قازاقستاننىڭ فينلياندياداعى ەلشىلىگىنىڭ جانە «قازاقستاندىق ديپلوماتتاردىڭ بىرلەستىگى» رەسپۋبليكالىق قوعامدىق ۇيىمىنىڭ باستاماسىمەن جاڭا 2017 جىلدىڭ قارساڭىندا وزگەشە جاڭاجىلدىق قايىرىمدىلىق اكتسياسى باستالدى.
بۇل باستامانىڭ باستى ماقساتى – قازاقستانداعى داۋن سيندرومىمەن اۋىراتىن بالالارعا قولداۋ كورسەتۋ, قامقورلىق تانىتۋ. «سانتا كلاۋستان سالەم!» اكتسياسىنىڭ اياسىندا «قازاقستاندىق ديپلوماتتاردىڭ بىرلەستىگى» قوعامدىق قورىنىڭ وكىلدەرى استاناداعى «كۇن الەمى» قوعامدىق قورىنا ءتۋابىتتى دەرتكە شالدىققان بۇلدىرشىندەرگە ارنالعان سان ءتۇرلى قىزىلدى-جاسىلدى ويىنشىقتاردى تابىس ەتتى.
«مۇنداي ءىس-شارالار بالالاردىڭ دەنساۋلىقتارى مەن كوڭىل-كۇيلەرىنە وڭ اسەرىن تيگىزەدى, ولارعا ەرەكشە اسەر سىيلاپ, سىرتقى الەمدى كوبىرەك تانىپ-بىلۋلەرىنە مۇمكىندىك بەرەدى دەپ ويلايمىز. بۇل دۇنيەدە ءسابيدىڭ مىقتى دەنساۋلىعىنان, ونىڭ بال-بۇل جانعان ءجۇزىن كورۋدەن, كۇلكىسىن ەستۋدەن ارتىق قانداي باقىت بار؟! بۇل اكتسيا اتالعان سيندروممەن اۋىراتىن بالالارعا قوعامنىڭ نازارىن اۋدارتۋدى, ولاردىڭ ەلدىڭ ومىرىنە بەلسەندى ارالاسۋى مەن بەيىمدەلۋىنە قولۇشىن سوزۋدى كوزدەيدى. سونىمەن قاتار, ول دامۋىندا وزگەشەلىگى بار بالالاردى قولداۋ مەن قورعاۋعا باعىتتالعان يگى ءداستۇردىڭ بۇدان ءارى دە جالعاسىن تابۋىنا, قازاقستان مەن فينليانديا اراسىنداعى ىنتىماقتاستىقتىڭ مادەني-گۋمانيتارلىق تەتىگىنىڭ بەكۋىنە سەپ بولماق», دەدى «قازاقستاندىق ديپلوماتتار بىرلەستىگى» قوعامدىق قورىنىڭ وكىلى جانات شاكەەۆ.
ال «كۇن الەمى» قوعامدىق قورىنىڭ پرەزيدەنتى ەۆگەنيا چەبوتارەۆسكايا وڭالتۋ ورتالىعىنىڭ ەرەكشەلىگىنە توقتالدى. «كۇن الەمى» وڭالتۋ ورتالىعىنىڭ نەگىزىنىڭ قالانۋىنا داۋن سيندرومىمەن دۇنيەگە كەلگەن بالالاردىڭ اتا-انالارىنىڭ وزدەرى ىقپال ەتتى. العاشىندا ول «كۇن الەمى» قوعامدىق قورى رەتىندە قۇرىلدى. ءبىر جىلدان كەيىن, مىنە, وسىنداي ورتالىق اشىلدى. جالپى, ەلوردادا مۇنداي دەرتكە شالدىققان 300-گە تارتا بالا بار. بۇل جەرگە 3 اي ىشىندە 30-عا تارتا ءسابيدى, ال جىلىنا شامامەن 120-عا جۋىق بالانى قابىلدايتىن مۇمكىندىگىمىز بار. ءبىزدىڭ ورتالىقتى «اسىل بالا» رەسپۋبليكالىق اسسوتسياتسياسى قارجىلاندىرادى. سونداي-اق, قازاقستانداعى بالا قۇقىقتارى جونىندەگى ۋاكىل زاعيپا باليەۆانىڭ ءوزى قولداۋ كورسەتەدى», دەيدى «كۇن الەمى» قوعامدىق قورىنىڭ پرەزيدەنتى.
ءلايلا ەدىلقىزى,
«ەگەمەن قازاقستان»