فريستايل شەبەرى يۋليا گالىشەۆانى بىلمەيتىندەر بۇگىندە كەمدە-كەم. 1992 جىلى تۋعان وسكەمەندىك قارشاداي قىز شاڭعىنى شىرق ءۇيىرىپ قانا قويماي, ونىمەن اۋەدە اينالاتىن كۇردەلى سپورت ءتۇرى بويىنشا ەلىمىزدىڭ ۇلتتىق قۇراماسىنىڭ بەلدى مۇشەسى, حالىقارالىق دارەجەدەگى سپورت شەبەرى. الماتىدا وتەتىن قىسقى ۋنيۆەرسيادامىزداعى نەگىزگى ءۇمىتكەرلەرىمىزدىڭ ءبىرى دە – يۋليا گالىشەۆا. ەسىمى ەلگە ەلەۋلى سپورتشى بۇگىندە ۇلتتىق قۇراما جاتتىقتىرۋشىسى ەلەنا كرۋگلىحيندا جاتتىعىپ ءجۇر.
تۋعان ەلىنىڭ تۋىن كوتەرۋدى ماقسات ەتكەن ول وسى كۇندەرى الماتى ۋنيۆەرسياداسىنا جان-جاقتى دايارلىق جۇرگىزۋدە. بۇدان كەيىن 19-26 اقپاندا جاپونيانىڭ ساپپورو قالاسىندا VIII قىسقى ازيا ويىندارىنا قاتىسپاق. ال 6-19 ناۋرىزدا يسپانيانىڭ سيەرا-نەۆادا قالاسىندا جالاۋىن كوتەرەتىن الەم بىرىنشىلىگىندە باعىن سىنايدى. بۇدان باسقا بۇل ماۋسىمدا حالىقارالىق فەدەراتسيانىڭ (FIS) كۇنتىزبەلىك جوسپارىنا ساي الەم كۋبوگىنىڭ كەزەڭدەرى مەن ەل چەمپيوناتى بار. ارينە, مۇنىڭ بارلىعى سپورتشى ءۇشىن از جاۋاپكەرشىلىك ەمەس.
ەۋروپانىڭ ەكى دۇركىن چەمپيونى, ۆانكۋۆەردەگى وليمپيا ويىندارىندا موگۋلدەن 11-ورىنعا تابان تىرەگەن, سوچيدەگى وليمپيادادا ۇزدىك جەتىلىككە ەنگەن, الەم جانە ەۋروپا كۋبوكتارىنىڭ يەگەرى, قىسقى ازيا ويىندارىنىڭ ءابسوليۋتتى چەمپيونى سياقتى اتان تۇيەگە جۇك بولارلىق اتاق-ابىرويى بار سپورتشىعا ارتىلار سەنىم جوعارى ەكەنى داۋسىز. الەمدەگى ۇزدىك فريستايلشىلار ساپىنا ەنگەن ونىڭ قازىر ناعىز كەمەلىنە كەلگەن شاعى. ال سپورتتاعى جەتىستىكتەرىنىڭ تاعى ءبىر پاراسىنا كوز جۇگىرتەر بولساق, 2011 جىلى فينليانديادا 18-20 جاس اراسىنداعى سپورتشىلار اراسىندا الەم چەمپيونى اتانعان. ءدال وسى جاستاعىلار اراسىندا 2012 جىلى يتاليانىڭ ۆالمالەنكو قالاسىندا وتكەن الەم بىرىنشىلىگىندە موگۋلدەن التىن مەدال السا, پاراللەلدى موگۋل بويىنشا قولا مەدالعا قول جەتكىزدى. 2015 جىلى يسپانيادا وتكەن بۇكىلالەمدىك ۋنيۆەرسيادانىڭ جەڭىمپازى اتاندى. سوندىقتان, يۋليا گالىشەۆانىڭ مارتەبەلى جارىستار مەن ءوز قاتارلاستارىمەن باسەكەلەردە جيناعان تاجىريبەسى جەتكىلىكتى. بيىلعى ماۋسىمدا الەم كۋبوگىنىڭ تۇعىرىنا ەكى ءمارتە كوتەرىلىپ, كۇمىس پەن قولانى ەنشىلەگەنى ءمالىم. «بۇعىلار جازىعى» اتانعان امەريكالىق دير-ۆەلليدە وتكەن جارىستا كانادالىق جيۋستين ديۋفۋر-لاپۋانتقا ەكى رەت ەسە جىبەرىپ, كۇمىستەن ەكى مارتە القا تاقتى.
يۋليا بۇعان دەيىن فريستايل تاريحىندا ەش سپورتشى جاساي الماعان جاڭا سالتو ادىسىمەن ءارىپتەستەرىن دە, جانكۇيەرلەرىن دە تاڭعالدىرىپ ءجۇر.
دۋمان اناش,
«ەگەمەن قازاقستان»
شىعىس قازاقستان وبلىسى