قازاقستاندىق سپورتشىلار 2026 جىلعى قىسقى وليمپيادا ويىندارىندا ەل نامىسىن قورعاپ جاتقان ساتتە, ۇلتتىق بانك «OLYMPIC GAMES 2026. SHORT TRACK» اتاۋىمەن جاڭا كوللەكتسيالىق كۇمىس مونەتانى اينالىمعا شىعارادى. سونىمەن قاتار «بايقوڭىر – 70 جىل» مەرەيتويلىق مونەتاسى دا ساتىلىمعا ۇسىنىلادى, دەپ حابارلايدى Egemen.kz.
«OLYMPIC GAMES 2026. SHORT TRACK» اتاۋىمەن جاڭا كوللەكتسيالىق شورت-ترەكشىلەر قۇرمەتىنە ارنالادى. كوللەكتسيالىق مونەتا 925 سىنامالى كۇمىستەن دايىندالعان. ونىڭ ماسساسى – 20 گرامم, ديامەترى – 37 مم. دايىنداۋ ساپاسى – proof, نومينالى – 1000 تەڭگە, ال تارالىمى نەبارى 2 000 دانا. مونەتالار قازاقستان تەڭگە سارايىندا سوعىلعان.
ساتىلىم 18 اقپان 2026 جىلدان باستاپ ۇلتتىق بانكتىڭ رەسمي ينتەرنەت-دۇكەنى ارقىلى جۇزەگە اسىرىلادى. مونەتانىڭ اۆەرسىندە شورت-ترەكشىلەر بەينەسى بەدەرلەنگەن. شورت-ترەك – كونكيمەن جۇگىرۋ سپورتىنىڭ وليمپيادالىق ءتۇرى, ول 1992 جىلدان بەرى قىسقى وليمپيادا ويىندارىنىڭ باعدارلاماسىنا ەنگىزىلگەن.
عارىش ايلاعىنىڭ مەرەيتويىنا ارنالعان «بايقوڭىر – 70 جىل» مونەتاسى تولىقتاي تانتال مەتالىنان جاسالعان. ونىڭ ماسساسى – 100 گرامم, ديامەترى – 50 مم, دايىنداۋ ساپاسى – proof, نومينالى – 2000 تەڭگە. تارالىمى – 500 دانا.
بۇل مونەتانىڭ اۆەرسىندە ۋلتراكۇلگىن ساۋلەدە كورىنەتىن جاسىرىن بەينەلەردى قولدانۋ تەحنولوگياسى پايدالانىلعان. مۇنداي ءتاسىل كوللەكتسيالىق قۇندىلىقتى ارتتىرىپ, قورعانىش ەلەمەنتتەرىن كۇشەيتەدى.
ۇلتتىق بانك مالىمەتىنشە, اتالعان كوللەكتسيالىق مونەتالار قازاقستان اۋماعىندا ءوزىنىڭ بەلگىلەنگەن قۇنى بويىنشا تولەمدەردىڭ بارلىق تۇرىندە قابىلدانادى. سونداي-اق ەلدىڭ بارلىق بانكتەرىندە بانك شوتتارىنا ەسەپكە الۋعا, اۋدارۋعا, ۇساقتاۋعا جانە ايىرباستاۋعا جارامدى.
وسىلايشا, سپورت پەن عارىش تاريحىنىڭ ماڭىزدى بەلەستەرى ەندى مەتالل بەتىنە قاشالىپ, نۋميزماتتار مەن كوللەكتسيونەرلەرگە ۇسىنىلدى.
وليمپيادا-2026: ۇلتتىق بانك جاڭا كوللەكتسيالىق مونەتالاردى شىعارادى