مىنە, بارىس بەينەلى بولاشاعىنا نىق قادام باسىپ كەلە جاتقان قازاقستان ءوز تاۋەلسىزدىگىنىڭ 20 جىلدىعىن قارسى العالى وتىر. تاريح ءۇشىن قاس-قاعىم ساتتەي بولىپ سانالاتىن وسىناۋ جىلدارى قازاق ەلى عاسىرلارعا پارا-پار الەۋمەتتىك-ەكونوميكالىق دامۋ كەزەڭىن ءوتكەردى. جاس ەگەمەن ەلىمىزدىڭ بەرىك ەكونوميكالىق تۇعىرىن جاساۋ ماقساتىندا بىرقاتار تاريحي مەملەكەتتىك باعدارلامالار قابىلدانىپ, جۇزەگە اسىرىلدى جانە اسىرىلىپ تا جاتىر. وسى ورايدا ەل ەكونوميكاسىنىڭ جاڭا سيپاتىن جاسايتىن 2020 جىلعا دەيىنگى ۇدەمەلى يندۋستريالىق-يننوۆاتسيالىق دامۋ جانە تۇرعىن ءۇي-كوممۋنالدىق شارۋاشىلىعىن (تكش) جاڭعىرتۋ باعدارلامالارىن ەرەكشە اتاپ وتكەن ءجون. سوڭعى جىلدارى ەلىمىزدە تۇرعىن ءۇي قورى بۇرىن-سوڭدى بولماعان قارقىنمەن ءوستى. استانا قالاسىنىڭ وزىندە سوڭعى كەزەڭدە جىلىنا 1 ميلليون 300 مىڭ شارشى مەترگە جۋىق تۇرعىن ءۇي پايدالانۋعا بەرىلىپ كەلەدى. ازاماتتاردى قولجەتىمدى تۇرعىن ۇيمەن قامتاماسىز ەتۋدە استانا قالاسىندا كەڭ ءورىس العان پاتەرلەردى مەملەكەتتىك جالعا بەرۋ ءۇردىسى دە استانالىقتاردىڭ تۇرمىس جاعدايىن جاقسارتۋدىڭ ۇتىمدى تەتىگى بولىپ تابىلادى. وسىعان بايلانىستى استانا قالاسىنداعى تابىسى تومەن ازاماتتاردىڭ ارەندالىق پاتەرلەرمەن قامتاماسىز ەتىلۋ جاعدايىن, تكش-نى جاڭعىرتۋ باعدارلاماسى مەن جىلجىمايتىن م ۇلىك رىنوگىنداعى احۋالدى ءبىلۋ ماقساتىندا «قالالىق جىلجىمايتىن م ۇلىك» مكك ديرەكتورى بەيبىتجان تۇياقپاەۆتى اڭگىمەگە تارتقان ەدىك.
– بەيبىتجان شيپاتاي ۇلى, مەملەكەت باسشىسىنىڭ تىكەلەي باستاماسىمەن ەلىمىزدە قۇرىلىس يندۋسترياسى, ونىڭ ىشىندە تۇرعىن ءۇي قۇرىلىسى قارقىندى دامۋ ساتىسىنا شىقتى. وسى ورايدا, تۇرعىن ءۇي قۇرىلىسى سالاسىنداعى احۋالدى قالاي باعالايسىز؟
– ادامنىڭ تۇرمىس دەڭگەيىنىڭ ساپاسىن ايقىندايتىن نەگىزگى جەتىستىكتەردىڭ ءبىرى – قولايلى باسپانا بولىپ تابىلادى. ەل پرەزيدەنتى نۇرسۇلتان نازارباەۆ «بولاشاقتىڭ ىرگەسىن بىرگە قالايمىز» اتتى بيىلعى جولداۋىندا «ازاماتتاردىڭ ءومىر ساپاسىنىڭ وزىق كورسەتكىشى – تۇرعىن ءۇي جايلىلىعىنىڭ دەڭگەيى» دەپ اتاپ كورسەتكەن بولاتىن. سونىمەن بىرگە, مەملەكەت باسشىسى ەل ۇكىمەتىنىڭ الدىنا تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋ, سۋمەن, جىلۋمەن, ەلەكتر جانە گازبەن قامتاماسىز ەتۋ جۇيەلەرىن جاڭعىرتۋ, جالپى, تۇرعىن ءۇي قاتىناسىنىڭ وڭتايلى مودەلىن قۇرۋ مىندەتىن قويدى.
ەلىمىزدە الەۋمەتتىك-ەكونوميكالىق قايتا قۇرۋلار بارىسىندا جان-جاقتى دامىعان تۇرعىن ءۇي رىنوگى قالىپتاستى. تۇرعىنداردىڭ ەكونوميكالىق بەلسەندىلىگى ارتۋدا. تەك سوڭعى ون جىل ىشىندە عانا تۇرعىن ءۇي قورى 30 ميلليون شارشى مەترگە ءوستى. 2008-2010 جىلدارعا ارنالعان مەملەكەتتىك تۇرعىن ءۇي باعدارلاماسى شەڭبەرىندە تەك استانا قالاسىنىڭ وزىندە عانا 5612 ادام قولجەتىمدى پاتەرلەرمەن قامتاماسىز ەتىلدى. ۇستىمىزدەگى جىلدىڭ وتكەن 7 ايىندا ەلوردادا بارلىق قارجىلاندىرۋ كوزدەرى بويىنشا جالپى اۋدانى 844 369 شارشى مەتر تۇرعىن ءۇي نەمەسە 7713 پاتەر پايدالانۋعا بەرىلدى. مەملەكەتتىك تۇرعىن ءۇي باعدارلاماسى بيىلعى جىلى دا قارقىندى جالعاسىن تاباتىن بولادى. قازاقستان رەسپۋبليكاسىنىڭ 2020 جىلعا دەيىنگى دامۋ ستراتەگياسىندا تابىسى تومەن ازاماتتاردى قولجەتىمدى تۇرعىن ءۇيمەن قامتاماسىز ەتۋ ماقساتىنداعى الەۋمەتتىك شارالار ەرەكشە كورىنىس تاپقان.
– «قالالىق جىلجىمايتىن م ۇلىك» مكك-عا جۇكتەلگەن باستى مىندەتتەردىڭ ءبىرى مەملەكەتتىك كوممۋنالدىق تۇرعىن ءۇي قورىنان بولىنەتىن پاتەرلەردى ازاماتتارعا جالعا بەرۋ تەتىگىن رەتتەۋ بولىپ تابىلادى. ارەندالىق تۇرعىن ءۇي سەكتورى – ەلىمىزدەگى تۇرعىن ءۇي قورىنىڭ جاڭا ۇلگىسى. قازاقستاندا ارەندالىق تۇرعىن ءۇي سەكتورى قالاي قالىپتاسۋدا؟
– بارىمىزگە بەلگىلى, مەملەكەت باسشىسى ەلىمىزدە ارەندالىق تۇرعىن ءۇي سالاسىن دامىتۋ ماسەلەسىنە ۇنەمى باسىمدىق بەرىپ كەلەدى. قازىرگى كەزدە قازاقستانداعى ارەندالىق تۇرعىن ءۇي سەكتورى بۇل قىزمەت ءتۇرىن كورسەتەتىن نەگىزگى ءۇش باعىتتا ايقىندالادى. بۇل – بىرىنشىدەن, جەكە مەنشىك تۇرعىن ءۇي رىنوگى. ول ستيحيالىق سۇرانىسپەن رەتتەلەدى جانە الىپساتارلىق سيپات العان. سەبەبى, پاتەرگە دەگەن سۇرانىس وتە جوعارى. ماسەلەن, بۇگىندە استانا جانە الماتى قالالارىندا جەكە مەنشىك سەكتور جالعا بەرەتىن پاتەرلەردىڭ ءبىر ايلىق اقىسى ورتا ەسەپپەن 70 مىڭ تەڭگەدەن اينالادى. ارەندالىق تۇرعىن ءۇي سەكتورىنىڭ ەكىنشى ويىنشىسى – نەگىزىنەن «سامۇرىق-قازىنا» ۇاق تاراپىنان كورسەتىلەتىن مەملەكەت-جەكە مەنشىك سەرىكتەستىگى بولىپ تابىلادى. بۇل سەرىكتەستىك نەگىزىنەن جۇمسالعان قارجىنى قايتارۋ ماقساتىندا كوممەرتسيالىق باعىتتى ۇستانادى. سوندىقتان ونىڭ پاتەرلەردى جالعا بەرۋ باعاسى دا جوعارى. ماسەلەن, بۇل پاتەرلەردىڭ ءبىر ايلىق جالعا بەرۋ قۇنى 90 مىڭ تەڭگەدەن اينالادى. ارەندالىق تۇرعىن ۇيمەن جابدىقتاۋدىڭ بۇل ءتۇرى تابىسى شەكتەۋلى تۇرعىنداردىڭ باسىم بولىگى ءۇشىن ءتيىمسىز. بۇل قىزمەت ءتۇرىن كوپ رەتتە تابىسى جوعارى ۇلتتىق كومپانيالاردىڭ قىزمەتكەرلەرى نەمەسە ورتا قول كاسىپكەرلەر عانا پايدالانادى. ارەندالىق تۇرعىن ءۇي سەكتورىنىڭ جالپىعا ءتيىمدى ءۇشىنشى ويىنشىسى – كوممۋنالدىق كاسىپورىن سيپاتىندا قىزمەت كورسەتەتىن مەملەكەت بولىپ تابىلادى. مەملەكەت تاراپىنان كورسەتىلەتىن ارەندالىق تۇرعىن ءۇي قىزمەتى ءتيىمدى ءارى قولجەتىمدى. ماسەلەن, استانا قالاسىندا جالعا بەرىلەتىن ارەندالىق پاتەرلەردىڭ اقىسى ايىنا 14500 تەڭگەدەن اينالادى. اسىرەسە, بيۋدجەتتىك سالا قىزمەتكەرلەرى ءۇشىن قولجەتىمدى پاتەرگە يە بولۋدىڭ ءتيىمدى تەتىگى وسى.
شەتەلدەردە ارەندالىق پاتەرلەر جالپى تۇرعىن ءۇي قورىنىڭ 40 پايىزىن قامتيدى. ال قازاقستاندا بۇل سەكتور قالالارداعى جالپى تۇرعىن ءۇي قورىنىڭ 2-3 پايىزىن عانا قۇرايدى. مىنە, ينۆەستيتسيا سالۋدىڭ يگەرىلمەي جاتقان ۇلكەن ءبىر سالاسى. بۇل رىنوك جەرگىلىكتى دارەجەدەگى مۋنيتسيپالدىق ورگاندارمەن رەتتەلەدى. كەز كەلگەن مەملەكەتتە تابىس كوزىنىڭ از بولۋىنا بايلانىستى جەكە مەنشىك پاتەرگە يە بولا المايتىن ادامدار بارشىلىق. بۇل توپقا نەگىزىنەن جاس وتباسىلار, جاس ماماندار, بيۋدجەتتىك سالا قىزمەتكەرلەرى جانە تاعى باسقالار جاتادى.
– ەندى قالامىزداعى جالعا بەرىلەتىن پاتەرلەر قورى جانە ولاردىڭ بەرىلۋ ءتارتىبى تۋرالى ايتىپ وتسەڭىز.
– استانا قالاسىنىڭ اكىمدىگى ەلوردانىڭ ەرەكشەلىكتەرىن ەسكەرە كەلىپ, باس قالانىڭ بەدەلىن ارتتىرۋ, مۇنداعى مادەنيەت, ونەر سالاسىنىڭ ەليتالارىن قالىپتاستىرۋ, دەنساۋلىق ساقتاۋ, ءبىلىم بەرۋ, مادەنيەت جانە سپورت سالالارىن جوعارى كاسىبي بىلىكتى ماماندارمەن قامتاماسىز ەتۋ ماقساتىندا 2005 جىلى ارناۋلى قاۋلىمەن مەملەكەتتىك كوممۋنالدىق تۇرعىن ءۇي قورىن باسقارۋ ءۇشىن «استانا قالاسى تۇرعىن ءۇي باسقارماسى» مەملەكەتتىك مەكەمەسىنىڭ شارۋاشىلىق ءجۇرگىزۋ قۇقىعى بار ورگانى رەتىندە «قالالىق جىلجىمايتىن م ۇلىك» مەملەكەتتىك كوممۋنالدىق كاسىپورنىن قۇردى. كاسىپورىن مەملەكەتتىك ارەندالىق تۇرعىن ءۇيدى باسقارۋشى سۋبەكت رەتىندە, استانا قالاسىنىڭ مەملەكەتتىك كوممۋنالدىق تۇرعىن ءۇي قورىن باسقارۋدىڭ تيىمدىلىگىن جەتىلدىرۋ ماقساتىندا مەملەكەتتىك كوممۋنالدىق قوردان بولىنەتىن پاتەرلەردى جالعا بەرۋ جانە ارەندالىق اقىلاردى جيناۋ قىزمەتىمەن اينالىسادى.
مەملەكەت باسشىسىنىڭ تىكەلەي تاپسىرماسىمەن ارەندالىق تۇرعىن ءۇي سەكتورىن دامىتۋ ماقساتىندا استانا قالاسىنىڭ اكىمدىگى 2008-2010 جىلدارعا ارنالعان مەملەكەتتىك تۇرعىن ءۇي باعدارلاماسى اياسىندا 6083 پاتەر ساتىپ الدى. بۇل پاتەرلەر كەزەكتە تۇرعان از قامتاماسىز ەتىلگەن ازاماتتاردى, مەملەكەتتىك قىزمەتكەرلەردى, بيۋدجەتتىك ۇيىمداردىڭ ەڭبەككەرلەرىن سونىمەن بىرگە, ورتالىق مەملەكەتتىك ورگانداردىڭ قىزمەتكەرلەرىن ارەندالىق پاتەرلەرمەن قامتاماسىز ەتۋگە ارنالعان. بۇل پاتەرلەر مەملەكەتتىك كوممۋنالدىق تۇرعىن ءۇي قورىن قۇرايدى.
قازىرگى كەزدە كاسىپورىننىڭ كوممۋنالدىق تۇرعىن ءۇي قورىندا 2050 ارەندالىق ءپاتەر بار. ونىڭ ىشىندە 1006 پاتەر ۇكىمەتتىڭ ارناۋلى قاۋلىسىمەن ورتالىق مەملەكەتتىك ورگانداردىڭ قىزمەتكەرلەرىنە, 120 پاتەر بۇرىن مەكتەپ جاسىنا دەيىنگى بالالار مەكەمەلەرىندە تۇرىپ كەلگەن قورعانىس, ىشكى ىستەر مينيسترلىكتەرىنىڭ جانە باسقا ورگانداردىڭ قىزمەتكەرلەرىنە بەرىلدى. وسى كوممۋنالدىق تۇرعىن ءۇي قورىنان 105 پاتەر ۇلى وتان جانە اۋعان سوعىسىنا قاتىسۋشىلارعا, الەۋمەتتىك جاعىنان از قورعالعان ازاماتتارعا بەرىلسە, كوممۋنالدىق تۇرعىن ءۇي قورىنا بولىنگەن ارەندالىق پاتەرلەر بيۋدجەتتىك سالادا قىزمەت ىستەيتىن دارىگەرلەرگە, مۇعالىمدەرگە, مادەنيەت جانە سپورت سالاسىنىڭ ەڭبەككەرلەرىنە بەرىلدى. بۇل تۇرعىن ءۇي قورىن بولۋدە الەۋمەتتىك ادىلەتتىك قاعيداتتارى ساقتالعان. ارەندالىق تۇرعىن ءۇي سەكتورىن قالىپتى جاعدايدا ۇستاۋ جانە بۇل سالانىڭ جۇمىسىن ودان ءارى دامىتۋ ماقساتىندا كاسىپورىن بەلگىلەنگەن تارتىپكە ساي جۇيەلى دە تۇراقتى جۇمىس جۇرگىزىپ كەلەدى.
– بەيبىتجان شيپاتاي ۇلى, قالالىق جىلجىمايتىن م ۇلىك نىساندارىنا بايلانىستى وپەراتسيالار مەن ساراپتامالار قالاي ءجۇرگىزىلەدى؟
– مەملەكەتتىك م ۇلىكتى باسقارۋ ەرەجەلەرىنە سايكەس كاسىپورىن ءوزىنىڭ ناقتى ءتاجىريبە جۇزىندەگى قىزمەتىندە بىرقاتار وڭ جەتىستىكتەرگە قول جەتكىزدى. اتاپ ايتقاندا, كاسىپورىن ەلوردامىزدىڭ ينفراقۇرىلىمىن جاقسارتۋ جۇمىستارىنا ايتارلىقتاي ۇلەس قوستى. بىرقاتار جىلدار بويى كاسىپورىن مەملەكەت ءمۇددەسى ءۇشىن جەر تەلىمدەرىن بوساتۋ جانە ىڭعايلاۋ مىندەتىمەن شۇعىلدانىپ كەلەدى. استانا قالاسىنىڭ ماڭىزدى قۇرىلىس نىساندارىن سالۋعا جانە ينجەنەرلىك ينفراقۇرىلىمىن دامىتۋ ماقساتىنداعى قۇرىلىس نىساندارىن جۇرگىزۋگە قالانىڭ باس جوسپارى شەڭبەرىندە بىرقاتار كەشەندى جۇمىستار جۇزەگە اسىرىلدى. ماسەلەن, «ابۋ دابي پلازا» كوپ فۋنكتسيالى كەشەنىن, قورعالجىن تاس جولى بويىنداعى 300 ورىندىق مامانداندىرىلعان كاسىبي-تەحنيكالىق ليتسەيدىڭ عيماراتىن, كۇمىسبەكوۆ اتىنداعى كوشە بويىنداعى كارىزدىك ناسوس ستانساسىنىڭ قۇرىلىسىن جۇرگىزۋ ءۇشىن جەر تەلىمدەرىن بوساتۋ مىندەتتەرىن جۇزەگە اسىردى.
سونىمەن بىرگە, استانا قالاسىنىڭ مادەني-الەۋمەتتىك قۇرىلىمىنا كورىك بەرەتىن كلاسسيكالىق وپەرا جانە بالەت تەاترىنىڭ عيماراتىن, «حەيليبەري-استانا» مەكتەبىنىڭ قۇرىلىسىن, 350 ورىندىق كوپ ءپروفيلدى قالالىق بالالار اۋرۋحاناسىنىڭ, ءبىر اۋىسىمدا 250 ادامعا قىزمەت كورسەتەتىن دياگنوستيكالىق ەمحاناسىنىڭ, ەسىل وزەنىنىڭ سول جاعالاۋىنداعى 250 ورىندىق جۇقپالى اۋرۋلار اۋرۋحاناسىنىڭ جانە باسقا الەۋمەتتىك نىساندار مەن دەنساۋلىق ساقتاۋ مەكەمەلەرىنىڭ قۇرىلىسىن جۇرگىزۋگە جەر تەلىمدەرىن دايىنداپ, ولاردىڭ پايدالانۋ قۇجاتتارىن جاسادى. سول سياقتى ەلوردانىڭ ينفراقۇرىلىمىن دامىتۋ ماقساتىندا كوشەلەر مەن كولىك جولدارىن قايتا قۇرۋ جۇمىستارىن جۇرگىزۋدە ينجەنەرلىك قۇرىلىس جۇمىستارىن اتقارۋ ءۇشىن مۇمكىندىكتەر تۋعىزدى. جالپى العاندا, مەملەكەت مۇددەسى ءۇشىن ماڭىزدى قۇرىلىس نىساندارىن سالۋعا جەر تەلىمدەرىن بوساتۋ جانە دايىنداۋدا 2010 جىلى 5,7 ميلليارد تەڭگەنىڭ جۇمىسى اتقارىلدى. ال 2011 جىلى مەملەكەت ءمۇددەسى ءۇشىن جەر تەلىمدەرىن بوساتۋ جانە دايىنداۋ شەڭبەرىندە اتقارىلاتىن جۇمىس 6,5 ميلليارد تەڭگەنى قۇرايدى دەپ جوسپارلانۋدا. استانا قالاسىنىڭ ساۋلەت جانە قۇرىلىس سالاسىن ودان ءارى دامىتۋ ماقساتىنداعى مەملەكەت باسشىسى جۇكتەگەن تاپسىرمالاردى ورىنداۋ ءۇشىن كاسىپورىن الدىندا باسقا دا ۇلكەن مىندەتتەر بارشىلىق.
– ەلباسىنىڭ بيىلعى جولداۋىنان تۋىندايتىن مىندەتتەرگە سايكەس ەلىمىزدىڭ تۇرعىن ءۇي-كوممۋنالدىق شارۋاشىلىعىن جاڭعىرتۋدىڭ 2011-2020 جىلدارعا ارنالعان باعدارلاماسى قابىلداندى. ءسىز باسقارىپ وتىرعان مەكەمەگە دە بۇل رەتتە ۇلكەن مىندەتتەر جۇكتەلگەن. وسى ماڭىزدى باعدارلاما اياسىندا اتقاراتىن جۇمىستارىڭىز قانداي؟
– ءيا, تكش-نى جاڭعىرتۋ باعدارلاماسى ءبىزدىڭ كاسىپورىنعا جاڭا مىندەتتەر مەن تىڭ ماقساتتار جۇكتەيدى. باستى مىندەت: كوپ قاباتتى ۇيلەرگە كۇردەلى جوندەۋ جۇرگىزگەن كەزدە جەكەلەگەن جۇمىس تۇرلەرى بويىنشا كوندومينيمۋم نىساندارىنا قىزمەت كورسەتۋ, كوندومينيمۋم نىساندارىن جوندەۋ جۇمىستارىن قايتارىمدى نەگىزدە قارجىلاندىرۋ تەتىكتەرىن جاساۋ. كاسىپورىن بۇل رەتتە كوپ قاباتتى ۇيلەردەگى پاتەر يەلەرىن ورتاق م ۇلىككە ۇقىپتىلىق كوزقاراسقا بەيىمدەي وتىرىپ, ولاردىڭ بويىندا وزدەرىنىڭ تۇرعىن ءۇي جاعدايىن جاقسارتۋعا بەتبۇرىس جاساۋ يدەولوگياسىن قالىپتاستىرۋدى ۇستانادى.
كوپ قاباتتى تۇرعىن ۇيلەردى كۇردەلى جوندەۋدەن وتكىزۋ قارساڭىندا قالالاردا جەكە قۇرىلىم رەتىندە تۇرعىن ءۇي ينسپەكتسيالارىن قۇرۋ كەرەك. قازىرگى كەزدە جوندەۋ جۇمىستارىن جۇرگىزۋ كەزىندە بىرقاتار پروبلەمالار ورىن الۋدا. اتاپ ايتقاندا, وسى جۇمىستى جۇرگىزۋ مىندەتى تاپسىرىلعان اۋداندىق اكىمدىكتەر ۇيلەرگە كۇردەلى جوندەۋ جۇمىستارىن جۇرگىزۋدىڭ تەحنيكالىق العىشارتتارىن كاسىبي نەگىزدە ۇيىمداستىرا المايدى. بۇل جەرگىلىكتى جەرلەردە كاسىبي تەحنيكالىق كادرلاردىڭ جەتىسپەۋىنەن تۋىنداپ وتىر. سوندىقتان كوپ قاباتتى ۇيلەردى كۇردەلى جانە اعىمداعى جوندەۋدەن وتكىزۋ الدىندا تۇرعىن ءۇي ينسپەكتسيالارى جان-جاقتى تەكسەرۋى كەرەك.
2003 جىلى «استانا قالاسى تۇرعىن ءۇي دەپارتامەنتى» مەكەمەسىنىڭ جانىنان ءبىز وسىنداي تۇرعىن ءۇي ينسپەكتسياسىن قۇردىق. بۇل ينسپەكتسيا وسى جىلدار ىشىندە قالاداعى تۇرعىن ءۇي قورىن تولىق پاسپورتتاۋدان وتكىزدى. قازىرگى ۋاقىتتا قالامىزداعى ءاربىر تۇرعىن ءۇي نىسانىنىڭ پايدالانۋعا بەرىلگەن جىلى, كونسترۋكتسياسى, قۇرىلىسقا پايدالانىلعان ماتەريالدارى, نىساننىڭ اۋماعى, ونىڭ پايدالانۋعا جارامدىلىعى انىقتالعان قۇجاتى بار. وكىنىشكە وراي, مۇنداي تۇرعىن ءۇي قورىنىڭ تولىق جاعدايىن كورسەتەتىن قۇجاتتار جاساعان تۇرعىن ءۇي ينسپەكتسياسى استانا قالاسىنان باسقا قالالاردا قۇرىلماعان. سوندىقتان تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى شەڭبەرىندە وسىنداي ينسپەكتسيالار قۇرىلسا, نۇر ۇستىنە نۇر بولماق.
تاعى ءبىر شۇعىل شەشىمدى قاجەت ەتىپ تۇرعان پروبلەما تۋرالى ايتپاي كەتۋگە بولمايدى. بۇل – تەحنيكالىق ينۆەنتاريزاتسيا قۇجاتتارىن, سونىمەن بىرگە تەحنيكالىق مۇراعاتتاردى جەرگىلىكتى اتقارۋ ورگاندارىنا قايتارۋ ماسەلەسى. ءاربىر قالانىڭ ءوز اكىمشىلىك اۋماعىنداعى بارلىق نىسانداردىڭ سانى, تەحنيكالىق جاعدايى تۋرالى جان-جاقتى اقپاراتى بولۋى كەرەك. بۇل وسى نىساندار بويىنشا قايسىسىنا كۇردەلى ءجوندەۋ جۇرگىزۋ, قايسىسىن جاڭعىرتۋ, قايسىسىنىڭ جارامسىز بولىپ قالۋىنا بايلانىستى بۇزۋ جانە باسقا اعىمدىق جۇمىستاردى جوسپارلاۋ ءۇشىن اۋاداي قاجەت. مىنە, وسى تەحنيكالىق مۇراعاتتاردىڭ بارلىعى ەلىمىزدە 2007 جىلى «جىلجىمايتىن م ۇلىك قۇقىعىن جانە ولارمەن جاسالاتىن اۋىس-تۇيىستەردى تىركەۋ تۋرالى» زاڭ قابىلدانعاننان كەيىن ادىلەت مينيسترلىگىنىڭ قۇزىرىنا ءوتىپ كەتتى. ياعني, جەرگىلىكتى اتقارۋشى ورگانداردىڭ كۇندەلىكتى جۇمىسىنا قاجەتتى مۇراعات ادىلەت ۆەدومستۆولارىنىڭ ساندىعىنا سالىندى. وسىنداي ۆەدومستۆوارالىق «جىلىكتىڭ مايلى باسىن وزىنە تارتۋ» ارەكەتى سالدارىنان استانا قالاسىندا تەحپاسپورتتار دايىنداۋ ىسىمەن ءبىر عانا ايماقتىق قۇرىلىم اينالىساتىن بولدى (بۇرىن استانا قالاسىندا بۇل قىزمەت تۇرىمەن 70 شاعىن بيزنەس سۋبەكتىسى جانە 4 مەملەكەتتىك كاسىپورىن اينالىساتىن). ول ءىس جۇزىندە سالىنعان قۇرىلىس نىساندارىنىڭ تەحنيكالىق قۇجاتتارىن دايىنداپ ءۇلگەرە المايدى. بۇل ءوز كەزەگىندە, تۇرعىن ءۇي, ءبىلىم بەرۋ, بالاباقشا, دەنساۋلىق سالالارى قۇرىلىسىنداعى بارلىق مەملەكەتتىك باعدارلامالاردى ءىس جۇزىنە اسىرۋدا قولبايلاۋ بولۋدا. بۇل جەكە مەنشىك قۇرىلىس جانە بيزنەس نىساندارىن سالۋدا كەدەرگىلەر تۋىنداتىپ, «جەڭ ۇشىنان جالعاسقان» سىبايلاستىققا ۇرىندىرۋدا. سوندىقتان تەحنيكالىق ينۆەنتاريزاتسيا مۇراعاتتارى مەن تەحپاسپورتتار دايارلاۋ مىندەتىن جەرگىلىكتى اتقارۋ ورگاندارىنا جەدەل قايتادان بەرۋ قاجەت.
تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى ۇزاق مەرزىمگە ارنالعان اۋقىمدى دا كەشەندى جۇمىس. بۇل باعدارلاما شەڭبەرىندە ءبىزدىڭ كاسىپورىنعا بىرقاتار جاۋاپتى مىندەتتەر جۇكتەلىپ وتىر. «قالالىق جىلجىمايتىن م ۇلىك» مكك وسىعان لايىق ءبىلىمدى دە بىلىكتى كادرلارمەن جاساقتالعان. كاسىپورىنىمىزدا بۇل ماڭىزدى باعدارلامانى جۇرگىزۋ ماقساتىندا كوندومينيمۋم نىساندارىنا تەحنيكالىق جانە ادىستەمەلىك كومەك كورسەتۋدىڭ تولىق ءمۇمكىندىكتەرى بار.
– اڭگىمەڭىزگە راحمەت.
اڭگىمەلەسكەن جىلقىباي جاعىپار ۇلى.