اقپان ايىندا ايتىس ونەرىنىڭ جاناشىرى, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان 75 جاسقا تولدى. ۇلىتاۋ ءوڭىرى ايتىس ونەرىنە ولشەۋسىز ۇلەس قوسقان تارلاننىڭ تۋعان كۇنىن تاعىلىمدى ءىس شارالارمەن اتاپ ءوتتى, دەپ حابارلايدى Egemen.kz.
تۋعان جەرى – قوسكول اۋىلىندا مەرەكەلىك كەش ءوتتى. وسى كەشتە 75 جاسقا تولۋىنا وراي تۇسىرىلگەن « ۇلىتاۋعا باردىڭ با؟» اتتى دەرەكتى ءفيلمنىڭ تۇساۋى كەسىلدى. فيلمدە كورەرمەن ءجۇرسىن ەرماننىڭ ءومىر جانە ونەر جولىنداعى كوپ دەرەككە قانىق بولدى.
فيلمدە «تۋعان جەرىم بۇلانتىنىڭ بويىندا» دەپ اڭگىمەسىن باستاعان ءجۇرسىن اقىن اتا-بابا قورىمىنا بارىپ, دۇعا باعىشتايدى. اتاسى ەرمان, اكە-شەشەسىنىڭ تالايلى تاعدىرى, العاشقى ۇستازى جونىندە سىر شەرتەدى. تۋعان توپىراعىندا وسەتىن جانتاق ءشوبىن يىسكەپ, بالالىق شاعى وتكەن قۇلجانباي اۋىلىنا ارناعان ولەڭىن وقيدى. اپكەسى ساقىپجامال مولداشقىزى ءجۇرسىننىڭ بالا كەزىندەگى قىلىقتارىن ايتىپ, باۋىرىنىڭ شىعارمالار جيناعىنان اناسىنا ارناعان «ەرتەگى» دەگەن ولەڭىن وقيدى. دوسى, عالىم تۇرسىن جۇرتباي اقىننىڭ جاستايىنان كەسەك سويلەيتىن, نامىسشىل بولعانىن, ءجۇرسىننىڭ اناسىنىڭ قولىنان ءدام تاتقانىن جەتكىزەدى. بەلگىلى ايتىسكەر اقىن امانجول ءالتاي وتىز جىل بويى قاسىندا كەلە جاتقان ءىنىسى رەتىندە ءجۇرسىن اعانى جاقسى بىلەتىن ادامنىڭ ءبىرى ەكەنىن جەتكىزەدى.
بەلگىلى كومپوزيتور ا.قورازباەۆ: ء«اسانالى اعانىڭ تاعدىرى جونىندە وسىدان ون جىل بۇرىن جولىعىپ, ءسىز تۋرالى ءان جازسام دەپ رۇقسات سۇرادىم. ول كىسى رۇقساتىن بەردى. انگە ءۇش جىل دايىندالدىم. سودان «اسانالىگە ۋادە بەرىپ ەدىم, سول ءان دايىن بولدى» دەپ جۇرسىنگە تەلەفون سوقتىم. جيىرما مينۋتتا «ولەڭنىڭ ءسوزىن جازدىم, دايىن بولدى» دەپ ءجۇرسىن حابارلاسادى. اننەن ءسوزى ارتىق دەپ ايتار ەدىم», دەپ تولعانادى.
دەرەكتى فيلمدە وسىنداي شىعارماشىلىق جولىندا كەزدەسكەن بەلگىلى تۇلعالار جايىندا تاعىلىمدى دەرەكتەر جەتەرلىك. مۇنى كورگەن مەكتەپ وقۋشىلارى رۋحاني ازىق الىپ قويماي, اقىن اتاسىنىڭ جۇرەك تەبىرەنتەر جىرلارىن جاتقا ايتتى.
اۋىلدان باستاۋ العان مەرەكەلىك كەش ۇلىتاۋ اۋدانىندا «قارا ولەڭنىڭ قازىعى, ۇلىتاۋدىڭ ابىزى» اتتى ايماقتىق ءجۇرسىن ەرمان وقۋلارىنا جالعاستى. سايىستىڭ تالابى بويىنشا اقىننىڭ ەكى ولەڭىن مانەرلەپ وقىپ, كەمىندە جيىرما ولەڭىن جاتقا ايتۋ كەرەك.
سالتاناتتى شارانى ۇلىتاۋ اۋدانىنىڭ اكىمى امانجول باتىربەك ۇلى اشىپ بەرىپ, ۇمىتكەرلەرگە ساتتىلىك تىلەدى.
بارلىعى 19 ۇمىتكەر قاتىسىپ, جيىرماعا جۋىق ولەڭىن جاتقا ايتتى.
باس جۇلدەنى ءجۇرسىن ەرماننىڭ قىرىق ولەڭىن جاتقا ايتقان ۇلىتاۋ اۋدانىنان قاتىسقان ايجان بيماعانبەتوۆا (200 000 تەڭگە) جەڭىپ الدى.
ءى ورىندى قارساقپاي كەنتى دارحان ەسەنباەۆ(180 000 تەڭگە), ءىى ورىندى جەزدى كەنتىنەن سارا ەرلانقىزى (150 000 تەڭگە) يەلەندى. ءىىى ورىندى جەزقازعان قالاسىنان گاۋحار عابدۇمالىكقىزى جانە ءجۇرسىن ەرماننىڭ تۋعان اۋىلىنان كەلگەن ەراسىل قانىش ۇلى قاناعات تۇتتى. ەكەۋىنە 100 000 تەڭگە اقشالاي سىيلىق بۇيىردى.
بارلىق قاتىسۋشىلارعا العىس حات پەن 50 000 تەڭگە كولەمىندە اقشالاي سىيلىق تابىستالدى.