قازاقستان رەسپۋبليكاسىنىڭ سىرتقى ىستەر مينيسترلىگى رەسەيدىڭ تۇركياداعى ەلشىسى اندرەي كارلوۆتىڭ ولتىرىلۋىنە بايلانىستى مالىمدەمە جاسادى. مالىمدەمەدە بىلاي دەلىنەدى:
«قازاقستان رەسپۋبليكاسىنىڭ سىرتقى ىستەر مينيسترلىگى انكارادا بولعان رەسەي فەدەراتسياسىنىڭ تۇرىك رەسپۋبليكاسىنداعى توتەنشە جانە وكىلەتتى ەلشىسى اندرەي كارلوۆتىڭ ءولتىرىلۋى وقيعاسىن شەشىمدى تۇردە ايىپتايدى.
ەگەمەن ەلدىڭ وكىلەتتى وكىلىنە قارسى باعىتتالعان تەرروريزمنىڭ اتالعان اكتىسى تۇركيا مەن رەسەي اراسىنداعى قارىم-قاتىناسقا سىزات ءتۇسىرىپ, ۇرەي تۋعىزۋدى كوزدەيدى».
مالىمدەمەدە, سونىمەن قاتار, رەسەي تاراپىنا, مارقۇمنىڭ وتباسى مەن جاقىندارىنا كوڭىل ايتىلىپ, اتالعان جاۋىزدىق اكتىسىنىڭ ەشقانداي دا اقتاۋعا جاتپايتىنى اتاپ كورسەتىلەدى جانە تۇركيانىڭ قۇقىق قورعاۋ ورگاندارى تاراپىنان ەگجەي-تەگجەيلى تەكسەرىلىپ, ونى ۇيىمداستىرۋشىلاردىڭ قاتاڭ جازالاناتىنىنا ءۇمىت بىلدىرىلەدى.