الماتى قالاسىندا ەرەكشە قامقورلىقتى قاجەت ەتەتىن بالالارعا ارنالعان №7 پسيحولوگيالىق-پەداگوگيكالىق كوررەكتسيالى جاڭا كابينەت اشىلدى. الاتاۋ اۋدانىنداعى وقۋشىلار ءۇيىنىڭ عيماراتىندا اشىلعان بۇل ورتالىق قالالىق ءبىلىم باسقارماسى مەن
«بولاشاق» قايىرىمدىلىق قورىنىڭ بىرىگىپ جۇمىس ىستەۋى ارقاسىندا جۇزەگە استى.
بۇگىنگى تاڭدا مەگاپوليستە ەرەكشە قامقورلىقتى قاجەت ەتەتىن 7 مىڭنان استام بالا تۇرادى. سوڭعى 9 اي ىشىندە 877 بالا پسيحولوگيالىق-پەداگوگيكالىق كوررەكتسيا كومەگىن الدى. وسىنداي كابينەتتەردە 5 588 بالاعا ءتيىستى كەڭەس بەرىلدى.
جاڭا ورتالىقتا جىلىنا 180 بالا وڭالۋدان وتەدى. ءار بالامەن جانە ءتۇرلى توپتارمەن ارنايى ماماندار تىكەلەي جۇمىس ىستەمەك. كوزىندە, قۇلاعىندا, قيمىلىن-
دا, سويلەۋىندە, دامۋىندا ءمۇكىسى بار بالدىرعانداردىڭ ەرەكشە قامقورلىققا ءزارۋ ەكەندىگى انىق. وسى رەتتە مۇنداي ورتالىقتارداعى ارنايى ماماندار بالانىڭ دۇرىس ءوسىپ-جەتىلۋىنە كاسىبي كومەك كورسەتۋدە.
«بولاشاق» قايىرىمدىلىق قورىنىڭ باسشىسى دينارا شايجۇنىسوۆا ءوزىنىڭ ءسوزىندە بولاشاقتىقتاردىڭ «ءار بالا مەكتەپكە بارۋعا لايىق» جوباسى اياسىندا 2016 جىلى دۇنيەگە كەلگەن ەكىنشى پسيحولوگيالىق-پەداگوگيكالىق كوررەكتسيا كابينەتى ەكەندىگىن, ءمۇمكىندىگى شەكتەۋلى بالالار ءۇشىن مۇندا بارلىق جاعدايدىڭ جاسالعاندىعىن ايتتى.
«كوررەكتسيا كابينەتتەرىنىڭ جۇمىسى ارنايى مەكتەپكە دەيىنگى بالالار مەكەمەلەرىنە بارمايتىن, ءمۇمكىندىگى شەكتەۋلى بالالار ءۇشىن وتە ءتيىمدى ءجانە بالدىرعانداردىڭ دامۋى ءۇشىن بارلىق جاعدايلار جاسالعان», دەپ اتاپ ءوتتى د.ءشايجۇنىسوۆا. ورتالىق وڭالتۋعا قاجەتتى زاماناۋي قوندىرعىلارمەن تولىق جابدىقتالعان, ەمدىك دەنە شىنىقتىرۋدىڭ, مونتەس-
ءسوريدىڭ كابينەتتەرى, مۋزىكا ىرعاعى زالى, سەنسورلى ءبولمە, ويىن ايماعى, لوگوپەد, دەفەكتولوگ, پسيحولوگ, ادىستەمەشى كابينەتتەرى جۇمىس ىستەيدى. مۇندا كەدەرگىسىز ورتا دا بار, ءدالىزدەر كەڭ, ال اقپاراتتىق تاقتالار برايل شريفتىمەن تولتىرىلعان.
اتاپ وتەرلىك جايت, بۇل ورتالىقتىڭ الاتاۋ اۋدانىندا اشىلۋى تەگىن ەمەس. ويتكەنى, قالاعا كەيىن قوسىلعان ەلدى مەكەندەردى دامىتۋ مودەلىن جۇزەگە اسىرۋ ماقساتىندا جەرگىلىكتى بيۋدجەتتىڭ 60 پايىزى الماتىعا جاڭادان قوسىلعان اۋداندارعا ءبولىنۋدە.
الاتاۋ اۋدانىندا 8 جىل ىشىندە 9 مەكتەپ, 11 مەملەكەتتىك جانە 35 جەكە بالاباقشا ىسكە قوسىلسا, 2016 جىلى 21 بالاباقشا, 4 ەمحانا سالىندى. جەكە ينۆەستورلاردى تارتۋ ەسەبىنەن قۇنى 335 ملن تەڭگە بولاتىن 14 سپورت جانە ويىن الاڭدارى سالىندى. «العاباس-6», «نۇركەنت», «اقكەنت» شاعىن اۋداندارى پايدالانۋعا بەرىلدى. «سايالى» شاعىن اۋدانىندا مەملەكەتتىك باعدارلاما اياسىندا قۇنى 15,8 ملرد تەڭگە بولاتىن 68 ءۇي سالىندى. ۋنيۆەرسيادانىڭ نىساندارى – 12 مىڭ ورىندىق «الماتى ارەنا», اتلەتتەر اۋىلى, «الاتاۋ» ءداستۇرلى ونەر تەاترى جانە باسقا دا كوز تارتار عيماراتتار بوي كوتەردى.
گۇلزەينەپ سادىرقىزى,
«ەگەمەن قازاقستان»