جاقىندا بەس جۇلدىزدى «الماتى» شيپاجايى قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي جانە «الماتى» شيپاجايىنىڭ قۇرىلعانىنا 50 جىل تولۋ مەرەيتويى قارساڭىندا «ءوز ەلىڭدە دەمال, ءوز جەرىڭدە ەم ال!» اتتى رەسپۋبليكالىق جىر ءمۇشايراسىن جاريالاعان بولاتىن. وتكەندە سايىستىڭ قورىتىندىسى شىعىپ, جۇلدەگەرلەر ماراپاتتالدى.
جۇرسىن ەرمان, نۇرتىلەۋ يمانعالي ۇلى سياقتى جامپوزدارمەن قاتار, بەكجان اشىرباەۆ, سەرىكزات دۇيسەنعازى, ولجاس وتار سەكىلدى ەلىمىزگە بەلگىلى اقىندار تورەلىك جاساعان جىر سايىسىنا قىرىقتان استام اقىننىڭ ولەڭدەرى كەلىپ تۇسكەن. قازىلار القاسىنىڭ ىرىكتەۋىنەن وتكەن ون ەكى اقىن جۇلدەگە لايىق دەپ تانىلىپ, سولاردىڭ اراسىنان ءبىرىنشى ورىندى سەرىك قاليەۆ يەلەنىپ, «الماتى» شيپاجايىنا 10 كۇندىك LUX نومىردە دەمالۋعا جولداما جەڭىپ الدى. ەكىنشى ورىندى قۋانىش قولقاەۆ پەن ولجاس قاسىم ءوزارا ءبولىسىپ, شيپاجايدا 10 كۇن بويى STD نومىردە دەمالاتىن بولادى. ءۇشىنشى ورىندى ايدانا سەگىزباەۆا, باۋىرجان القوجا جانە ناۋرىزبەك سارشاەۆ قانجىعالاپ, شيپاجايدىڭ 7 كۇندىك STD نومىردە دەمالاتىن جولداماسىن ۇتىپ الدى. استانالىق راۋان قايدار مەن سەمەيلىك قازبەك بايجۇمانعا شيپاجاي پرەزيدەنتى تالعات تۇڭعىشباەۆتىڭ ارنايى جۇلدەسى بەرىلىپ, ولار 7 كۇنگە ستاندارت نومىردە دەمالۋعا جولداما الدى. ماناس قايىرتاي, اسلان تىلەگەنوۆ, سايلاۋباي تويلىباەۆ, ۇلمەكەن لەسبەكوۆا ىنتالاندىرۋ سىيلىعى بۇيىرىپ, ولار ءبىر جىل بويى شيپاجاي باسسەينىندە تەگىن جۇزەتىن بولدى.
«ءمۇشايرانىڭ ماقساتى — قازاقستان رەسپۋبليكاسىنىڭ تاۋەلسىزدىك جىلدارىنداعى جەتىستىكتەرىن ناسيحاتتاۋ, وتاندىق ءتۋريزمنىڭ دامۋىنا ىقپال ەتۋ, «الماتى» شيپاجايىنىڭ قول جەتكىزگەن تابىستارىن حالىققا پاش ەتۋ, دارىندى اقىنداردىڭ شىعارماشىلىق قابىلەتىن ۇشتاۋ بولىپ تابىلادى», دەيدى شارانى ۇيىمداستىرۋشىلار.
بەرىك سادىر,
«ەگەمەن قازاقستان»
الماتى