تارتىپتىك كەڭەستىڭ تالقىسىنا تۇسكەن كەز كەلگەن مەملەكەتتىك قىزمەتكەردەن مازا قاشادى. ويتكەنى, ءتارتىپسىز كەتكەن قىزمەتكەرلەردى «تاك-تاك» دەپ جونگە سالىپ وتىراتىن بۇل كەڭەستەن جازا ارقالاماي شىققاندارى نەكەن-ساياق. بيىلعى جىلى ادەپ جونىندەگى كەڭەس 9 رەت ءماجىلىس وتكىزىپ, 64 ماسەلە تالقىلاپ, ولاردىڭ اراسىندا 44 تارتىپتىك ءىس قارالىپتى.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنت باسشىسىنىڭ ورىنباسارى – ادەپ جونىندەگى كەڭەس حاتشىلىعىنىڭ مەڭگەرۋشىسى داۋرەن قايپوۆتىڭ ايتۋىنا قاراعاندا, بيىل تارتىپتىك ىستەردى قاراۋ ناتيجەسى بويىنشا 34 لاۋازىمدى تۇلعاعا تارتىپتىك جازا قولدانۋ ۇسىنىلىپتى. ونىڭ ىشىندە 24-ءى مەملەكەتتىك قىزمەتكە كىر كەلتىرەتىن تەرىس قىلىق جاساعانى ءۇشىن, 10-ى ادەپ نورمالارىن بۇزعانى ءۇشىن جانە 10 ءىس قىسقارتىلدى.
ادەپ نورمالارىن بۇزعانى ءۇشىن مەملەكەتتىك قىزمەتشىلەردىڭ 7-ەۋىنە سوگىس, 1-ەۋىنە قاتاڭ سوگىس, 2-ەۋىنە قىزمەتىنە تولىق سايكەس ەمەستىگى جونىندەگى ەسكەرتۋ تۇرىندەگى تارتىپتىك جازا قولدانىلدى. ياعني, بۇل قىزمەتكەرلەر – باسقالارعا ۇلگى بولۋدىڭ ورنىنا وزدەرى زاڭ بۇزۋشىلىققا جول بەرىپ وتىر دەگەن ءسوز. ءتىپتى جۇمىستان تىس ۋاقىتتا قوعامدىق ورىنداردا ماس كۇيىندە ەرسى قىلىققا بارعان مەملەكەتتىك قىزمەتشىلەر دە بار ەكەن. مىسالى, جامبىل وبلىسى اكىمدىگىنىڭ دەنساۋلىق ساقتاۋ باسقارماسىنىڭ ءبولىم باسشىسى مەن بايزاق اۋدانى اكىمدىگىنىڭ جەتەكشى مامانى قوعامدىق ورىندا الكوگولدىك ىشىمدىك ىشكەنى ءۇشىن اكىمشىلىك جاۋاپتىلىققا تارتىلعان.
سونداي-اق, جەرگىلىكتى پوليتسيا جانە بۇقارالىق اقپارات قۇرالدارى وكىلدەرىمەن بىرگە رەيدتەر جۇرگىزگەندە قىزمەتتىك اۆتوكولىكتەردى جۇمىس ۋاقىتىنان تىس كەزدە ءتيىستى قۇجاتتارسىز پايدالانعان فاكتىلەر دە ءجيى كەزدەسىپتى. ادەپ نورمالارىن بۇزۋعا جول بەرگەنى ءۇشىن بۇل مەملەكەتتىك قىزمەتشىلەرگە ءسوگىس ءتۇرىندەگى تارتىپتىك جازالار قولدانىلعان.
ورالحان ءداۋىت,
«ەگەمەن قازاقستان»
جامبىل وبلىسى