قازىرگى تاڭدا جاقسى وقۋلىقتار تاپشى. وسىنىڭ ورنىن تولتىرۋ ءۇشىن ارنايى بايقاۋ دا ۇيىمداستىرىلدى. باس پروكۋراتۋرا جانىنداعى قۇقىق قورعاۋ ورگاندارىنىڭ اكادەمياسى مەن تۇڭعىش پرەزيدەنت – ەلباسى كىتاپحاناسى بىرلەسىپ, كەشە «جوعارى وقۋ ورىندارىنا ارنالعان قۇقىق قورعاۋ سالاسىنداعى ۇزدىك باسىلىم» اتتى ءى حالىقارالىق بايقاۋدىڭ جەڭىمپازدارىن سالتاناتتى تۇردە ماراپاتتادى.
شارانىڭ باستى ماقساتى – قۇقىق قورعاۋ سالاسىنداعى وتاندىق جانە شەتەلدىك اۆتورلاردىڭ باسىلىمدارىنا قىزىعۋشىلىقتى وياتۋ. سونداي-اق, بايقاۋدى ۇيىمداستىرۋشىلار مادەني ىنتىماقتاستىق پەن عىلىمي بايلانىستاردى نىعايتۋدى كوزدەپتى.
جيىندا ءسوز العان قۇقىق قورعاۋ ورگاندارى اكادەمياسىنىڭ رەكتورى ۇلان بايجانوۆ حالىقارالىق بايقاۋ ەلىمىز تاۋەلسىزدىگى مەن پروكۋراتۋرا ورگاندارىنىڭ قۇرىلعانىنا 25 جىل تولۋىنا ورايلاستىرىلىپ جۇزەگە اسىرىلعانىن اتادى. ال كىتاپحانا ديرەكتورىنىڭ ورىنباسارى تيمۋر شايمەرگەنوۆ, قۇقىق قورعاۋ جۇيەسى قىزمەتكەرلەرىنىڭ بىلىكتىلىگىن ارتتىرۋدا كىتاپتىڭ ماڭىزى زور ەكەنىن ايتتى.
بايقاۋدى ۇيىمداستىرۋشى كوميتەت ارمەنيا, بەلارۋس, قازاقستان, قىرعىزستان, تاجىكستان جانە رەسەي ەلدەرىنىڭ عالىمدارىنان كەلىپ تۇسكەن 300-گە جۋىق وقۋلىق پەن عىلىمي باسىلىمداردى جان-جاقتى تالقىعا سالىپ, ىشىنەن 11 اتالىم بويىنشا جەڭىمپازداردى انىقتاعانى بەلگىلى بولدى.
سونداي-اق, شارا اياسىندا رەسپۋبليكالىق عىلىمي-ادىستەمەلىك كەڭەسكە مۇشە جوعارى وقۋ ورىندارى اراسىنداعى «قۇقىق قورعاۋ قىزمەتى» ماماندىعى بويىنشا جىل سايىنعى بايقاۋ قورىتىندىسى جاريا ەتىلدى. بايقاۋ ىنتالاندىرۋ ماقساتىندا ۇيىمداستىرىلىپتى. جانە دە «ۇزدىك وقۋلىق», «ۇزدىك مونوگرافيا», «ۇزدىك دوتسەنت», «ءۇزدىك وقىتۋشى» جانە «ۇزدىك جاس عالىم» اتالىمدارىندا جەڭىمپازدار ماراپاتتالىپ, ديپلومدار مەن سىيلىقتار تابىس ەتىلدى.
اسقار تۇراپباي ۇلى,
«ەگەمەن قازاقستان»