قازاقستانداعى ءىرى حالىقارالىق ينۆەستور بولىپ تابىلاتىن ەۋروپالىق قايتا قۇرۋ جانە دامۋ بانكى (ەقدب) «سامۇرىق-ەنەرگو» ۇلتتىق ەنەرگەتيكالىق حولدينگىنە جەكەشەلەندىرۋ جونىندەگى امبيتسيالىق باعدارلامالارىن جۇزەگە اسىرۋعا قولداۋ كورسەتپەك. اتالمىش باعدارلاما حولدينگتى باقىلاۋشى «سامۇرىق-قازىنا» ءال-اۋقات قورىنىڭ ستراتەگياسىنا سايكەس جۇرگىزىلىپ وتىر.
«سامۇرىق-ەنەرگو» باسقارما توراعاسى الماسادام ساتقاليەۆتىڭ ايتۋىنشا, «ەقدب-مەن نەسيەلىك كەلىسىمگە قول قويۋ «سامۇرىق-ەنەرگونىڭ» ينۆەستيتسيالىق تارتىمدىلىعىنا وڭ اسەر ەتىپ, قازاقستان رەسپۋبليكاسىنىڭ ەنەرگەتيكالىق سالاسىنىڭ دامۋىن قامتاماسىز ەتەدى. وسىلايشا, اتالمىش كومپانيا ەلەكتروەنەرگەتيكا سالاسىندا ەقدب-مەن ۇزاق مەرزىمدى ارىپتەستىك ورناتىپ, ءوزارا ءتيىمدى قارىم-قاتىناستى دامىتا تۇسپەك.
سونىمەن ەقدب «سامۇرىق-ەنەرگو» كومپانياسىنا 100 ملن ەۋروعا جۋىق نەسيەنى تەڭگەمەن نەمەسە رەسەي رۋبلىمەن بەرەدى. نەسيە كومپانيانىڭ بالانستىق اكتيۆتەرىن وڭتايلاندىرۋعا جۇمسالادى. «سامۇرىق-ەنەرگو» توعىز ەنشىلەس كومپانياسىن جەكەشەلەندىرۋدى جوسپارلاپ وتىر. الايدا حولدينگتىڭ باستى ماقساتى حالىقارالىق قور بيرجاسىندا اشىق ساۋداعا شىعۋعا دايىندالۋ.
ءوز كەزەگىندە ەقدب «سامۇرىق-ەنەرگو» كومپانياسىنا ايەلدەر مەن جاستاردى جۇمىسپەن قامتىپ جانە مانساپقا قول جەتكىزۋ جوسپارىن جۇزەگە اسىرۋعا قولداۋ جاسايدى. سول سياقتى ەنەرگەتيكا سالاسىنا ارنايى ءبىلىمى بار جاستاردى كوپتەپ تارتۋ دا ستراتەگيانىڭ ءبىر بولىگى بولىپ تابىلادى.
ەقدب رەسەي, كاۆكاز ەلدەرىندە جانە ورتالىق ازيادا ەنەرگەتيكا جانە تابيعي رەسۋرستار بويىنشا ديرەكتورى ايدا سىدىقوۆا: «بانك – قازاقستانداعى ءىرى ينۆەستورلاردىڭ ءبىرى. ءبىز قازاقستان ۇكىمەتىمەن ەكونوميكاداعى جەكە سالانىڭ ءرولىن ارتتىرۋعا جۇمىس ىستەۋگە مۇددەلىمىز. بانكتىڭ بايىرعى ارىپتەسى «سامۇرىق-ەنەرگو» كومپانياسىمەن باستالعان جوبا وسى باعىتتاعى ماڭىزدى قادام. ەقدب نەسيەسى ۋنيۆەرسيتەتتەرمەن ارىپتەستىك جاعدايدا ارنايى ەنەرگەتيكالىق ماماندىقتار بويىنشا ءبىلىم الۋ مۇمكىندىكتەرىن ارتتىرۋعا سەپتىگىن تيگىزەدى», – دەدى.
سونداي-اق, «سامۇرىق-ەنەرگو» مەن ەقدب استانا قالاسىنىڭ ماڭىنداعى ەرەيمەنتاۋ جەل ەلەكتر ستانتسياسىنىڭ قۇرىلىسى جانە شاردارا سۋ ەلەكتر ستانساسىن جاڭارتۋ سەكىلدى قايتا جاڭعىرتىلاتىن ەنەرگيا كوزدەرى سالاسىندا ەكى كەلىسىمگە قول قويعان. بۇل جۇمىس ەقدب جاسىل ەكونوميكاعا ءوتۋ باعدارلاماسىنىڭ شەڭبەرىندە ءجۇرىپ جاتىر. باعدارلاما قازاقستاننىڭ جاسىل ەكونوميكانى دامىتۋ ستراتەگياسىنا سايكەس كوپتەگەن ماقساتقا جەتۋدى كوزدەيدى. جاڭعىرتىلاتىن ەنەرگيا كوزدەرى «سامۇرىق-ەنەرگو» كۇتىپ تۇرعان ترانسفورماتسيالاۋ جوسپارىنىڭ ماڭىزدى بولىگى.
ەقدب قازاقستان ەكونوميكاسىنىڭ ءتۇرلى سالالارىنا 7,1 ملرد ەۋرودان اسا (7,6 ملرد اقش دوللارى) ينۆەستيتسيا سالدى. بانكتىڭ قازاقستانداعى قىزمەتى كليماتتىڭ وزگەرۋى سەكىلدى عالامدىق ماسەلەلەرگە توتەپ بەرە الاتىن تۇراقتى ءارى ينكليۋزيۆتى ەكونوميكا قۇرۋعا باعىتتالعان.
ايناش ەسالي,
«ەگەمەن قازاقستان»