«ماعان GGG-ءدىڭ دەننيمەن وتكەن جەكپە-جەگىندە جاقسى قىرىنان كورىنە الماعانىن, ال «كانەلونىڭ» وتانداسى كىشى چاۆەسكە ەش مۇمكىندىك بەرمەگەنىن ايتقاندار كوپ بولدى. بىراق مىنانى ەستە ساقتايىق. الۆارەس دەنيەل ەمەس. شاكىرتىم مەكسيكالىققا قاراعاندا ىرىلەۋ, ءارى جىلدام قوزعالاتىن ورتا سالماقتاعى بوكسشى. ال الۆارەستىڭ ءجونى مۇلدەم باسقا. ول تۇراقتى جانە رينگ شەتىندەگى ارقانعا سۇيەنىپ الىپ جۇدىرىقتاسقاندى ۇناتادى. مەنىڭشە, گولوۆكينگە قارسى ايقاستا مۇنداي قولدانۋعا بولمايدى, سەبەبى, GGG ونى ەسىنەن تاندىرىپ تاستاۋى مۇمكىن. بۇل كەزدەسۋدە گەننادي قارسىلاسىن كوبىرەك قىسىمعا الىپ, سوڭعى راۋندتاردا نوكاۋتپەن جەڭەدى دەپ ويلايمىن», دەدى اندرە روزە Behind The Gloves باسىلىمىنا بەرگەن سۇحباتىندا.
ورتا سالماقتاعى WBO نۇسقاسى بويىنشا الەم چەمپيونى بيللي دجو سوندەرس تە قازاقستاندىق بوكسشىنىڭ جەڭىسىنە سەنىم ءبىلدىردى.
«شىنى كەرەك, بۇل ايقاستا كىمنىڭ جەڭىسكە جەتەتىنىن ءدال ايتۋ قيىنداۋ. العاشىندا گولوۆكيندى سەنىمدى تۇردە جەڭەدى دەپ ويلاعانمىن. بىراق «كانەلونىڭ» دا وزىندىك قۋلىقتارى بار», دەدى سوندەرس.
دەگەنمەن, ول گەننادي گولوۆكيندى دوپينگ قولدانىپ كەلدى دەپ ايىپتادى.
«شىندىققا كوز جۇگىرتەيىكشى. گولوۆكين سوڭعى ايقاسىندا ءوزىن ەكى-ءۇش جىل بۇرىنعى دەڭگەيىندە كورسەتە المادى. باياۋ قيمىلداعانىن بايقادىق. دجەيكوبسپەن كەزدەسۋىندە ونى بەس رەت دوپينگكە قارسى سىناقتان وتكىزگەنى سەبەپ بولدى دەپ ويلايمىن. گەنا بۇرىنعى دەڭگەيىندە جۇدىرىقتاسا الماعانىنىڭ بىردەن ءبىر سەبەبى وسى, ءبارى ءادىل ءوتتى», دەدى BoxingScene.com باسىلىمىنا بەرگەن سۇحباتىندا.
بيللي دجو سوندەرس وسى جىلدىڭ سوڭىنا دەيىن گولوۆكين-الۆارەس ايقاسىنىڭ جەڭىمپازىمەن قولعاپ تۇيىستىرگىسى كەلەتىنىن دە جاسىرىپ قالمادى. دەگەنمەن, ول ويىنا جەتۋ ءۇشىن الدىمەن 8 شىلدە كۇنى لوندوندا اۆتانديلا حۋرتسيدزەگە قارسى جەكپە-جەكتە تيتۋلىن قورعاۋ كەرەك ەكەنىن ايتتى.
ايتا كەتەيىك, گولوۆكين-الۆارەس جەكپە-جەگىنىڭ كۇنى بەلگىلى بولعانمەن, وتەتىن ورنى ازىرگە ناقتىلانبادى. ESPN تەلەارناسىنىڭ ساراپشىسى دەن رافاەل Golden Boy Promotions پروموۋتەرلىك كومپانياسىنىڭ پرەزيدەنتى ەريك گومەستىڭ وسىعان قاتىستى پىكىرىن سۇراعان ەكەن.
«گومەستىڭ ماعان ايتۋى بويىنشا بىرنەشە ارەنانىڭ باسشىلارىنان ۇسىنىس تۇسكەن. ولاردىڭ ءبارى بوكس كەشىن ءوز ستاديونىندا وتكەنىن قالاپ وتىر. بۇل تىزىمدە ارلينگتونداعى (تەحاس شتاتى) AT&T Stadium, لاس-ۆەگاستاعى T-Mobile Arena, لوس-اندجەلەستەگى Dodgers Stadium جانە نيۋ-يوركتەگى Madison Square Garden ارەناسى بار. كومپانيا پرەزيدەنتى جاقىن ۋاقىتتا وسكار دە لا حويانىڭ (الۆارەستىڭ پروموۋتەرى) الداعى اپتالاردا بىرنەشە كەزدەسۋ ۇيىمداستىرىپ, وسى ماسەلەنى تالقىلايدى», دەپ جازدى دەن رافاەل ESPN سايتىنداعى جەكە باعاناسىندا.
وسى ماسەلەگە قاتىستى گەننادي گولوۆكيننىڭ پروموۋتەرى توم لەففلەر دە وي ءبولىستى.
«بۇل ورىندى تاڭداعان كەزدە اقشا ماسەلەسى ءبىرىنشى ورىندا بولمايدى دەگەن ويدامىن. سەبەبى, بۇل تاريحي كەزدەسۋ, ونى بۇكىل الەم كۇتىپ وتىر. ءوز باسىم لاس-ۆەگاستىڭ مۇمكىندىگىن جوعارى باعالار ەدىم. سەبەبى, بۇل ارەنادا گولوۆكين ءالى جۇدىرىقتاسقان جوق. بۇل ونىڭ ارمانى. لاس-ۆەگاستا تانىمال تۇلعالار كوپ. وسى جەردە ۇيىمداستىرسا, ولاردىڭ ءبارى كەلەتىن ەدى. بۇل قالادا مايك تايسون, فلويد مەيۋەزەر, مەنني پاكياو سەكىلدى ۇزدىكتەر جەكپە-جەك وتكىزگەن.
بىرەر اپتا بۇرىن ۆلاديمير كليچكو مەن ەنتوني دجوشۋا كەزدەسۋىندە «ۋەمبلي» ستاديونىنا 90 مىڭ جانكۇيەر كەلدى. ءبىز دە وسىنشا كورەرمەن جيناي الساق, كەرەمەت بولار ەدى. قازىر وسىنى قاراستىرىپ جاتىرمىز. بىزگە ۇسىنىستار كوپتەپ ءتۇسىپ جاتىر.
«داللاس كوۆبويز» كلۋبىنىڭ باسشىسى دجەرري دجونس گولوۆكيندى AT&T Stadium ستاديونىنان اتالعان كوماندانىڭ ويىنىن كورۋگە شاقىردى. بۇل ستاديوندا الۆارەس ليام سميتقا قارسى كەزدەسۋ وتكىزىپ, 50 مىڭ جانكۇيەر جيناعان بولاتىن. داللاستاعى ستاديوندا ءبىز 90 نەمەسە 100 مىڭ بيلەت ساتا الامىز دەگەن ويدامىن», دەيدى لەففلەر UCNLive.com باسىلىمىنا بەرگەن سۇحباتىندا.
دايىنداعان: ايان ءابدۋالي, «ەگەمەن قازاقستان»