الماتى قالاسىنداعى يننوۆاتسيالىق تەحنولوگيالار پاركى ارنايى ەكونوميكالىق ايماعىندا ۇلتتىق كرەمني كلاستەرىن دامىتۋعا ارنالعان جوبانى ىسكە اسىرۋ ماقساتىندا ۋاقىت كاپسۋلاسى ورناتىلدى, دەپ حابارلايدى Egemen.kz.
سالتاناتتى شارادا پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ كرەمني سالاسىن دامىتۋ ەلىمىزدىڭ جوعارى تەحنولوگيالى ونەركاسىبىن قالىپتاستىرۋدىڭ, ەنەرگەتيكالىق وتپەلى كەزەڭدى قامتاماسىز ەتۋدىڭ جانە ەلدىڭ تەحنولوگيالىق ەگەمەندىگىن نىعايتۋدىڭ ستراتەگيالىق نەگىزى ەكەنىن اتاپ ءوتتى.
«مەملەكەت باسشىسى ق.توقاەۆ حالىققا جولداۋىندا بەلگىلەگەن ەكونوميكانى ءارتاراپتاندىرۋ, جاڭارتىلاتىن ەنەرگيا كوزدەرىن دامىتۋ جانە تاۋ-كەن مەتاللۋرگيا كەشەنى اياسىندا جوعارى تەحنولوگيالى وندىرىستەردى ىسكە قوسۋ جونىندەگى تاپسىرمالارعا تولىق سايكەس كەلەتىنىن اتاپ ءوتتى. ەلىمىزدە جارتىلاي وتكىزگىشتىك كرەمني وندىرۋگە ارنالعان نەگىزگى شيكىزات – كۆارتستىڭ 40 ميلليون توننادان استام قورى بار. بۇل ەلىمىزدە شيكىزاتتى وندىرۋدەن باستاپ مونوكريستالدىق كرەمني قۇيمالارىن, جارتىلاي وتكىزگىش پلاستينالاردى جانە كۇن مودۋلدەرىن شىعارۋعا دەيىنگى تولىق تەحنولوگيالىق تىزبەكتى قالىپتاستىرۋعا بىرەگەي مۇمكىندىك بەرەدى. «كريتيكالىق ماتەريالدار ءوندىرىسى» جوباسى اياسىندا مونوكريستالدىق كرەمني قۇيمالارى مەن جارتىلاي وتكىزگىش فوتوەلەكترلىك پلاستينالار شىعاراتىن زاۋىت سالۋ, سونداي-اق كريستالل ءوسىرۋ جانە جارتىلاي وتكىزگىشتىك ينجينيرينگ زەرتحاناسىن قۇرۋ كوزدەلگەن», دەپ اتاپ ءوتتى ا.كۇرىشباەۆ.
پرەمەر-مينيستر ولجاس بەكتەنوۆتىڭ توراعالىعىمەن ەتكەن كەڭەستە كرەمني سالاسىن دامىتۋ ماسەلەلەرىنە ەرەكشە نازار اۋدارىلدى. ونىڭ بارىسىندا ۇلتتىق كرەمني كلاستەرى جوباسى مەملەكەت باسشىسىنىڭ تاپسىرمالارى اياسىندا جۇزەگە اسىپ جاتقاندىعى, ۋاكىلەتتى مەملەكەتتىك ورگاندارمەن كەلىسىلگەندىگى ايتىلدى. ماقساتى – كريتيكالىق ماتەريالدار يمپورتىنا تاۋەلدىلىكتى تومەندەتۋ, كۇن ەنەرگەتيكاسىن, ميكروەلەكترونيكانى جانە فوتونيكانى دامىتۋ, جاڭا جۇمىس ورىندارىن قۇرۋ, ەلدىڭ ەكسپورتتىق الەۋەتىن ارتتىرۋ سياقتى مىندەتتەردى شەشۋ. وسى ورايدا ۇلتتىق عىلىم اكادەمياسىنىڭ باسىم عىلىمي-تەحنولوگيالىق جوبالاردى ىسكە اسىرۋداعى, ناتيجەسىن ەكونوميكانىڭ ناقتى سەكتورىنا ەنگىزۋدەگى ءرولى تۋرالى ايتىلدى.
كرەمني كلاستەرىن دامىتۋدا ۇلتتىق عىلىم اكادەمياسى عىلىمي قولداۋ شارالارىن, وزىق تەحنولوگيالاردى ەنگىزۋ, ىرگەلى جانە قولدانبالى زەرتتەۋلەر جۇرگىزۋدى, جوعارى بىلىكتى كادرلار دايارلاۋدى, R&D-ينفراقۇرىلىمدى دامىتۋدى, پاتەنتتەر الۋمەن قاتار حالىقارالىق عىلىمي باسىلىمداردا ناتيجەلەردى جاريالاۋدى قامتاماسىز ەتەتىن بولادى.
قازىرگى كەزدە عىلىم, مەملەكەت جانە بيزنەس اراسىنداعى ۇزاق مەرزىمدى يندۋستريالىق جانە يننوۆاتسيالىق ناتيجەگە باعىتتالعان كەشەندى ءوزارا ءىس-قيمىل مودەلى قالىپتاسىپ جاتىر. ۇلتتىق كرەمني كلاستەرى ەلىمىزدىڭ ونەركاسىپتىك جانە عىلىمي-تەحنولوگيالىق دامۋىنىڭ نەگىزگى درايۆەرىنىڭ بىرىنە اينالادى. ال زەرتحانانىڭ اشىلۋى مەن ءوندىرىستىڭ ىسكە قوسىلۋى ەلىمىزدىڭ تەحنولوگيالىق تاۋەلسىزدىگىنە, ورنىقتى دامۋىنا جانە بولاشاعىنا سالىنعان ستراتەگيالىق ينۆەستيتسيا بولىپ تابىلادى.