2017 جىلى الماتى قالاسىندا وتەتىن XXVIII دۇنيەجۇزىلىك قىسقى ۋنيۆەرسيادادا قازاقستاننىڭ فريستايلدان ستۋدەنتتىك قۇراماسى دا باستى ۇمىتكەرلەر قاتارىندا سانالادى.
قازىر ەلىمىزدىڭ فريستايلشىلارى وسىعان وراي دايىندىق جۇمىستارىن جوعارى دەڭگەيدە وتكىزىپ جاتىر.
– قازىرگى تاڭدا فريستايلدىڭ موگۋل تۇرىنەن يۋليا گالىشەۆا مەن پاۆەل كولماكوۆ شۆەيتساريادا جاتتىعىپ ءجۇر. ال دميتري رەيحەرد پەن دميتري بارماشوۆ شەتەلدە وتكەن جاتتىعۋلارىن اياقتاپ, جاقىندا عانا ەلگە ورالدى. بارلىق سپورتشىلارىمىز كەلەر جىلى وتەتىن ءۇش ماڭىزدى سايىسقا دايىندالۋدا. اتاپ ايتقاندا, بۇل – ۋنيۆەرسيادا, ازيا ويىندارى جانە الەم چەمپيوناتى. ءبىزدىڭ ماقساتىمىز – ءوز ەلىمىزدە وتەتىن دودادا ۇزدىك ناتيجە كورسەتۋ, – دەدى فريستايلدان قازاقستان قۇراماسىنىڭ مەملەكەتتىك جاتتىقتىرۋشىسى قازبەك يمانعالي.
ونىڭ ايتۋىنشا, فريستايلدىڭ موگۋل, اكروباتيكا, سكي-كروسس تۇرىنەن ۋنيۆەرسيادا ويىندارىندا ءبىزدىڭ سپورتشىلار بىرنەشە مەدالعا قول جەتكىزە الادى.
– 2015 جىلى وتكەن قىسقى ۋنيۆەرسيادادا فريستايلدىڭ موگۋل تۇرىنەن ەكى التىن مەدال العانبىز. سول جەتىستىكتى كەلەر جىلى دا قايتالاۋعا كۇش سالامىز. گالىشەۆا مەن كولماكوۆتىڭ التىن تۇعىردان كورىنۋگە مۇمكىندىكتەرى مول. ال فريستايلدىڭ اكروباتيكا تۇرىنەن جانبوتا الدابەرگەنوۆاعا سەنىم ارتىپ وتىرمىز. سونداي-اق, سكي-كروسس شەبەرلەرى دە قازاقستان قورجىنىنا مەدال سالۋعا مۇمكىندىگى بار, – دەپ اتاپ ءوتتى ق.يمانعالي.
ايتا كەتۋ كەرەك, قازاقستاندىق فريستايلشىلار 2017 جىلعى XXVIII دۇنيەجۇزىلىك قىسقى ۋنيۆەرسياداعا دەيىن فينليانديا, كانادا, اقش-دا وتەتىن الەم كۋبوگىنىڭ كەزەڭدەرىنە قاتىسادى.