بيىل اقتوبە وبلىسىندا 641 مىڭ گەكتار جەرگە ەگىن ەگۋ جوسپارلانعان. ەگىس القاپتارى 2016 جىلمەن سالىستىرعاندا 74,2 مىڭ گەكتارعا ۇلعاياتىن بولادى. ءداندى-داقىلدار ەگۋگە 383,9 گەكتار جەر بەلگىلەنگەن. اۋا رايى قولايلى بولعان جاعدايدا 480 مىڭ توننا استىق جينالادى دەپ بولجانۋدا.
قازىرگى تاڭدا اقتوبە قالاسى مەن وبلىس اۋداندارىندا ەگىن ەگۋ جۇمىستارى بەلسەندى جۇرۋدە. اۋىل شارۋاشىلىعى باسقارماسىنىڭ مالىمەتى بويىنشا وڭىردەگى اۋىل شارۋاشىلىق قۇرىلىمدارى كوكتەمگى دالالىق جۇمىستاردى جۇرگىزۋ ءۇشىن ساپالى تۇقىمدىق ماتەريالدارمەن, تەحنيكامەن جانە جانارمايمەن تولىقتاي قامتاماسىز ەتىلگەن. اتاپ ايتقاندا, قر اشم بولگەن 8,8 مىڭ توننا ارزانداتىلعان ديزەل وتىنى اقتوبەگە تولىق مولشەردە جەتكىزىلدى.
ايتا كەتۋ كەرەك, اۋا رايىنىڭ قولايسىزدىعىنا بايلانىستى وڭىردەگى ەگىن ەگۋ جۇمىستارى كەشەۋىلدەپ باستالدى. الايدا, قارعالى اۋدانىنىڭ شارۋالارى مامىر ايىنىڭ اياعىنا دەيىن بۇل جۇمىستى اياقتاپ ۇلگەرەتىندىكتەرىنە سەنىمدى. وبلىس اكىمىنىڭ اۋدانداعى ءىرى شارۋا قوجالىقتارىنىڭ وكىلدەرىمەن كەزدەسۋى كەزىندە سونداي-اق, ەگىستىككە ساپاسى ەكىنشى ساناتتان تومەن ەمەس تۇقىم سەبىلەتىندىگى ايتىلدى.
"ەڭ باستىسى – ەگىس سالۋ مەرزىمىن سوزباۋ, قازىر سىزدەر بار كۇشتەرىڭىز بەن قورلارىڭىزدى كوكتەمگى ەگىن ەگۋ ناۋقانىن ۋاقىتىندا اياقتاۋ ءۇشىن جۇمساۋلارىڭىز كەرەك. تۇقىمنىڭ ساپالى بولۋى – ءونىمدى مول الۋدىڭ كەپىلى. بۇل ماسەلە تالاي ايتىلدى. ەندىگى جاۋاپكەرشىلىك اۋدان اكىمىنەن سۇرالادى. ازىق-ت ۇلىك قاۋىپسىزدىگىن جۇزەگە اسىرۋدا نەگىزگى كۇش اۋىل اۋىل شارۋاشىلىعىنا تۇسەدى. سوندىقتان ءبىز ەگىس القاپتارىن ۇلعايتىپ, پايدالانىلماي جاتقان جەرلەردى قايتارىپ الۋ جۇمىستارىن جالعاستىرا بەرەتىن بولامىز. شارۋا قوجالىقتارى توپىراق قۇنارلىلىعىن ساقتاي وتىرىپ, تىڭايتقىشتاردى پايدالانۋ, القاپ ونىمدىلىگىن ارتتىرۋ, تەحنيكانى جاڭعىرتۋ جۇمىستارىمەن دە شۇعىلدانۋى ءتيىس. قازىرگى كەزدە وسى شارۋالاردىڭ بارلىعىنا مەملەكەتتىك قولداۋ تەتىكتەرى ەنگىزىلدى, ماسەلە – سولاردى ءتيىمدى پايدالانۋدا", دەپ اتاپ كورسەتتى وبلىس اكىمى.
بەردىبەك ساپارباەۆ سونىمەن قاتار, كوپ سالالى شارۋاشىلىقتاردىڭ دامۋى ءۇشىن مۇمكىندىكتەرى مول ەكەندىگىن ايتىپ, اۋىل شارۋاشىلىعى سالاسىندا ەڭبەك ەتەتىندەردىڭ ەگىنشىلىكپەن قاتار, مال شارۋاشىلىعىمەن دە اينالىسۋلارى قاجەت ەكەندىگىن ايتتى. اۋدان باسشىلىعىنا جۇمىس ىستەپ تۇرعان اۋىلشارۋاشىلىق كووپەراتيۆتەرىنىڭ تيىمدىلىگىن ارتتىرىپ, اۋىل شارۋاشىلىعىنىڭ وسى ءوڭىر ءۇشىن ءداستۇرلى ەمەس ءتۇرىن دامىتۋ شارالارىن قابىلداۋ تاپسىرىلدى.
كەزدەسۋ بارىسىندا پايدالانىلماعان سۋارمالى جەرلەردى يگەرۋ ماسەلەسى كوتەرىلدى. بيىل وبلىستاعى سۋارمالى جەرلەر الاڭىن 3,2 مىڭ گەكتاردان 21,5 مىڭ گەكتارعا دەيىن كەڭەيتۋ جوسپارلانۋدا.
"سۋارمالى جەرلەر قارعالى اۋدانىندا كوپ. وكىنىشكە قاراي, ولاردىڭ جالپى اۋماعىنىڭ 33%-ى عانا اينالىمدا. ءبىز ازىق-ت ۇلىكتى كوپ بەرۋگە مۇمكىندىگى بار سۋارمالى جەرلەر الاڭىن بارىنشا كەڭەيتىپ, مالدى جەم-شوپپەن قامتاماسىز ەتىپ, جۇمىس ورىندارىن قۇرۋىمىز كەرەك. جالپى, وبلىستىڭ باسقا اۋداندارىمەن سالىستىرعاندا سىزدەردە اۋىلشارۋاشىلىعىن جۇرگىزۋ ءۇشىن جاعداي جاقسى. ەگەر بارلىق الەۋەت پايدالانىلسا, قارعالى اۋدانى جالپى اقتوبە اۋماعىن نەگىزگى اۋىلشارۋاشىلىق ونىمدەرىمەن قامتاماسىز ەتەر ەدى", دەدى وبلىس اكىمى.
كەزدەسۋدى قورىتىندىلاعان بەردىبەك ساپارباەۆ وعان قاتىسۋشىلاردىڭ بارلىعىن, سونىڭ ىشىندە اۋدان باسشىلىعىن «تۋعان جەرگە تاعزىم» اكتسياسىنا قاتىسىپ, كوكتەمگى سۋ تاسقىنىنان زارداپ شەككەن اقتوبەلىكتەردىڭ باسپانامەن قامتىلۋىنا قولعابىس ەتۋگە شاقىردى.
جۇمىس ساپارى بارىسىندا ءوڭىر باسشىسى سونداي-اق, قارعالى اۋدانىنىڭ بىرنەشە ەلدى مەكەندەرىنىڭ تۇرعىندارىمەن كەزدەسىپ, اۋىلشارۋاشىلىق كووپەراتيۆتەرىنىڭ جۇمىسىمەن, بىرقاتار الەۋمەتتىك نىسانداردىڭ قۇرلىسىمەن تانىستى. سونىڭ ىشىندە, وبلىس اكىمى ش.قالداياقوۆ اۋىلىنداعى دارىگەرلىك امبۋلاتوريانىڭ قىزمەتىمەن تانىسىپ, مەكەمە باسشىلىعىنا جەدەل جاردەم كولىگىنىڭ كىلتىن تابىستادى.