جاپونياعا كەلىپ جەتكەن «تالاس» تايفۋنىنان قۇربان بولعان ادامداردىڭ سانى 42-گە جەتتى.
كيودو اگەنتتىگىنىڭ حابارلاۋىنشا, 55 ادام ءىز-ءتۇزسىز جوعالىپ كەتكەندەر قاتارىندا. ءوز كەزەگىندە پرەمەر-مينيستر ەسيحيكو نودا تابيعات اپاتىنان نەعۇرلىم كوپ زارداپ شەككەن ۆاكاياما پرەفەكتۋراسىندا بولدى. ول جوعالىپ كەتكەندەردى ىزدەۋگە جانە زارداپ شەككەندەردى قۇتقارۋعا بارلىق كۇشتىڭ جۇمىلدىرىلاتىنىنا سەندىردى. قازىرگى ۋاقىتتا ۆاكاياما مەن نارا پرەفەكتۋرالارىنداعى مىڭ جارىمنان استام ءۇي جارىقسىز جانە سۋسىز قالىپ وتىر.
ەلشىلىك اينالاسى قورشالۋدا
ەگيپەت كوسەمى حوسني مۇباراكتىڭ تاعىنان تايدىرىلۋىنان كەيىن ەكى ەل اراسىنداعى قارىم-قاتىناستاردىڭ سالقىنداي تۇسۋىنە بايلانىستى كايردەگى يزرايل ەلشىلىگىنىڭ اينالاسىنا دۋال تۇرعىزىلا باستادى.
ەكى مەترلىك بەتون قورشاۋ قۇرىلىسى وسىدان ەكى اپتا بۇرىن باستالدى, دەپ حابارلاعان ەگيپەتتىك رەسمي ادامدار. رەسمي نۇسقا بويىنشا قۇرىلىس تومەنگى قاباتتاعى تۇرعىنداردى قورعاۋ ءۇشىن قاجەت. ول ەرەۋىلشىلەر مەن جەرگىلىكتى تۇرعىندار اراسىنداعى جانجالدى احۋالداردىڭ الدىن الۋعا قىزمەت ەتەتىن بولادى. ال باقىلاۋشىلار بولسا, ەگيپەت وكىمەتىنىڭ ماقساتى تومەنگى قاباتتاعى ەگيپەتتىكتەردى ەمەس, يزرايلدىك ديپلوماتتاردى قورعاۋ دەگەندى ايتىپ وتىر.
جالپىۇلتتىق ەرەۋىل باستالدى
يتالياداعى ەڭ ءىرى Cgil كاسىپوداقتارى ەلدىڭ مەملەكەتتىك بورىشىن قىسقارتۋ ءۇشىن ۇكىمەتتىڭ قاتاڭ ۇنەمدەۋ شارالارىنا قارسى جالپىۇلتتىق ەرەۋىلدى باستادى.
قارسىلىق اكتسيالارى بۇكىل ەل بويىنشا وتۋدە. يتاليالىق بۇقارالىق اقپارات قۇرالدارى ەرەۋىلدىڭ «جۇرەگى» ريم قالاسىندا دەپ حابارلاۋدا. باسقا قالالارداعى سياقتى ەل استاناسىندا دا قوعامدىق كولىك پەن تاكسي قوزعالىسى شەكتەلدى, حالىقارالىق اۋە رەيستەرى توقتاتىلۋدا نەمەسە كەيىنگە قالدىرىلۋدا, مەملەكەتتىك مەكەمەلەر جابىلۋدا. ەرەۋىل 8 ساعاتقا جالعاساتىن بولادى.
تەحاستاعى الاپات ورمان ءورتى
امەريكانىڭ تەحاس شتاتىندا ورمان ءورتى سالدارىنان 500-گە جۋىق تۇرعىن ءۇي ورتەنىپ كەتتى.
پوليتسيا وكىلدەرىنىڭ حابارلاۋىنشا, 5 مىڭنان استام ادام باسقا جاقتارعا كوشىرىلگەن. مامانداردىڭ ايتۋىنا قاراعاندا, تەحاستىڭ ورتالىق بولىگىندەگى ورتتەن تۋىندايتىن قاتەر وتە ۇلكەن. بۇگىندە شتات اۋماعىندا 63 ءورت وتى ءورشىپ تۇر. تروپيكالىق داۋىل تۋىنداتقان قاتتى جەل ءورتتىڭ كەڭ تاراپ كەتۋىنە اسەر ەتۋدە.
وڭتۇستىك كۋريلگە قاتىستى مالىمدەمە
جاپونيانىڭ جاڭا مينيسترلەر كابينەتى كۋريل ارالدارىنا قاتىستى ءوزىنىڭ الدىنداعىلاردىڭ ۇستانعان باعىتىن جالعاستىرىپ وتىر.
ماسەلەن, جاپونيانىڭ جاڭا سىرتقى ىستەر ءمينيسترى كويتيرو گەمبا رەسەيدىڭ وڭتۇستىك كۋريلگە يەلىك ەتۋىنە ەشقانداي «زاڭدى نەگىز» جوق دەپ مالىمدەگەن. جاپونيادا وڭتۇستىك كۋريلدى وزدەرىنىڭ «سولتۇستىك اۋماعى» دەپ بىلەدى. ايتا كەتۋ كەرەك, 47 جاستاعى گەمبا جاپونياداعى بيلەۋشى دەموكراتيالىق پارتيانىڭ نەعۇرلىم پەرسپەكتيۆالى قايراتكەرلەرىنىڭ ءبىرى بولىپ تابىلادى.
تۇركيا يزرايلمەن جاۋلاسا ما؟
ءيزرايلدىڭ مۇسىلمان الەمىندەگى بۇرىنعى بىردەن-ءبىر سەنىمدى ارىپتەسى تۇركيا يزرايل ەلشىسىن ەلدەن شىعارىپ, اسكەري ىنتىماقتاستىققا تىيىم سالىپ جانە رەۆوليۋتسيالىق ەگيپەتپەن اسكەري كەلىسىمگە باراتىنىن ايتىپ, ەسىكتى تارس جاپتى.
وعان ءيزرايلدىڭ گازاعا بارا جاتقان تۇرىك فلوتيلياسىنا شابۋىل جاساعانى ءۇشىن كەشىرىم جاساۋدان باس تارتۋى سەبەپ بولىپ وتىر. ءىس جۇزىندە انكارا ءوزىنىڭ مۇسىلمان الەمىمەن جاقسى پوزيتسياسىن جوعالتۋدان قورقادى, سوندىقتان يزرايلمەن جانجالدى ساياسي قۇرالعا اينالدىرىپ وتىر, دەپ جازۋدا بىرقاتار بۇقارالىق اقپارات قۇرالدارى.
سوت مەديتسينالىق ساراپتاما ناتيجەلەرىمەن كەلىستى
پاريج سوتى ەلدىڭ ەكس-پرەزيدەنتى جاك شيراكتىڭ ءىشىنارا جۇمىس قابىلەتسىزدىگىن مويىندادى, سوندىقتان ونىڭ ءىسى سىرتتاي قارالادى, دەپ حابارلادى ەۋرونيۋس اگەنتتىگى.
سوت شيراكتىڭ ەستە ساقتاۋ قابىلەتى ناشارلادى دەگەن دياگنوز قويعان مەديتسينالىق ساراپتاما ناتيجەلەرىمەن كەلىسكەن. سونىڭ سالدارىنان بۇرىنعى پرەزيدەنت كەيدە ءتىپتى ءوزىنىڭ سىرقات ەكەنىن دە ۇمىتىپ كەتىپ, وتكەن ءومىرى تۋرالى قويىلعان ساۋالدارعا جاۋاپ بەرە المايتىن كورىنەدى. 78 جاستاعى ساياساتكەرگە پاريج مەرى بولىپ تۇرعاندا ءوز پارتياسىن قارجىلاندىرۋ ءۇشىن زاڭ بۇزۋشىلىقتارعا باردى دەگەن ايىپ تاعىلىپ وتىر.
«كاتيا» داۋىلىنىڭ ەكپىنى كۇشتى
اقش-تىڭ شىعىس جاعالاۋىنا ءتونىپ كەلە جاتقان «كاتيا» داۋىلىنىڭ قۋاتى ءتورتىنشى كاتەگورياعا دەيىن كوتەرىلدى, دەپ حابارلايدى CNN.
«كاتيا» داۋىلى تۋىنداتقان جەلدىڭ شاپشاڭدىعى سەكونتىنە 60 مەتردى قۇرايتىن كورىنەدى. مەتەورولوگتاردىڭ بولجامىنشا, داۋىل اقش-تىڭ شىعىس جاعالاۋىنا جانە اتلانتيكا ارالدارىنا جەتىپ, ينفراقۇرىلىمدارعا ەلەۋلى نۇقسان كەلتىرمەك.
رەسەيمەن رەنجىسۋگە تاعى ءبىر سەبەپ
گرۋزيانىڭ سىرتقى ىستەر مينيسترلىگى رەسەي جاعىنىڭ گرۋزيانىڭ ماسكەۋدەگى بۇرىنعى ەلشىلىگى عيماراتىن اۋكتسيوندا ساتۋ تۋرالى نيەتىن حالىقارالىق نورمالاردى بۇرمالاۋ دەپ باعالاپ وتىر.
ونىڭ ايتۋىنشا, گرۋزيانىڭ مەنشىگىندە تۇرعان ماسكەۋدەگى قوناق ءۇيدى رەسەي جاعى 2006 جىلى زاڭسىز تۇردە مەنشىكتەپ العان. سونداي-اق گرۋزيا سىرتقى ىستەر ءمينيسترىنىڭ ورىنباسارى نينو كالاندادزە وزدەرىنىڭ وسى ماسەلە بويىنشا رەسەي سىرتقى ىستەر مينيسترلىگىنە نوتا جىبەرگەنىن, بىراق ەشقانداي جاۋاپ بولماعانىن مالىمدەگەن.
ينتەرنەت ماتەريالدارى نەگىزىندە ازىرلەندى.