قازاقستانعا كەلەتىن ءاربىر ءتۋريستىڭ ەكىنشىسى الماتىعا سوقپاي كەتپەيدى دەسەك تە, ۋنيۆەرسيادا كۇندەرىندە ەلگە كەلگەن قوناقتاردىڭ ءاربىر كۇنىن اسەرلى ەتە الاتىنداي وڭتۇستىك شاھاردا قانداي كورىكتى ورىندار بار؟ الىسىن ايتپاعاندا, ۇلان-بايتاق قازاقستاننىڭ ءار شالعايىنان ستۋدەنتتىك الاماندى تاماشالاۋعا كەلەتىن وتانداستارىمىزدىڭ سانى قانشالىقتى بولادى؟ بۇل – قازىر الداعى كۇندەرى وتەتىن جارىستاردىڭ جارتى ماسەلەسى.
وتكەن اپتادا الماتىدا ۋنيۆەرسيادا 2017 نىساندارىنا تۋريستىك نارىققا قاتىسىپ وتىرعان كومپانيالاردىڭ وكىلدەرى ءۇشىن اقپاراتتىق ساياحات ۇيىمداستىرىلدى.
مەرەكە قارساڭىنداعى ماڭىزدى شاراعا دۇنيەجۇزىلىك قىسقى ۋنيۆەرسيادا 2017 ديرەكتسياسى قازاقستان تۋريستىك قاۋىمداستىعىن تارتتى.
اقپاراتتىق ساياحات دۇنيەجۇزىلىك قىسقى ۋنيۆەرسيادا جارىستارى وتەتىن «شىمبۇلاق» تاۋ شاڭعىسى كۋرورتىن, «مەدەۋ» سپورت كەشەنىن, «سۇڭقار» حالىقارالىق شاڭعى ترامپليندەر كەشەنىن, بالۋان شولاق اتىنداعى سپورت جانە مادەنيەت سارايىن, «الاتاۋ» شاڭعى جانە بياتلون كەشەنىن, «تاباعان» سپورت-ويىن-ساۋىق كەشەنىن, «الماتى ارەنا», «حالىق ارەنا» سياقتى 8 نىساندى قامتىدى.
بۇل شارا ەلىمىزدە تۋريستىك احۋال ورناتىپ وتىرعان نارىق ويىنشىلارى ءاربىر نىساندى كورىپ, قانداي تۋريستىك قىزمەت ۇسىنا الاتىنىن ەكشەۋگە سەپتەسەرى انىق.
قازاقستان تۋريستىك اسسوتسياتسياسىنىڭ پرەزيدەنتى راشيدا شايكەنوۆانىڭ ايتۋىنشا, ۋنيۆەرسيادا كۇندەرىندە الماتىعا سىرتتان كەلەتىن شەتەلدىك تۋريستەردەن بولەك, ەلىمىزدىڭ تۇكپىر-تۇكپىرىنەن كەلەتىن قوناقتار قاتارى دا كوبەيەدى. وسىعان وراي, تۋريستىك اگەنتتىكتەر سپورتتىق نىسانداردى الماتى قالاسى مەن وبلىسى بويىنشا ەكسكۋرسيالىق تۋرلارعا قوسادى. قازىردىڭ وزىندە ۋنيۆەرسيادا نىساندارىن ارالاپ شىعۋعا ارنالعان «سپورتتىق الماتى» اتتى ەكسكۋرسيالىق تۋر جاسالعان.
ايناش ەسالي,
«ەگەمەن قازاقستان»
الماتى