ەكونوميكالىق ءوسىمنىڭ ديناميكاسىن ساقتاۋ قاجەت – باقىتجان ساعىنتاەۆ

بيىلعى 4 ايدىڭ قورىتىندىسى بويىنشا ەكونوميكانىڭ نەگىزگى سالالارىندا ءوسىمنىڭ ۇدەۋى بايقالادى.  ۇكىمەت باسشىسى ينۆەستيتسيالار جانە دامۋ مينيسترلىگىنە وڭدەۋ ونەركاسىبىندەگى جاعدايعا ەرەكشە نازار اۋدارۋدى تاپسىردى.  پرەمەر-ءمينيستردىڭ ءبىرىنشى ورىنباسارى ا. مامينگە اتالعان جۇمىستى ۇيلەستىرۋ تاپسىرىلدى.  سونداي-اق ۇكىمەت وتىرىسىندا مۇگەدەكتەردىڭ قۇقىقتارى تۋرالى كونۆەنتسيانىڭ ساقتالۋى ماسەلەلەرى قارالدى.  ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مۇگەدەكتەردىڭ قۇقىقتارىن الەۋمەتتىك قورعاۋ جۇيەسىنىڭ باستى قاعيداتى مۇگەدەكتەردى الەۋمەتكە كىرىكتىرۋ بولىپ تابىلاتىنىن اتاپ ءوتتى.  بۇل تۇستا باسىمدىقتى باعىت كولىك جانە الەۋمەتتىك ينفراقۇرىلىم نىساندارىندا قولجەتىمدى ورتانى قۇرۋ بولىپ تابىلادى. وندا باستى تەتىكپەن مۇگەدەكتەر ءۇشىن اسا جوعارى ماڭىزعا يە 36 مىڭ نىسانعا پاسپورتتاۋ جۇرگىزۋ مەن ولاردى بەيىمدەۋ ايقىندالعان.  2017 جىلدىڭ 1 ساۋىرىندەگى جاعداي بويىنشا جەرگىلىكتى اتقارۋشى ورگاندارمەن جوسپارلانعان 31,1 مىڭ الەۋمەتتىك ينفراقۇرىلىم نىساندارىنىڭ ىشىندە 28,9 مىڭ (80,3%) نىساندا پاسپورتتاۋ جۇرگىزىلگەن.  پاسپورتتاۋدىڭ ماقساتى تولىققاندى ءارى سەنىمدى اقپاراتتى انىقتاۋ, سونىمەن قاتار مۇگەدەكتەر ءۇشىن الەۋمەتتىك ينفراقۇرىلىم نىساندارىنىڭ قولجەتىمدىلىك دەڭگەيىن باعالاۋ بولىپ تابىلاتىنىن ايتا كەتكەن ءجون. مۇگەدەكتەردىڭ قاجەتتىلىكتەرى ءۇشىن ساۋلەتتىك ورتانى قالىپتاستىرۋ كەلەسى كريتەريلەر بويىنشا ىسكە اسىرىلادى: قولجەتىمدىلىك, قاۋىپسىزدىك, اقپاراتتىلىق جانە جايلىلىق.  ەسكە سالا كەتەيىك, 2015 جىلى قازاقستان مۇگەدەكتەردىڭ قۇقىقتارى تۋرالى كونۆەنتسيانى راتيفيكاتسيالاپ, مۇمكىندىگى شەكتەۋلى تۇلعالارعا قاتىستى حالىقارالىق ستاندارتتاردى ەنگىزۋ بويىنشا مىندەتتەمەلەردى قابىلدادى. سونىمەن قاتار, كونۆەنتسيا نورمالارىن جۇزەگە اسىرۋ ماقساتىندا «مۇگەدەكتەردىڭ قۇقىقتارىن قورعاۋ بويىنشا قر كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» قر زاڭى قابىلداندى.