بۇگىنگى قاۋىم وتكەن عاسىر باسىندا كۇللى قازاق بالاسىنا «ويان!» دەپ جار سالعان مىرجاقىپ دۋلات ۇلىن جاقسى بىلسە كەرەك. وسى كىسىنىڭ جازبا جانە قۇجاتتىق مۇرالارىن كوزىنىڭ قاراشىعىنداي ساقتاپ, بۇگىنگە جەتكىزگەن جالعىز تۇياعى – گۇلنار مىرجاقىپقىزى.
وسى ورايدا ايتپاعىمىز, 1999 جىلى اقىن ءشومىشباي ساريەۆ تەكتىنىڭ تۇياعى گۇلنار اپامىزعا جولىعىپ, كولەمدى سۇحبات جۇرگىزگەن ەكەن. بۇل جازبا «اقيقات» جۋرنالىنىڭ وسى جىلعى №9–10 ساندارىندا جارىق كورىپتى.
– گۇلنار اپايدىڭ ءۇيىنىڭ تورگى ۇلكەن بولمەسىنە ءاليحان بوكەيحان, احمەت بايتۇرسىن ۇلى جانە ءوز اكەسى مىرجاقىپ دۋلاتوۆتىڭ سۋرەتتەرىنىڭ قاسىنا جارى ابەن ساتىبالديەۆتىڭ پورترەتىن ارىستارمەن بىردەي دارگەيدە قاتار ءىلىپ قويىپتى, – دەپ جازادى ءشومىشباي ناعاشىباي ۇلى. اقىن بۇل كورىنىسكە تاڭدانا ءھام تاڭىرقاي قاراپ تۇرىپ قالادى. سونى سەزگەن گۇلنار اپاي:
– اينالايىن قاراعىم, سەنىڭ كوكەيىڭدە «مىنا ۇلىلاردىڭ قاتارىندا ابەن ساتىبالديەۆ نەعىپ قاتار تۇر» دەگەن سۇراق كەپتەلىپ تۇرعان شىعار. ايتايىن. مەن ءوز عۇمىرىمدا «گۇلنار دۋلاتوۆا حالىق جاۋىنىڭ قىزى» دەگەن ءسوزدى قاتىگەز زاماننان, قاسىرەتتى قوعامنان قايمىقپاي قالاي الىپ جۇرسەم, ابەن دە مەن سياقتى «الاشورداشىل, حالىق جاۋىنىڭ كۇيەۋ بالاسى» دەگەن اۋىر تاۋقىمەتكە قايمىقپاي, قاسقايىپ قارسى تۇرعان ادام.
بۇل عالامدا مەنىڭ ادام بالاسىنا بەرمەس قايعى-قاسىرەتىمدى تۇسىنگەن ابەن عانا. جارىقتىق تۋمىسىنان اقىنجاندى ەدى. ماعان ارناپ جازعان «گ ۇلىم-اي» ولەڭىندە:
«ز ۇلىمدىقتىڭ كوردىڭ تالاي تەپكىسىن,
ومىرگە سەن تۋعان كۇننەن كەكتىسىڭ,
قانشا ۋلى شەر قاتسا دا ىشىڭدە,
سەزدىرمەۋشى ەڭ وزگەرتپەستەن سىرت ءپىشىن», –
دەپ جازعانى بار. ابەن قازىرگى كەيبىر «ازاماتپىن» دەپ جۇرگەن ادامداردىڭ كوبىنەن تاياق جەدى. ولارمەن شەكىسىپ جاتپايتىن «مەن دۋلاتوۆانىڭ شوفەرىمىن, وسىعان شۇكىر» دەپ كولىگىن قوزعالتىپ جۇرە بەرەتىن. ءوزى «مىرجاقىپتىڭ كۇيەۋ بالاسى» دەگەن ءسوزدى ماقتان تۇتاتىن. ماعان «الاش ازاماتتارى تۇبىندە اقتالادى. سەن وسى باستان بىلگەنىڭدى جازا بەر. بولماسا مەن سياقتى حاتشىڭ بار, ماعان جازدىر» دەيتىن ەدى. بىراق ابەنىم اتاسىنىڭ اقتالعانىن كورە المادى, 1974 جىلى 60 جاسىندا باقيلىق بولدى, – دەيدى.
ابەن اعامىزدىڭ ازاماتتىعى تۋرالى جازۋشى مۇحتار ماعاۋين: «حالىق جاۋىنىڭ» قىزىن جار قىلىپ الۋ ءۇشىن دە جۇرەكتىڭ اجەپتاۋىر تۇگى بولۋ كەرەك. وسى ورايدا, ابەن ساتىبالديەۆ وتباسىنداعى بەرەكە قىزىقپەن قوسا سىرتتان سوعار ىزعاردىڭ لەبىن سەزە وتىرىپ, گۇلنار مىرجاقىپقىزىن جارى رەتىندە قالاعان ەكەن. ەگەر تايعاق ءداۋىردىڭ تارام جولىندا ءدال وسىنداي سۇيەنىش سەرىك كەزدەسپەسە, گۇلنار اپايدىڭ تاعدىر-تالايى باسقاشا سىزىلار ەدى» دەپ جازىپتى (گ.م.دۋلاتوۆا الاشتىڭ سونبەس جۇلدىزدارى: ەستەلىك – ەسسە. – الماتى: مەكتەپ, 2022. 4-ب).