«ايماقتىڭ بارلىق ونەرپازدارىن الداعى 21 مامىر مادەنيەت جانە ونەر قىزمەتكەرلەرى كۇنىمەن قۇتتىقتايمىن. وسى مەرەكە قارساڭىندا اكتسيانىڭ قورىتىندىسىن شىعارۋدى ءجون كوردىك», دەپ ءوزىنىڭ قۇتتىقتاۋىن جەتكىزگەن وبلىستىق مادەنيەت, مۇراعاتتار جانە قۇجاتتاما باسقارماسىنىڭ باسشىسى ازامات مۇحامەدشينوۆ ءوڭىردىڭ بىرنەشە ونەرپازىنا وبلىس اكىمىنىڭ سىيلىقتارىن تابىس ەتتى.
اباي اۋداندىق مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمى باسشىسىنىڭ ورىنباسارى ەلدار ورازالين «ادەبيەت ءىسى», سەمەيدەگى امىرە قاشاۋباەۆ اتىنداعى وبلىستىق فيلارمونيانىڭ كوركەمدىك جەتەكشىسى قادىلبەك وماروۆ «ۇزدىك مۋزىكا ونەرى», وبلىستىق تاريحي ولكەتانۋ مۇراجايىنىڭ قىزمەتكەرى سەرگەي ستاركوۆ «مۇراجاي ءىسى», تارباعاتاي اۋدانى اقسۋات اۋىلىنداعى مادەنيەت ءۇيىنىڭ ديرەكتورى شاكەن كوپشىكپاەۆا «ۇزدىك كلۋب ءىسى» اتالىمدارى بويىنشا ماراپاتتالىپ, 200 مىڭ تەڭگەلىك سەرتيفيكاتتى يەلەندى.
بۇل كۇنى قولىمەن ەمەس, قىلقالامدى يەگىندە ۇستاپ تۇراتىن ارنايى قوندىرعىنىڭ كومەگىمەن سۋرەت سالاتىن وسكەمەندىك قىلقالام شەبەرى سەرگەي ەليسەەۆ «بەينەلەۋ ونەرى» اتالىمى بويىنشا ۇزدىك دەپ تانىلدى. بۇگىندە 60-قا جۋىق كارتينا اۆتورىنىڭ سۋرەتتەرىنىڭ دەنى – پەيزاج جانرىندا.
«بۇل سىيلىق ۇلىمىز ءۇشىن ۇلكەن قۋانىش. سىياقىنىڭ قارجىسىن ءبىرىنشى كەزەكتە ونىڭ شىعارماشىلىق قابىلەتىن ودان ءارى شىڭداۋعا جۇمسايتىن بولامىز», دەيدى سۋرەتشىنىڭ اكەسى ۆالەري ەليسەەۆ.
اتالمىش شارانىڭ قورىتىندىسى بويىنشا جارما اۋدانى باس جۇلدەنى ەنشىلەپ, «تۋعان ەل – التىن بەسىگىم» اكتسياسىنىڭ اۋىسپالى ونەر كۋبوگىن وسىمەن توعىزىنشى جىل قاتارىنان يەلەندى.
ازامات قاسىم, «ەگەمەن قازاقستان»