يسپانيانىڭ پونتەۆەدرا قالاسىندا ارتىستىك جۇزۋدەن الەم كۋبوگىنىڭ فينالدىق سايىسى ءوتتى. العاشقى كۇنى ارالاس جۇپتاردىڭ تەحنيكالىق باعدارلاماسىندا ياسمينا يسلاموۆا مەن الديار رامازانوۆ قولا مەدالعا قول جەتكىزدى. ولار ۇلىبريتانيا مەن يسپانيا سپورتشىلارىنان قالىپ قويدى. جەكەلەگەن سايىستا يتاليالىق فيليپپو پەلاتي مەن يسپانيالىق ەنەكو سانچەس اگيلاردى العا جىبەرگەن الديار رامازانوۆ تا ءدال سول مەجەدەن كورىندى.
ساداق اتۋشى يلفات ابدۋللين سلوۆەنياداعى «Veronica’s Cup» تۋرنيرىندە توپ جاردى. فينالدا ول ۇندىستاندىق ساچين گۋپتىعا سان سوقتىردى. قۇرامىندا ادەل جەكسەنبينوۆا, روكسانا يۋنۋسوۆا, ۆيكتوريا ليان سىندى مەرگەندەرى بار ەلىمىزدىڭ قۇراماسى بلوكتىق ساداق اتۋدىڭ كوماندالىق سايىسىندا قولا مەدال يەلەندى.
بوكستان ەلىمىزدىڭ جاستار قۇراماسى ماجارستاندا وتكەن حالىقارالىق ءتۋرنيردى 15 جۇلدەمەن قورىتىندىلادى. تارقاتىپ ايتساق, التى ورەنىمىز التىن تۇعىرعا كوتەرىلدى. التاۋى فينالدا ۇتىلسا, ۇشەۋى قولا مەدال يەلەندى. جارىستىڭ ەڭ ۇزدىك باپكەرى اتاعى باقىت سارسەكباەۆقا بۇيىردى.
سەربيالىق الەكساندرا كرۋنيچپەن جۇپ قۇرعان اننا دانيلينا «رولان گارروستاعى» تۇساۋكەسەر كەزدەسۋىندە دجەسسيكا مالەچكوۆا/ميريام شكوحقا (چەحيا) شاڭ قاپتىرسا, ەكىنشى اينالىمدا مايا دجوينت (اۋستراليا)/حەننە ۆاندەۆينكەل (بەلگيا) جۇبىن جەڭدى. ودان كەيىن ۋكراينالىق انگەلينا كالينينا/دايانا ياسترەمسكايالاردان باسىم ءتۇستى. سونداي-اق اننا امەريكالىق دجەيمس ترەيسيمەن بىرگە ميكستە دە تابىستى ونەر كورسەتىپ, شيرەك فينالعا شىقتى.
بوكستان الماتىدا كەڭەس وداعىنىڭ باتىرى, حالىق قاھارمانى ساعادات نۇرماعامبەتوۆتى ەسكە تۇسىرۋگە ارنالعان حالىقارالىق تۋرنير اياقتالدى. وعان ەلىمىزدەن بولەك, وزبەكستان, قىتاي, قىرىعزستان, تاجىكستان قۇرامالارى قاتىستى. 55 كگ سالماقتا كوپتەن بەرى كورىنبەي كەتكەن ساكەن بيبوسىنوۆ باس جۇلدەنى ولجالاسا, +90 كەلى سالماق دارەجەسىندە وزبەكستاندا تۋىپ-وسكەن قانداسىمىز ماديار سايدراقىموۆ قارسىلاس شىداتپادى. سونداي-اق مىنا بىلعارى قولعاپ شەبەرلەرى جارىس جەڭىمپازى اتاندى: 50 كگ – ەرنار كاراپ (اباي), 55 كگ 60 كگ – اسىلجان سەرىكباي (شىمكەنت), 65 كگ – ابزال سەرىك (شىمكەنت), 70 كگ – ەلنۇر ءسۇيىنباي (جامبىل), 75 كگ – ەركەبۇلان شايكەنوۆ (جەتىسۋ), 80 كگ – نۇرقانات رايىس (ماڭعىستاۋ), 85 كگ – بەكنۇر باتىربەك (ارميانىڭ ورتالىق سپورت كلۋبى), 90 كگ – نۇرجان دۋمان (كاراعاندى).
ەلىمىزدىڭ سپورتتىق گيمناسشىلارى سلوۆەنيانىڭ كوپەرىندە وتكەن «Challenge Cup» دوداسىندا ولجاعا كەنەلدى. «ات» جاتتىعۋىندا زەينوللا ىدىرىسوۆ كۇمىس مەدال جەڭىپ الدى. ول تەك حورۆاتيالىق ماتەو زۋگەستەن قالىپ قويدى. قولا جۇلدەنى ۇلىبريتانيالىق دجوشۋا ناتان يەلەندى. ەلىمىزدىڭ تاعى ءبىر وكىلى, پاريج وليمپياداسىنىڭ كۇمىس جۇلدەگەرى ناريمان قۇربانوۆ جەتىنشى ورىندى قاناعات تۇتتى.
جەڭىل اتلەتيكادان گونكونگتا ءوتىپ جاتقان جاستاردىڭ ازيا بىرىنشىلىگىندە (U20) ەلىمىزدىڭ قۇراماسى بەس جۇلدەگە قول جەتكىزدى. اسىرەسە ماكسيم ساجنەۆ قۋانتتى. 17 جاستاعى جاس ورەن ديسكىنى 60 مەتر 45 سانتيمەترلىك قاشىقتىققا لاقتىرىپ, باس جۇلدەنى ولجالادى. سونىمەن قاتار ول ەل رەكوردىن جاڭارتتى. سىرىقپەن سەكىرۋشى اننا چەركاشينا كۇمىسپەن كۇپتەلسە, ءۇش قارعىپ سەكىرۋشى ماريا ششيپاچەۆا, يادرو لاقتىرۋشى الينا گولوۆينا, ونسايىسشى اسقار ومىرزاق قولاعا قول سوزدى.
پاريجدە جاستار اراسىنداعى «رولان گارروس» ءتۋرنيرى باستالدى. العاشقى اينالىمدا زاڭعار نۇرلان ۇلى ۇلىبريتانيالىق مارك سەبانعا سان سوقتىردى – 6:3, 6:4. دامير جالعاسباي فرانتسيالىق ياننيك الەكساندرەسكۋدەن ايلاسىن اسىرا المادى – 2:6, 3:6. دايىنداعان –عالىم سۇلەيمەن, «Egemen Qazaqstan»