كورمەنىڭ ماقساتى – كوپشىلىكتىڭ قولدانبالى ونەر مەن كەسكىندەمە جانرىنا كوركەم قۇندىلىق تۇرعىسىنداعى كوزقاراسىن قالىپتاستىرۋ, جەرگىلىكتى قولونەر شەبەرلەرى اراسىندا تاجىريبە الماسۋ جانە ۇلتتىق مادەني مۇرامىزدى ناسيحاتتاۋ.
«تاۋەلسىزدىگىمىزدى العالى بەرى باستى ءتول جادىگەرلەرىمىز بولىپ سانالاتىن ۇلتتىق كيىمدەرىمىز بەن قولونەرىمىزدى دارىپتەۋگە ايرىقشا كوڭىل بولىنە باستادى. «ەل ءىشى – ونەر كەنىشى» دەمەكشى, ايماقتاردا وسى سالانى دامىتۋعا ايرىقشا نازار اۋدارىلىپ, ونەرلەرىمەن تانىلعان شەبەرلەرىمىزدىڭ قاراسى ارتتى. مەملەكەت باسشىسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا بابادان بالاعا مۇرا بولىپ كەلە جاتقان مادەني مۇرالارىمىزدى وسكەلەڭ ۇرپاققا جەتكىزۋدى ءھام تانىستىرۋدى مىندەتتەدى», دەپ اتاپ ءوتتى شارا ۇيىمداستىرۋشىلارى.
كورمەگە ينستيتۋتتىڭ كاسىپتىك وقىتۋ جانە ديزاين كافەدراسىنىڭ وقىتۋشىلارى مەن ستۋدەنتتەرىنىڭ 50-دەن استام قولدانبالى ونەر, كەسكىندەمە جانرىنداعى تۋىندىلارى جانە ۇلتتىق ناقىشتاعى كيىم ۇلگىلەرى قويىلعان.
اتاپ ايتقاندا, ا. نازاروۆانىڭ «سكاكۋن – ۆولنايا دۋشا كازاحسكوي ستەپي», ا. حاميتتىڭ «ەر-توقىم», گ. اشىقبايدىڭ «دومبىراشى قىز», ج. بازاربەكتىڭ «ماحاببات», ە. بوشقۇلدىڭ «قاسقىر تەرىسى», ق. نۇربايقىزىنىڭ «ايشا ءبيبى», ا. نەيفەلدتىڭ «بالا بەسىك» اتتى تۋىندىلارى ءتول تاريحىمىزدىڭ تەرەڭ قويناۋىنان سىر شەرتەدى. ال ا. امانجولدىڭ «شەبەر قولى», م. ءالجانوۆتىڭ «حالىق ونەر تامىرى», ج. تۇرماحانوۆانىڭ «بايتەرەك تاريحى», ش. جۇماليەۆانىڭ «استانا جولى», «تاۋەلسىزدىككە 25 جىل», گ. نۇرپاشتىڭ «ەرتەگى الەمى», ج. قيلىباەۆانىڭ «كوكتەم كوڭىلى», ا. فيەشكانىڭ «نەجنوست» تاقىرىبىنداعى شىعارمالارىندا ەلىمىزدىڭ تاۋەلسىزدىك جىلدارىنداعى جەتكەن جەتىستىكتەرى مەن تولايىم تابىستارى كوركەم بەينەلەنگەن. سونداي-اق, ۇلتتىق مۋزىكالىق اسپاپتار, «كوكتەم گ ۇلى», «كەربەز سۇلۋ», «توميريس», «حانشايىم» ءساندى كيىم كوللەكتسيالارى مەن كۇندەلىكتى تۇرمىس-تىرشىلىكتە قولدانىلعان ۇلتتىق بۇيىمدار كوپشىلىك نازارىنا ۇسىنىلدى.
«كورمەنى ۇيىمداستىرۋداعى باستى كوزدەگەنىمىز – ءتول قۇندىلىقتارىمىزدى جانداندىرۋشى ستۋدەنتتەردىڭ قاتارىن كوبەيتىپ, ولاردىڭ ونەرلەرى ارقىلى ۇلتتىق كيىم ۇلگىلەرىندەگى ەلەمەنتتەردى جاڭا ۇلگىدەگى ۇلتتىق كيىمدەرىمىزگە ەندىرىپ, تىڭ برەندتتەر قالىپتاستىرۋ. بۇگىنگى شارانى تاماشالاعان كوپشىلىك كوپ نارسەگە كوز جەتكىزدى دەپ ويلايمىن. ەڭ باستىسى, ۇمىت بولىپ بارا جاتقان دۇنيەلەرىمىزبەن قايتا قاۋىشتىق», دەيدى كاسىپتىك وقىتۋ جانە ديزاين كافەدراسىنىڭ مەڭگەرۋشىسى اينۇر جاسكيلەنوۆا.
ءىس-شارا سوڭىندا ۇزدىك دەپ تانىلعان ونەر تۋىندىلارىنىڭ اۆتورلارى ارنايى سەرتيفيكاتپەن ماراپاتتالىپ, پەداگوگيكالىق ينستيتۋتتىڭ ونەر ۇجىمدارىنىڭ گالا-كونتسەرتىنە ۇلاستى.
كورمەگە قويىلعان قولونەر بۇيىمدارى ەكى اپتا بويى تاراز قالاسىنىڭ تۇرعىندارى مەن قوناقتارىنىڭ نازارىنا ۇسىنىلماق.