سوعىس ءبىتتى, جەڭىس جەتتى. جاۋىنگەرلەر ەلگە ورالىپ جاتتى. بىراق, سەرجانت نىعمەت ماحانوۆ اسكەر قاتارىندا قالا بەردى. وعان ۋكراينا جەرىندەگى كەڭەس وكىمەتىنە قارسى كۇشتەرمەن, ال ولاردىڭ اراسىندا سوعىس ۋاقىتىندا فاشيستەرمەن اۋىز جالاسقاندار كوپ بولاتىن, كۇرەسۋگە تۋرا كەلدى. ەلگە تەك 1951 جىلى عانا ورالدى. بەيبىت ەڭبەككە ارالاستى, ابىرويسىز بولعان جوق. قازىر اقساقال جەزدى كەنتىندە تۇرادى. ول − ۇلىتاۋ اۋدانى بويىنشا كوزى ءتىرى قالعان جالعىز مايدانگەر. ۇلى جەڭىستىڭ 72 جىلدىعىنا بايلانىستى اقساقالدى قۇتتىقتاۋعا اۋدان اكىمى ءانۋار ومار, اۋداندىق ءماسليحات حاتشىسى تالعات سەيىتجانوۆ باستاعان ازاماتتار ارنايى كەلدى. ارينە, قۇرقول كەلمەگەندەرى انىق. مايدانگەرگە 150 مىڭ تەڭگە سىياقى مەن كوممۋنالدىق شىعىندار ءۇشىن 80 مىڭ تەڭگە, ءۇيىن اعىمدىق جوندەۋ ماقساتىندا 50 مىڭ تەڭگە كومەك بەرىلدى. اقساقال اۋدان باسشىلىعىنا راحمەتىن ايتىپ, باتاسىن بەردى. − ءبىزدىڭ اقساقالداردىڭ سۇيەگى اسىل عوي, شىركىن. ولار الاقان جايىپ, كومەك سۇراۋدى ار سانايدى, باردى قاناعات تۇتۋدان ارىگە بارمايدى. ءۇيدىڭ شاتىرى دا, قورشاۋى دا جوندەۋدى قاجەتسىنەتىنى بايقالىپ تۇر. بۇل شارۋاعا شامامەن 600 مىڭ تەڭگەدەي كەرەك سەكىلدى. ارنايى ماماندار كەلىپ ەسەپتەيتىن بولادى. قانشا قاراجات كەرەك, سونشاسىن تابامىز. بالكىم, دەمەۋشىلەر تارتۋعا تۋرا كەلەر. نە بولعاندا دا, كەرەكتى قارجىنى تابۋ − ءبىزدىڭ مىندەتىمىز, − دەدى اقساقالدى قۇتتىقتاي كەلگەن اۋدان اكىمى. اكىمنىڭ بۇل ءسوزى ۇلىتاۋداعى جالعىز مايداگەردى بارىنشا قۇرمەتتەپ, قادىرلەۋدەن ۇلىتاۋلىقتاردىڭ ايانىپ قالمايتىنىن سەزدىردى.
ابدوللا داستانوۆ
قاراعاندى وبلىسى, ۇلىتاۋ اۋدانى