كەشە ۇكىمەت ۇيىندە پرەمەر-مينيستر باقىتجان ساعىنتاەۆ مەملەكەتتىك ءتىل ساياساتىن ودان ءارى جەتىلدىرۋ جونىندەگى كوميسسيانىڭ كەزەكتى وتىرىسىن وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
وندا «قازاقستان رەسپۋبليكاسىنداعى تىلدەر تۋرالى» زاڭدى جانە 2011-2020 جىلدارعا ارنالعان قازاقستان رەسپۋبليكاسىنداعى تىلدەردى دامىتۋ مەن قولدانۋدىڭ مەملەكەتتىك باعدارلاماسىن ىسكە اسىرۋ ماسەلەلەرى تالقىلاندى.
پرەمەر-مينيستر 25 جىل ءىشىندە مەملەكەتتىك ءتىل ساياساتىن دامىتۋ سالاسىندا اۋقىمدى جۇمىس اتقارىلعانىن ايتتى.
«بۇل – ءسوز جوق, تاۋەلسىزدىكتىڭ جەمىسى, ءتىل ماسەلەسىندەگى ەلباسىنىڭ ساليقالى ساياساتىنىڭ ناتيجەسى», دەدى ب.ساعىنتاەۆ.
وتىرىستا مەملەكەتتىك ءتىلدى وقىتۋ ادىستەمەسىن جەتىلدىرۋ جانە باعالاۋ جۇيەسى بويىنشا بايانداما جاساعان ءبىلىم جانە عىلىم ءمينيسترى ە.ساعاديەۆ عىلىمي نەگىزدە جانە ۇزدىك حالىقارالىق تاجىريبە بويىنشا جاسالعان مەملەكەتتىك ءتىلدى جەدەل ءارى ءتيىمدى ۇيرەتۋدىڭ جاڭا ادىستەمەسىن تانىستىردى. جاڭا ادىستەمەنىڭ بازاسىندا «قازاق ءتىلىنىڭ جالپى ءبىلىم بەرۋگە ارنالعان جيىلىك سوزدىگى» ازىرلەندى. ول 2017 جىلدان باستاپ ورىس ءتىلدى مەكتەپتەردە قاناتقاقتى ۇلگىدە ەنگىزىلەتىن بولادى.
سونداي-اق, اتالعان ماسەلە بويىنشا «نازارباەۆ زياتكەرلىك مەكتەپتەرى» ۇيىمى فيليالىنىڭ ءبولىم باسشىسى ج.ابۋوۆ, ۇلتتىق تەستىلەۋ ورتالىعى مەملەكەتتىك ءتىل باسقارماسىنىڭ جەتەكشىسى ا.ءابدىحالىقوۆ بايانداما جاسادى.
كوميسسيا مۇشەلەرى «قازاقستان رەسپۋبليكاسىنداعى ءتىل تۋرالى» زاڭنىڭ ورىندالۋ بارىسى تۋرالى مادەنيەت جانە سپورت مينيسترى ا.مۇحامەدي ۇلىنىڭ, قارجى ءمينيسترى ب.سۇلتانوۆتىڭ جانە پاۆلودار وبلىسىنىڭ اكىمى ب.باقاۋوۆتىڭ ەسەپتەرىن تىڭدادى.
وتىرىستى قورىتىندىلاي كەلە, ب.ساعىنتاەۆ وكىلەتتى ورگاندارعا بىرقاتار تاپسىرمالار بەردى.