تاۋەلسىزدىك ءتاۋ ەتەر تۇعىرىمىز ەكەنى ايداي شىندىق. سوندىقتان بۇل كۇنگە اركىمنىڭ تارالعىلى تارتۋمەن كەلۋگە ىقىلاستى ەكەنى ءسوزسىز. وڭىردە وسى ءبىر قاستەرلى دە قاسيەتتى كۇنى كوپتەگەن يگى شارالار جۇزەگە استى. سونىڭ ءبىرى دە بىرەگەيى «مەيىرىم» جاستاردى الەۋمەتتىك بەيىمدەۋ ورتالىعىنىڭ اشىلۋى دەر ەدىك.
– مەملەكەت باسشىسى نۇرسۇلتان نازارباەۆ بىزگە ءار بالانىڭ قۇقىقتارىن قورعاۋدى قامتاماسىز ەتۋ مىندەتىن قويدى. بۇگىندە ەلىمىزدە اتا-اناسىنىڭ قامقورلىعىنسىز قالعان 3 مىڭنان استام جاس تۇرادى. جىل سايىن ولارعا مەملەكەتتىك تۇرعىن ءۇي قورىنان 50-60 پاتەر بولىنەدى. تۇرعىن ۇيمەن قامتاماسىز ەتۋدى ارتتىرۋ ءۇشىن وڭىردە جەتىم بالالاردى مەملەكەت تاراپىنان الەۋمەتتىك قولدايتىن كەشەندى باعدارلاما قابىلداندى, – دەدى وبلىس اكىمى بەردىبەك ساپارباەۆ.
ءوڭىر باسشىسىنىڭ باستاماسىمەن جۇزەگە اسىرىلعان الەۋمەتتىك جوباعا «ءسابي» قايىرىمدىلىق قورى 4 ميلليارد تەڭگە قارجى ءبولدى. ماڭىزدى نىساننىڭ اشىلۋىنا قوردىڭ قۇرىلتايشىسى, قازاقستانعا بەلگىلى مەتسەنات كەڭەس راقىشەۆ ارنايى كەلدى. ءوڭىر باسشىسى «ءسابي» قايىرىمدىلىق قورى مەن كەڭەس راقىشەۆقا وسىنداي اۋقىمدى جانە ماڭىزدى جوبانى جۇزەگە اسىرعاندارى ءۇشىن العىسىن ءبىلدىردى.
ءوز كەزەگىندە كەڭەس راقىشەۆ الداعى كوكتەم ايىندا ورتالىقتىڭ اۋماعى تولىقتاي اباتتاندىرىلىپ, سپورت الاڭدارىمەن جابدىقتالاتىنىن جەتكىزدى. «مەيىرىم» جاستاردى الەۋمەتتىك بەيىمدەۋ ورتالىعىندا اتا-اناسىنىڭ قامقورلىعىنسىز قالعان 80 جاستىڭ ارقايسىسى جەكە پاتەرگە يە بولادى. مۇنداي جاعداي اقتوبە قالاسىندا جۇمىس جاساپ تۇرعان جاسوسپىرىمدەر ۇيىندە دە مۇمكىن بولماعان ەدى. ءبىر پاتەردىڭ جالپى اۋماعى 40 شارشى مەتردى قۇرايدى. جايلى باسپانا قاجەتتى كوممۋنيكاتسيامەن جانە جيھازدارمەن جابدىقتالعان. جاسوسپىرىمدەر ۇيىمەن سالىستىرعاندا جاستار مۇندا 23 جاسقا دەيىن ەمەس, 29 جاسقا دەيىن تۇرا الادى. وسى ۋاقىت ارالىعىندا تۇرعىن ءۇي قۇرىلىس جيناق بانكى ارقىلى ءوز باسپانالارىن ساتىپ الۋ ءۇشىن جەتكىلىكتى قاراجات جيناۋلارىنا مول مۇمكىندىك بار.
الەۋمەتتىك ۇيدە دامۋ مۇمكىندىگى شەكتەۋلى بالالارعا ارنالعان ارنايى مەكتەپ-ينتەرناتتاردىڭ تۇلەكتەرى دە تۇراتىندىقتان, تۇرعىن ءۇي عيماراتىنىڭ جانىنان ولارعا ەڭبەك ەتىپ, جالاقى الۋعا مۇمكىندىك بەرەتىن شاعىن تسەحتار سالىنعان. قازىرگى تاڭدا شاشتاراز, اياق كيىم جوندەۋ جانە كيىم تىگۋ تسەحتارى جاڭا جۇمىسشىلاردى قابىلداۋعا دايىن. الەۋمەتتىك ءۇي تىرەك-قيمىل اپپاراتىنىڭ بۇزىلۋىن رەتتەيتىن جاتتىعۋ قۇرىلعىلارى بار ەمدىك دەنەشىنىقتىرۋ زالىمەن قامتىلعان.
تاۋەلسىزدىك كۇنى شاھاردىڭ «باتىس» شاعىن اۋدانىندا «قۇلاگەر» مەملەكەتتىك بالاباقشاسى دا ءوز ەسىگىن ايقارا اشتى. اۋماعى 5,2 مىڭنان استام شارشى مەتر بولاتىن ەكى قاباتتى عيماراتقا 320 ءبۇلدىرشىن باراتىن بولادى.
ايتا كەتۋ كەرەك, 320 ورىندىق مەكتەپكە دەيىنگى مەكەمە «نۇرلى جول» باعدارلاماسى بويىنشا اشىلعان 33-ءشى بالاباقشا. ونى سالۋعا 433 ميلليون تەڭگە بولىنگەن.
ءوڭىر باسشىسى كولىكتىك-لوگيستيكالىق ورتالىقتىڭ اشىلۋىنا دا قاتىستى. كولىكتىك-لوگيستيكالىق ورتالىقتىڭ باستى ارتىقشىلىعى ونىڭ, اسىرەسە, جاھاندانۋ جاعدايىندا ماڭىزى ارتقان قولايلى ەكونوميكالىق-گەوگرافيالىق جاعدايىمەن بايلانىستىرىلادى. نىساندا تاۋاردى تيەپ, تۇسىرەتىن تەمىر جول تورابى بار. ورتالىق جىلىنا 70 583 تونناعا دەيىن جۇك قابىلداپ, وڭدەمەك.
«بيزنەستىڭ جول كارتاسى-2020» بىرىڭعاي باعدارلاماسى اياسىندا «بەكتۇروۆا ج.ا» جەكە كاسىپكەرلىگىنە ورتالىق قۇرىلىسى ءۇشىن پايىزدىق مولشەرلەمە مەن سۋبسيديالاۋ تۇرىندە 550 ميلليون تەڭگە جانە قۇرال-جابدىقتار ساتىپ الۋعا 2070 ميلليون تەڭگە كولەمىندە كومەك كورسەتىلدى.
تاۋەلسىزدىك كۇنى اۋماعى 16 000 شارشى مەتردى قۇرايتىن «شەبەر» گيپەرماركەتى دە اشىلدى. اتالعان جوبانى قارجىلاندىرۋعا 2,5 ميلليارد تەڭگە ءبولىنىپ, 260 جۇمىس ورنى اشىلعان. جوبانى جۇزەگە اسىرۋ بارىسىندا مەملەكەتتىك قولداۋ اياسىندا قۇنى 630 ميلليون تەڭگە بولاتىن قۇرال-جابدىقتاردى ساتىپ الىپ, اينالىمداعى قارجىنى تولتىرۋ ءۇشىن نەسيەنىڭ پايىزدىق مولشەرلەمەسىن سۋبسيديالاۋ بويىنشا جاعدايلار جاسالدى.
ساتىبالدى ءساۋىرباي,
«ەگەمەن قازاقستان»
اقتوبە
سۋرەتتى تۇسىرگەن
حايرەدەن راۋشانوۆ