«بايتەرەك» حولدينگىنىڭ ەنشىلەس كومپانياسى «تۇرعىن ءۇي قۇرىلىسىنا كەپىلدىك بەرۋ قورى» اق تۇرعىن ءۇي قۇرىلىسىنا كەپىلدىك بەرۋ قورى جۇزەگە اسىراتىن كەپىلدىك بەرۋ مەحانيزمى قۇرىلىستىڭ اياقتالۋى جاعىنان ۇلەسكەردىڭ قورعالۋىنا باعىتتالعان دەيدى باسقارما توراعاسى داۋرەن وڭاەۆ.
– داۋرەن ارمان ۇلى, تۇرعىن ءۇي قۇرىلىسىنا كەپىلدىك بەرۋ قورىنىڭ ىسكە قوسىلعانى تۋرالى جاريالانعاننان بەرى ەكى اي ءوتتى. اتالعان باستامانى قاتاڭ جانە ءتىپتى وڭايشىلىقپەن ورىندالمايتىن دەپ ايتىپ جاتىر. ۇلەسكەرلەرمەن بولعان قانشاما داۋدان كەيىن قۇرىلىس نارىعىنا وڭ يدەيالارمەن, يگى نيەتپەن كىرۋ قيىن با؟
– جاقسى سۇراق. شىن مانىندە ءبىز قۇرىلىس نارىعىنا جاڭا ويىنشى رەتىندە, تۇرعىن ءۇي قۇرىلىسىنا كەپىلدىك بەرۋمەن, اتاپ ايتقاندا ۇلەسكەرلەردىڭ تاۋەكەلدەرىنە كەپىلدىك بەرۋمەن اينالىساتىن جاڭا تاراپ رەتىندە قاتىسۋدامىز. بۇل رەتتە ءبىز قازىرگى كەزدە ۇلەستىك قۇرىلىس بولىگىندە بارلىعىمەن, ونىڭ ىشىندە حالىقپەن تەرىس قابىلداناتىن نارىققا كىرىپ جاتىرمىز. سوندىقتان, مۇنداي نارىققا كىرۋ, جۇمىستى باسىنان باستاۋ وڭاي ەمەس.
سونىمەن قاتار, الدانعان ۇلەسكەرلەردىڭ, ءوز مىندەتتەمەلەرىن ورىنداماعان قۇرىلىس سالۋشىلاردىڭ وقيعالارىمەن بايلانىستى جاعىمسىز جاعدايلاردىڭ سالدارى وسى سالادا ارنايى كەپىلدىك بەرۋ قورىن قۇرۋعا باستاما سالدى. مۇنداي جاعدايلارعا جول بەرمەۋ ماقساتىندا كەپىلدىك بەرۋ قورى قۇرىلدى جانە ءبىز الدىمىزدا تۇرعان ماقساتتاردى ورىنداۋ ءۇشىن قۇرىلىس سالۋشىلارمەن ءوزارا ارەكەتتەسۋدى باستايمىز.
ءسىز قۇرىلىس سالۋشىلارعا قويىلعان قاتاڭ تالاپتار تۋرالى ايتىپ وتىرسىز, بىراق بۇل كوڭىلگە قونىمدى نارسە. وبەكت بويىنشا ءبىزدىڭ كەپىلدىگىمىزدى الۋ ءۇشىن بارلىق وبەكتىلەر بەلگىلى ءبىر ولشەمدەرگە سايكەس كەلۋى ءتيىس جانە ءبىز وعان كوزىمىزدى جەتكىزۋىمىز كەرەك. سونىمەن قاتار, ءبىز نەگىزىندە قۇرىلىستىڭ اياقتالۋىنا كەپىلدىك بەرەمىز, سوندىقتان دا ءبىز قۇرىلىس سالۋشى تۇلعاسىنداعى سەرىكتەسىمىزدىڭ, ال ءبىز سەرىكتەستىك قاتىناستارعا نەگىزدەلەمىز – شىن مانىندە سەنىمدى ەكەنىنە انىق سەنىمدى بولۋىمىز كەرەك.
– سىزدەر ۇلەسكەرلەردىڭ اقشاسىن تارتۋ ەسەبىنەن سالىناتىن تۇرعىن ءۇيدىڭ 50 پايىزىنان استامىن ساقتاندىرۋعا نيەتتەرىڭىزدىڭ بارى تۋرالى اتاپ وتتىڭىزدەر. بۇل رەتتە قوردىڭ وڭ شەشىمىن الاتىن قۇرىلىس كومپانيالارى ءمىنسىز بەدەلگە يە بولۋى قاجەت. قۇرىلىس سالۋشىلار ءۇشىن بۇل سحەما قانشالىقتى اۋىر جانە ول ورىندالاتىنداي ما؟
– قۇرىلىس سالۋشىلار ءۇشىن بۇل تالاپتاردى ورىنداۋ ابدەن مۇمكىن. ماسەلە, ارينە, نارىقتا كەمىندە ءۇش جىل جۇمىس تاجىريبەسى بار جانە پايدالانۋعا بەرىلگەن تۇرعىن ءۇيدىڭ ءتيىستى كولەمىنە يە, جەتكىلىكتى تۇردە نىق تۇرعان قۇرىلىس سالۋشىلار تۋرالى ءجۇرىپ جاتقانى بەلگىلى. ياعني, ەگەر قۇرىلىس سالۋشى, مىسالى استانا جانە الماتى قالالارىنداعى وبەكتىلەر بويىنشا كەپىلدىك العىسى كەلسە, ول تۇرعىن ءۇيدىڭ كەمىندە 18 مىڭ شارشى مەترىن پايدالانۋعا بەرۋ تاجىريبەسىنە يە بولۋى قاجەت. ال وڭىرلەردە سالاتىن بولسا – تۇرعىن ءۇيدىڭ كەمىندە 18 مىڭ شارشى مەترى پايدالانۋعا بەرىلگەن بولۋى ءتيىس.
سونىمەن قاتار, قۇرىلىس سالۋشى اۋديتتەلگەن قارجىلىق ەسەپتىلىكپەن راستالعان سوڭعى ەكى جىل ىشىندە شىعىنسىز قىزمەتكە يە بولۋى شارت. كەپىلدىك الۋ ءۇشىن وعان وسىنداي تالاپتار قويىلادى. بۇل تالاپتارعا سايكەس كەلمەگەن جاعدايدا, بىزگە جۇگىنۋدەن ناتيجە بولمايدى. بۇل بىزگە جەتكىلىكتى تۇردە كاسىبي جەتىلگەن قۇرىلىس سالۋشىلاردىڭ عانا كەلۋىنە قىزىعۋشىلىعىمىزدى ءبىلدىرەدى. وتكەن ەكى ايداعى جۇمىس ىشىندە ءبىز مۇنداي قۇرىلىس سالۋشىلار تاراپىنان بۇل مەحانيزمگە قىزىعۋشىلىق تانىتۋدى بايقاپ وتىرمىز.
– ياعني سىزدەر تەك ءىرى قۇرىلىس سالۋشىلار ءۇشىن عانا جاعداي جاسايسىزدار ما؟
– جوق, تەك ءىرى عانا ەمەس, قازاقستاندا وسى ولشەمدەرگە سايكەس كەلەتىن باسقا دا قۇرىلىس سالۋشىلار بار, ولار نەبارى بىرنەشە وبەكتىنى پايدالانۋعا بەرگەنىمەن, ولاردى قانداي دا ءبىر اۋىرتپالىقتارسىز سالىپ, ءوز مىندەتتەرىن ورىنداپ وتىر. سوندىقتان دا مەن مۇنى قۇرىلىس سالۋشىلار ءۇشىن وتە قاتاڭ تالاپتار دەپ ايتپاس ەدىم. قالىپتى جۇمىس جاعدايى.
بۇگىنگى كۇنى قۇرىلىس سالۋشىلار ءۇشىن قولدانىستاعى تالاپتار تۇپكىلىكتى ەمەس ەكەنىن اتاپ وتكىم كەلەدى. بىزدەر, زاڭنىڭ ازىرلەنۋىنە جاۋاپتى ورگان رەتىندە ۇلتتىق ەكونوميكا مينيسترلىگىمەن ءبىرلەسە وتىرىپ, ولاردى ءاردايىم جەتىلدىرىپ جانە جاڭالاپ وتىرامىز. قاراپايىم تىلمەن ايتقاندا, بۇل تالاپتار نارىقپەن بىردەي دەم الىپ وتىرۋى قاجەت.
نارىق وزگەرگەن جاعدايدا – نارىقتىڭ قۇرىلىمى وزگەرەدى. ەگەر تەز ۋاقىتتا, ساپالى قۇرىلىستى سالاتىن جانە شىن ءمانىندە سەنىم ارتۋعا بولاتىن كۇشتى قۇرىلىس سالۋشىلار پايدا بولسا, ولارعا قويىلاتىن تالاپتار دا وزگەرەدى, ۋاقىت تالابىنا سايكەس كەلۋى ءتيىس.
– تۇرعىن ءۇي قۇرىلىسىنا كەپىلدىك بەرۋ قورىنا قانشا ءوتىنىم كەلىپ ءتۇستى؟ ەكىنشىدەن, «№1 كەپىلدىكتى» كىم الادى؟
– رەسمي تۇردە ءبىزدىڭ مەحانيزم ارقىلى ءبىر ءوتىنىم ءوتتى جانە ول بويىنشا وڭ شەشىم قابىلدانادى دەپ ايتا الامىن. وكىنىشكە وراي ءبىز قۇرىلىس سالۋشىنى ءالى ايتا المايمىز, دەگەنمەن, شامامەن كەلەسى اپتادا ءبىرىنشى كەپىلدىكتىڭ بەرىلۋى تۋرالى جاريالاۋعا دايىن بولامىز جانە بۇل تۋرالى بارلىعىن مىندەتتى تۇردە اقپاراتتاندىرامىز.
قازىرگى ۋاقىتتا ءبىز 3-4 قىزىعۋشىلىق تانىتقان قۇرىلىس سالۋشىلارمەن كەلىسسوزدەر جۇرگىزۋ بارىسىندامىز, ولار قازىر جوبالاۋ-سمەتالىق قۇجاتتاما بويىنشا مەملەكەتتىك ساراپتامانىڭ قورىتىندىسىن الۋ جونىندە ءتيىستى ءراسىمدەردەن ءوتىپ جاتىر, جەر پايدالانۋ قۇقىعىن راسىمدەۋگە اكىمدىك تۇلعاسىنداعى جەرگىلىكتى اتقارۋشى ورگاندارمەن ءوزارا ارەكەتتەسۋدە. مۇنىڭ ءبارىن ورىنداۋ مۇمكىن جانە قۇرىلىس سالۋشىلار شامادان تىس تاپسىرما نەمەسە وتە قاتاڭ, ورىندالمايتىن تالاپتار بايقاپ تۇرعان جوق. ءبىز ولارمەن ءاردايىم كەلىسسوزدەر جۇرگىزىپ, الدىن الا جۇمىس تارتىبىندە ولاردىڭ قۇجاتتارىن قاراپ, تولىق پاكەت ءۇشىن نە جەتىسپەيتىندىگىن ايتىپ كومەكتەسىپ وتىرامىز. ەندى ءبىر-ەكى ايدىڭ ىشىندە ولار ءتىپتى بىرنەشە جوبا بويىنشا بارلىق قاجەتتى قۇجاتتامانى جيناقتايدى دەگەن ويدامىن.
– داۋرەن ارمان ۇلى, قانداي جاعدايلار كەپىلدىك بەرۋ جاعايلارى بولىپ ەسەپتەلەدى؟
– كەپىلدىك بەرۋ جاعدايلارى قۇرىلىس سالۋشى تاراپىنان مىندەتتەمەلەرىن ورىنداماۋدى قامتيدى. بىرىنشىدەن, بۇل – ءۇيدى پايدالانۋعا بەرۋ مەرزىمىن بۇزۋ. بۇل جەردە تۇرعىن ءۇيدى پايدالانۋعا بەرۋ مەرزىمىن زاڭعا سايكەس جالپى ۇزاقتىعى 9 ايعا ءۇش مارتە ۇزارتۋ مۇمكىندىگىن اتاپ ءوتۋ قاجەت. ياعني قۇرىلىس سالۋشى تۇرعىن ءۇيدى پايدالانۋعا بەرۋ مەرزىمىن جوبالاۋ قۇجاتتاماسىندا كورسەتىلگەن مەرزىمنەن 9 ايدان اسىرا كەشىكتىرگەن جاعدايدا.
ەكىنشىسى – ۇلەسكەرلەردىڭ اقشاسىن ماقساتىنا قاراي پايدالانباۋ. بۇل ۇلەسكەرلەردەن پاتەر قۇرىلىسى ءۇشىن الىنعان اقشانىڭ قۇرىلىس ماقساتتارىنا جۇمسالماۋ جاعدايى. ءبىز قۇرىلىس سالۋشىنىڭ شوت بويىنشا بارلىق ارەكەتتەرىن قاداعالاپ وتىرامىز, ياعني ءبىز اقشانىڭ قايدا جانە قانداي ماقساتتارعا جۇمسالىپ جاتقانىن كورىپ وتىرامىز.
جانە ءۇشىنشىسى – كۇشىنە ەنگەن سوت شەشىمىمەن راستالاتىن, تۇرعىن ءۇيدىڭ قۇرىلىسىمەن بايلانىسى جوق قىزمەت بويىنشا قۇرىلىس سالۋشىنىڭ بانكروتتىعى.
بۇل جەردە كەپىلدىك بەرۋ قورىمەن كەپىلدىك بەرۋ جاعدايىنىڭ باستالۋ فاكتىسىن تانۋ – ءبىز ءۇشىن شەتكى شارا. ءبىز ءوز تاراپىمىزدان كەپىلدىك بەرۋ جاعدايىنا اكەپ سوعۋى مۇمكىن قۇرىلىس سالۋشىمەن تۋىندايتىن بارلىق تاۋەكەلدەردى ۇنەمى قاراستىرىپ وتىرامىز جانە ولاردى پايدا بولۋ ساتىنەن باستاپ ازايتامىز. ال مۇنداي تاۋەكەلدەر ءار ءتۇرلى ۋچاسكەدە پايدا بولۋى ابدەن مۇمكىن. مىسالى, بۇل ءار ءتۇرلى سوت داۋلارى...
– سىزدەرمەن بە؟
– جوق, ءۇشىنشى تۇلعالارمەن. تاۋەكەلدەر باس مەردىگەر دەڭگەيىندەگى قانداي دا ءبىر تەحنيكالىق ماسەلەلەر, تەرىس باسقارۋشىلىق شەشىمدەر, ۋاكىلەتتى كومپانيانىڭ ءوزىنىڭ نەمەسە قۇرىلىس سالۋشىنىڭ دەڭگەيىندە تۋىنداۋى مۇمكىن. جانە سول سياقتى.
جانە دە مەن اتاپ وتكەندەي, ءبىز وسى ساتتە ونى تەكسەرە باستايمىز. ەڭ الدىمەن, وبەكتىنىڭ ءوزىنىڭ جاعدايىنا, ونىڭ قۇرىلىس بارىسىنا قارايمىز جانە مونيتورينگتەۋ بارىسىندا قۇرىلىس بارىسى جوسپارعا سايكەس كەلمەۋى, ياعني سالىنۋعا تيىستىدەن از سالىنعانى انىقتالسا, ءۋاكىلەتتى كومپانياعا انىقتالعان بۇزۋشىلىقتاردى جويۋ تۋرالى تالاپ قويىلادى. وسى ماقساتتار ءۇشىن ءبىز اپتا سايىن قۇرىلىس بارىسىن قاداعالاپ وتىراتىن جانە بارلىق قاراجاتتىڭ, ەڭ الدىمەن ۇلەسكەرلەر قاراجاتىنىڭ ماقساتىنا قاراي جۇمسالۋىن باقىلايتىن تاۋەلسىز ينجينيرينگتىك كومپانيانى تارتامىز.
ەگەر ولار بەلگىلەنگەن مەرزىمدە جاعدايدى تۇزەمەسە جانە وسى جاعدايدى تۇزەۋ بويىنشا ناقتى جوسپار ۇسىنباسا, ءبىز كەپىلدىك بەرۋ جاعدايىنىڭ فاكتىسىن بەلگىلەيمىز جانە بۇل تۋرالى ءوز قاراجاتىن سالعان بارلىق ۇلەسكەرلەردى رەسمي سايت پەن باق ارقىلى حاباردار ەتەمىز.
بۇل ساتتە كەپىلدىك بەرۋ قورى وسى ۋاكىلەتتى كومپانيانى سەنىمگەرلىكپەن باسقارۋدى باستايدى, ياعني ءمانى بويىنشا باسقارۋشى قۇرىلىس كومپانياسى بولا باستايدى. بۇل وبەكت بويىنشا ءبىز ەندىگى جەردە قۇرىلىستى اياقتاۋ ءۇشىن – ۋاكىلەتتى كومپانيانىڭ, قۇرىلىس سالۋشىنىڭ جەكە قارجاتىنان نەمەسە ۇلەسكەرلەر اقشاسىنان, سونداي-اق رەسپۋبليكالىق بيۋدجەتتەن بولىنگەن قاراجات ەسەبىنەن قالىپتاسقان قوردىڭ قارجىلىق كاپيتالىنىڭ ەسەبىنەن قانشالىقتى قاراجات سالۋ قاجەتتىگىن قارايمىز, تالداۋ جۇرگىزەمىز.
– قانداي سوما تۋرالى ايتىلىپ جاتىر؟
– وسى جىلعا 10 ميلليارد تەڭگە سوما تۋرالى ايتىلىپ جاتىر. كەلەسى جىلعا قوسىمشا قاراجات ءبولىنۋى مۇمكىن. ءجانە كەپىلدىك بەرۋ جاعدايى ورىن العان كەزدە ءبىز قۇرىلىستى اياقتاۋعا جانە كەيىننەن ۇلەسكەرلەرگە پاتەرلەرىن بەرۋگە باعىتتالعان بەلگىلى ءبىر شارالاردى قابىلداي باستايمىز.
ءبىز قۇرىلىستى اياقتاۋمەن بايلانىستى شىعىنداردى كوتەرەتىن بولعاندىقتان, تيىسىنشە ءبىز وسى اقشانى قايتارىپ الۋدى كوزدەيمىز, سوندىقتان قۇرىلىس سالۋشى ءوز جاۋاپكەرشىلىگىن ءتۇسىنۋى قاجەت. قۇرىلىستى اياقتاۋ بويىنشا ءوز ءمىندەتتەمەلەرىن ورىنداماي, بۇل جاۋاپتىلىقتى بىزگە جۇكتەسە دە, ول كەيىننەن ءبارىبىر بىزبەن قارىم-قاتىناستا بولادى. ءبىز قۇرىلىستى اياقتاپ بەرەمىز, ءبىراق سودان كەيىن ۋاكىلەتتى كومپانيا دەڭگەيىندە قاراجات قايتارىلمايتىن بولسا, ءبىز ونى قايتارۋدى قۇرىلىس سالۋشىدان تالاپ ەتەمىز جانە ول ءبىزدىڭ شىعىندارىمىزدى وتەۋگە مىندەتتەنەدى. بۇل زاڭمەن قاراستىرىلعان.
– ال ەگەر وتەۋگە شاماسى كەلمەسە؟
– ەگەر ونىڭ وتەۋگە شاماسى كەلمەسە, ءبىز قۇرىلىس سالۋشىعا بانكروتتىق ءراسىمىن باستايمىز. مۇنىڭ ءبارى زاڭدا جازىلعان جانە بۇل تۋرالى قۇرىلىس سالۋشىلار جاقسى بىلەدى. ءبىز ۇنەمى ولاردىڭ نازارىن وسىعان اۋدارىپ وتىرامىز.
– حالىق ساپاسىز قۇرىلىس قاۋپىنەن جاڭا زاماناۋي ۇيگە كوشۋگە قورقادى. كەپىلدىك بەرۋ ءۇي ساپاسىنا قانداي دا ءبىر اسەرىن تيگىزە مە؟
– ءبىزدىڭ قور جۇزەگە اسىراتىن كەپىلدىك بەرۋ مەحانيزمى قۇرىلىستىڭ اياقتالۋى جاعىنان ۇلەسكەردىڭ قورعالۋىنا باعىتتالعان. بۇل نەگىزگىسى.
ەكىنشىسى – كەپىلدىك العان قۇرىلىس سالۋشى وسى وبەكت بويىنشا كەپىلدىكتىڭ بارى جانە اقشالارى تەك قۇرىلىس ماقساتىندا جۇمسالاتىنى تۋرالى بىلەتىن ۇلەسكەرلەردىڭ اقشاسىن تارتا الادى. ارينە, ءبىز دە قۇرىلىستىڭ بارلىق كەزەڭدەرىن – مەرزىمدەر بويىنشا قۇرىلىس بارىسىن, بارلىق تەحنيكالىق جانە نورماتيۆتى تالاپتارعا سايكەستىگىن جانە اقشانىڭ ماقساتىنا قاراي جۇمسالۋىن باقىلايمىز. مۇنىڭ ءبارى زاڭعا سايكەس اشىق ءبىر بانك شوتى ارقىلى جۇزەگە اسۋى ءتيىس.
بۇل جەردە قوردىڭ كەپىلدىگىن العان قۇرىلىس سالۋشى كەيىننەن مەملەكەتتىك ساراپتامانىڭ وڭ قورىتىندىسىن العان جوبالاۋ-سمەتالىق قۇجاتتامادا كورسەتىلگەن ساپاعا سايكەس كەلۋىن قامتاماسىز ەتۋى ءتيىس. شىن مانىندە ءبىز بۇل ءماسەلەگە تىكەلەي قاتىسپايمىز, سەبەبى جوبالاۋ-سمەتالىق قۇجاتتامانىڭ بارلىق تەحنيكالىق جانە قۇرىلىس نورمالارى مەن قاعيدالارىنا سايكەس كەلۋىن تەكسەرەتىن مەملەكەتتىك ساراپتاما ۇيىمى – مەملەكەتتىك ساراپتاما بار. بۇل بولىكتە ءبىز قۇجاتتار پاكەتىندە مەملەكەتتىك سا-
راپتامانىڭ وڭ قورىتىندىسىن الا وتىرىپ, تاۋەلسىز ينجينيرينگتىك كومپانيانىڭ كومەگىمەن قۇرىلىس بارىسىن ۇسىنىلعاندارعا سايكەس كەلۋىن تەكسەرەمىز. ياعني ۇلەسكەردىڭ قولايلى جاعدايىن, ونىڭ پاتەردى سۇراتقان تۇردە جانە جوبانى بەكىتۋ ءساتىندە راستالعان ساپادا الۋىن تىلەيتىن قوسىمشا تەكسەرۋشى تاراپ پايدا بولادى.
– كەپىلدەندىرۋ شارشى مەتردىڭ باعاسىنا قالاي اسەر ەتەدى؟
– شارشى مەتردىڭ باعاسىنا اسەر ەتۋگە كەلسەك, مۇنى كەشەندى تۇردە قاراۋ كەرەك. كوبىسى بىلاي دەيدى: سىزدەرگە قۇرىلىس سالۋشى تولەيتىن كەپىلدىك جارناسى...
– ال كەپىلدىك جارناسىنىڭ سوماسى قانشا؟
– جوبالاۋ قۇنىنان 2-6 پايىز. سونىمەن, بىزگە سىزدەردىڭ كەپىلدىك جارنالارىڭىز پاتەر قۇنىنا تۇسەدى دەيدى. جالپى العاندا, دۇرىس, سەبەبى بۇل قۇرىلىس سالۋشىنىڭ شىعىستارى جانە ول تيىسىنشە وزىندىك قۇنعا جاتادى. الايدا ۇلەسكەرلەر ءۇشىن باسقا نەعۇرلىم ۇلكەن جانە ماڭىزدى ماسەلە: ەگەر ءبىز بولماساق, وسى كەپىلدىك بەرۋ مەحانيزمى بولماسا قۇرىلىس سالۋشى نە ىستەر ەدى؟ ول وبەكت قۇرىلىسىن قالاي قارجىلاندىرار ەدى؟ ول ەكىنشى دەڭگەيدەگى بانكتەردىڭ نەسيە جولدارى ارقىلى قارجىلاندىرىلۋى مۇمكىن. نەسيە قۇرالدارى 2-6 پايىز ەمەس, 19-20 پايىز ەكەنى بەلگىلى. ساتىپ الۋشىلارعا 19-20 پايىز ارتۋ ءبىر ماسەلە جانە 6 پايىزدان اسىرماي ارتۋ – ءبىر بولەك ماسەلە. ايىرماشىلىق بار ما؟ سوندىقتان بۇل جەردە نەعۇرلىم ارزان بالاما ۇسىنىلادى. ەگەر بارلىعىنا كەشەندى قارايتىن بولساق, وندا پاتەردىڭ ساتىلىم باعاسى تومەندەۋى دە ابدەن مۇمكىن.
– نەگە؟
– ويتكەنى, ولاردا نەعۇرلىم ارزان قارجىلاندىرۋ كوزى بولىپ تابىلاتىن تىرەك پايدا بولادى. بۇدان بولەك, بۇل ۇلەسكەرلەر اقشاسىن تارتۋدىڭ جانە دەرەۋ قۇرىلىسقا كىرىسۋدىڭ مۇمكىندىگى. سونىمەن قاتار, قور قۇرىلىستى باقىلايدى جانە قۇرىلىس سالۋشى قانداي دا ءبىر سەبەپتەرمەن ونى اياقتاي الماسا, ونى ءبىز اياقتايمىز.
اڭگىمەلەسكەن,
تورعىن نۇرسەيىتوۆا