الاتاۋدىڭ باۋرايىنداعى ۇشقوڭىر اۋىلىندا ورنالاسقان «شاپاعات» ولكەتانۋ مۇراجايى ءوڭىر مادەنيەتىنىڭ ءبىر وشاعى بولىپ سانالادى. مۇراجايدا قاراساي باتىر اتىنداعى ورتا مەكتەپ باسشىلىعىنىڭ ۇيىتقى بولۋىمەن تانىمال تۇلعالارمەن, اقىن-جازۋشىلارمەن كەلەلى كەزدەسۋلەر وتكىزۋ داستۇرگە اينالعان. ناقتىلاي تۇسسەك, جاس ۇرپاقتىڭ ۇلى دالاعا دەگەن پەرزەنتتىك سۇيىسپەنشىلىگىن ارتتىرىپ, ءوز ەلىن ماقتان تۇتۋ ماقساتىندا بەلگىلى اقىن, حالىقارالىق «الاش» جانە مۇقاعالي اتىنداعى ادەبي سىيلىقتارىنىڭ لاۋرەاتى ورازاقىن اسقار باستاعان ۇلتتىق كىتاپحانا قىزمەتكەرلەرىمەن كەزەكتى كەزدەسۋ وتكەن ەدى. وعان ءۇشقوڭىر اۋىلى ورتالىق كىتاپحاناسىنىڭ قىزمەتكەرلەرى ءجانە ءۇشقوڭىر اۋىلىنداعى ورتا مەكتەپتەردىڭ ۇستازدارى قاتىستى. قازاقستان رەسپۋبليكاسىنىڭ ۇلتتىق كىتاپحاناسى تاراپىنان مەكتەپ وقۋشىلارىنا كورمە ۇيىمداستىرىلىپ, مەكتەپ مۇراجايى مەن كىتاپحاناسىنا 120 كىتاپ سىيعا تارتىلدى.
«شاپاعات» تاريحي-ولكەتانۋ مۇراجايىندا 2 500-دەن اسا قۇندىلىق بار. قوسىمشا قورعا جاتاتىن فوتوسۋرەتتەر, سىزبالار, ءىس-تاجىريبەلەردى باياندايتىن حاتتامالار رەتىمەن ورنالاستىرىلعان. مۇراجاي قورلارى كىتاپشاعا ءتىزىمدەلگەن. مۇراجاي ءوز قىزمەتىن ەلباسىتانۋ قىزمەتىمەن, ولكەتانۋ جۇمىستارىمەن جانە ەلباسىنىڭ بالالىق شاعى جانە قىزمەتىمەن ۇشتاستىرىپ ءجۇرگىزەدى. مۇراجاي زاتتارى ءار ءبولىمنىڭ تاقىرىبىنا ساي ەستەتيكالىق تالعاممەن بەزەندىرىل-
گەن, – دەيدى وسى مۇراجايدا ەكسكۋرسيا جۇرگىزۋشى رىمكەش بايقونىسوۆا.
نۇربول الدىباەۆ,
«ەگەمەن قازاقستان»
الماتى وبلىسى,
قاراساي اۋدانى