە وسىنداي داڭقتى ادام تۋرالى كورسەتۋىمىز كەرەك. ول ادەمى ادام, سىرت كەلبەتى, ءجۇرىس-تۇرىسى, بولمىسى كوركەم ادام بولعان. فيلم اعىلشىن تىلىندە ءتۇسىرىلدى. قازاقشا دۋبلياجى جاسالۋدا. فيلم امەريكالىق ۇلكەن كومپانيامەن بىرلەسىپ ءتۇسىرىلدى. قازاقستان بيۋدجەتىنەن 400 ميلليون تەڭگە ءبولىندى. ال شەتەلدىك كومپانيا تاراپىنان ودان دا قوماقتى قاراجات جۇمسالدى» - دەدى مادەنيەت جانە اقپارات ءمينيسترى ا.مۇحامەدي ۇلى.
ول وسى شارالاردىڭ ەل تاۋەلسىزدىگىنىڭ 25 جىلدىعىنا, ەكسپو-2017 كورمەسى مەن داڭقتى ءانشىنىڭ 130 جىلدىعىنا ارنالاتىنىن باياندادى. كوركەم فيلم دە, كىتاپ تا ءانشىنى تانىتۋدا, ونىڭ ومىرىندەگى كوپتەگەن دەرەكتەرمەن تانىستىرۋعا قىزمەت ەتەتىنىن جەتكىزدى. كىتاپ تۋرالى مينيستر بۇرىن ەش جەردە جاريالانباعان دەرەكتەر بار ەكەنىن ايتتى. سونداي-اق, امىرە قاشاۋباەۆتىڭ پاريجدە العان كۇمىس مەدالىنىڭ ۇلتتىق مۋزەيگە تابىستالاتىنىن جەتكىزدى.
ايتا كەتەيىك, «امىرە پاريجدە» كىتابىنىڭ اۆتورى قىرىق جىلدان بەرى داڭقتى ءانشىنى زەرتتەپ جۇرگەن قازاقستاننىڭ ەڭبەك سىڭىرگەن قايراتكەرى, مۋزىكا زەرتتەۋشىسى جارقىن شاكارىم.
ايگۇل سەيىلوۆا, «ەگەمەن قازاقستان»
سۋرەتتەردى تۇسىرگەن ورىنباي بالمۇرات