ول العاشقى كەزدەرى نوۆو-پسكوۆسك جەرىندەگى اەرودروم قىزمەتىنىڭ 466-باتالونى قۇرامىندا ءتۇرلى مىندەتتەر اتقارادى. ياعني, ۇشاقتارعا جانارماي قۇيۋ, كولەمى ۇلكەن جىلجىمالى شام مەن فاشيستەرگە قارسى ستراتەگيالىق قارۋلاردى كۇتىپ ۇستاۋ قىزمەتىن ۇيىمداستىرۋ ىسىنە دە اننا ۆاسيلەۆنا ەر ازاماتتارشا اتسالىسادى.
كەيىننەن, 1943 جىلعا قاراي ا.پاۆلوۆا 16-شى اۋە ارمياسىنا اەرودرومدىق قىزمەت كورسەتۋشى 319-باتالونعا اۋىسادى. بۇل جەردە دە ول اسكەري تاپسىرمادان ورالعان ۇشاقتاردىڭ پۋلەمەتىن شەشىپ الىپ, تازالاپ, اۋىستىرىپ, ونىڭ لەنتاسىن وق-دارىمەن تولتىرۋ ىسىمەن تىنىمسىز اينالىسادى. ءتىپتى, ۇشاق اككۋمۋلياتورلارىن توق كوزىمەن قۋاتتاندىرۋ جۇمىستارى دە وسى ا.پاۆلوۆانىڭ مىندەتىنە كىرگەن ەكەن. قان مايدانداعى قارا جۇمىستى ۇلكەن جاۋاپكەرشىلىكپەن اتقارا ءجۇرىپ, اننا ۆاسيلەۆنا «مورزە» ءالىپبيىنىڭ نەگىزىن وقىپ, ۇيرەنەدى دە كوپ كەشىكپەي بايلانىسشى مىندەتىن اتقارۋعا كىرىسەدى.
دون, ستالينگراد, بەلارۋس مايداندارىنىڭ بەل ورتاسىندا بولعان اننا ۆاسيلەۆنا پولشانى ازات ەتىپ, بەرليندى الۋ كەزىندەگى قان قاساپقا دا قاتىسادى. جاستىق عۇمىرىنىڭ ءبىراز بولىگىن وق پەن وتتىڭ ورتاسىندا وتكىزگەن. اننا ۆاسيلەۆنا, ءتىپتى, رەيحستاگ قابىرعاسىنا ەسىمىن ءوز قولىمەن قىرناپ جازعان قىزداردىڭ ءبىرى ەكەن. ول مايداندا كورسەتكەن باتىلدىعى مەن ەرلىگى ءۇشىن ءىى دارەجەلى «وتان سوعىسى» وردەنىمەن, «بەرليندى العانى ءۇشىن», «ستالينگرادتى قورعاعانى ءۇشىن», ت.ب. مەدالدارمەن ماراپاتتالعان.
جانى جايساڭ بويجەتكەن قانداي قيىن كەزەڭدەر بولسا دا ۇنەمى جايدارى جۇرەتىن. ونىڭ مۇنداي مىنەزىنىڭ ۇشقىنىن قارۋلاستارى ونىڭ ولەڭ جازۋعا قۇشتارلىعىمەن بايلانىستىراتىن. ويتكەنى, سۇراپىل سوعىس جىلدارىنداعى ءبىر ساتتىك دەمالىس كەزىندە ساربازدار سىرناي تارتىپ, ءان سالىپ, بي بيلەيتىن. وسىندايدا اننا ۆاسيلەۆنا قاراپ قالماي, جۇرەك قىلىن شەرتەتىن نازىك يىرىمدەرگە تولى ولەڭدەرى مەن قوسا, وتتى ولەڭدەرىن دە وقىپ, جاۋىنگەرلەردىڭ جىگەرىن جانيتىن. وتانعا دەگەن سۇيىسپەنشىلىگىن وسىلايشا ولەڭ جولدارىنا سيعىزعان قىز, ۇلى جەڭىستىڭ جاقىنداۋىنا وزىندىك ۇلەسىن قوسقانى ءسوزسىز.
بەيبىت زامان ورناعان كەيىنگى جىلداردا اننا ۆاسيلەۆنا كوممۋنيستىك پارتيا قاتارىنا قابىلدانىپ, ەلى ءۇشىن ايانباي ەڭبەك ەتتى. سولاي دەسەك تە, ونىڭ ءومىرى «ۆ بوي يدۋت ودني ستاريكي» دەپ اتالاتىن كوركەم فيلممەن استاسىپ كەتكەندەي اسەر قالدىرادى. سەبەبى, سوعىس جىلدارىنداعى ۇشقىشتاردىڭ ءومىرى مەن ەرلىگىن باياندايتىن بۇل كينوداعى وقيعا جەلىسى كەيىپكەرىمىزدىڭ كوزبەن كورىپ, باستان وتكەرگەن وقيعالارى ەدى.
«مەنىڭ ءومىر جولىم وسى كينومەن ورىلگەندەي. ونى ءار كورگەن سايىن كوزگە جاس الماۋ مۇمكىن ەمەس. سول جىلداردا مەنىڭ جاستىق جالىنىم مەن بال-بۇل جايناعان بالعىن كۇندەرىم قالدى. بۇل كينوتۋىندى ماعان سونىسىمەن دە قىمبات», – دەيدى ا.پاۆلوۆا.
اننا ۆاسيلەۆنا تىڭ يگەرۋ جىلدارىندا ءبىزدىڭ ەلىمىزگە كەلىپ, تۇراقتاپ قالدى. پوشتا بايلانىس بولىمىندە زەينەتكەرلىك جاسقا دەيىن جۇمىس ىستەگەن ول بۇگىندە ءسوزى نىق, قيمىلى شيراق قارت مايدانگەرلەر قاتارىندا.
نۇرلىبەك دوسىباي, «ەگەمەن قازاقستان»
استانا