قازاقفيلم» اۋماعىندا ارنايى ەكونوميكالىق ايماقتى قۇرۋدى جوسپارلانىپ وتىر, دەپ حابارلايدى قازاقپارات.
قازاق عىلىمي-زەرتتەۋ مادەنيەت ينستيتۋتىنىڭ باس ديرەكتورى اندرەي حازبۋلاتوۆ استانادا وتكەن «دوڭگەلەك ۇستەلدە» قر «كينەماتوگرافيا تۋرالى» زاڭ جوباسىن تانىستىردى.
وسى ورايدا شاراعا قاتىسۋشىلار ءۇشىن سالانى دامىتۋ بويىنشا ارنايى فيلم كورسەتىلدى.
«كينەماتوگرافيانى دامىتۋدىڭ باسىم باعىتتارى اياسىندا «قازاقفيلم» كينوستۋدياسى اۋماعىندا كينەماتوگرافيانى ۇيىمداستىرۋ ءۇشىن ارنايى ەكونوميكالىق ايماقتى قۇرۋ ەسكەرىلگەن. سالىقتىق جەڭىلدىكتەردى ەنگىزۋ مەن پروكاتتى, فيلمدەر كورسەتىلىمىنە بايلانىستى قىزمەتتەردى جانە جۇمىستاردى قوسىلعان قۇن سالىعىنان بوساتۋ ماسەلەسى قامتىلىپ وتىر», – دەپ اتاپ وتىلگەن تانىستىرىلىمدا.
سونىمەن قاتار زاڭ جوباسىندا ءفيلمدى دۋبلياجداۋ نەمەسە سۋبتيترلەۋ, كادر سىرتىندا اۋدارۋ كەزىندە مەملەكەتتىك ءتىلدى پايدالانۋدىڭ مىندەتتەمەسىن بەكىتەتىن نورمالاردى قابىلداۋ قاراستىرىلعان.
بۇل قۇجاتتا تەلەارنالاردا قازاقستاندىق كينونى جارنامالاۋ ءۇشىن ەفير ۋاقىتىن مىندەتتى تۇردە ءبولۋ نورماسى دا ەسكەرىلگەن. جالپى, سالانى دامىتۋ جولىندا ۇلتتىق كينونى قولداۋدىڭ مەملەكەتتىك قورىن قۇرۋ مەن ونىڭ جانىندا ساراپشىلىق كەڭەستى جاساقتاۋ كوزدەلىپ وتىر.
ايتا كەتەيىك, زاڭ جوباسىن ازىرلەۋ باستاماسى كينەماتوگرافيا سالاسىنداعى قۇقىقتىق رەتتەۋ تيىمدىلىگىن ارتتىرۋ, قولدانىستاعى زاڭناماداعى جانە ساباقتاس سالالارداعى كەمشىلىكتەردى جويۋ قاجەتتىگىمەن بەكىتىلدى. بۇل قۇجاتتى قابىلداۋ ۇلتتىق كينووندىرىستى قولداۋعا, ۇلتتىق فيلمدەردىڭ پروكاتى جانە ديستريبۋتسياسى سالاسىندا قولايلى جاعداي جاساۋعا, سونداي-اق ەل اۋماعىندا, الەمدە قازاقستاندىق كينونىڭ ساپاسى مەن باسەكەگە قابىلەتتىلىگىن ارتتىرۋعا نەگىزدەلگەن بىرقاتار شارالاردى قامتيدى.