الماتىدا ايەلدەر كاسىپكەرلىگىن دامىتۋعا باعىتتالعان ەڭ اۋقىمدى ءارى تۇراقتى باستامانىڭ ءبىرى – Coca-Cola Belesteri الەۋمەتتىك جوباسىنىڭ 13-ماۋسىمى قورىتىندىلاندى. ۇزدىك بيزنەس-يدەيا يەلەرى Women in Business جىل سايىنعى فورۋمى اياسىندا ماراپاتتالدى, دەپ حابارلايدى Egemen.kz.
ء«وسۋ باسپالداقتارى» اتاۋىمەن تانىلعان جوبا باستاۋشى كاسىپكەرلەرگە ارنالعان كەشەندى ءبىلىم بەرۋ باعدارلاماسى سانالادى. بيىل باستاما 13-ءشى رەت ۇيىمداستىرىلدى. وعان حالىقارالىق قايىرىمدىلىق قور قولداۋ كورسەتتى. باعدارلاما قۇرىلىمىندا ونلاين وقۋ, گرانت قاراستىرىلعان بيزنەس-يدەيالار بايقاۋى, اكسەلەراتسيالىق كەزەڭ بار. قاتىسۋشىلار يدەيانى پىسىقتاۋدان باستاپ نارىققا شىعۋعا دەيىنگى جولدى يگەرەدى. نەگىزگى نازار ايەلدەر مەن جاستارعا اۋدارىلعان.
وسى ماۋسىمدا ونلاين پلاتفورما ارقىلى 1 600-دەن استام ءوتىنىم قابىلداندى. ساراپتامالىق سۇزگىدەن وتكەن 19 جارتىلاي فيناليست تاۋەلسىز قازىلار الدىندا جوبالارىن قورعادى. قورىتىندىسىندا 11 ۇمىتكەر 1 ملن-نان 1,8 ملن تەڭگەگە دەيىنگى گرانت يەلەندى. جەڭىمپازداردىڭ باسىم بولىگى – ايەلدەر. فيناليستەردىڭ جارتىسىنا جۋىعى 30 جاسقا تولماعان. ەڭ جوعارى گرانتتى الماتى وبلىسىنداعى ولگا پاللابادزە اتتى كاسىپكەر الدى. گرانت كولەمى 1 800 000 تەڭگە. ول ورگانيكالىق ازىق-ت ۇلىك ءوندىرىسىن «جاسىل» تەحنولوگيالار ارقىلى دامىتۋدى كوزدەيدى. بۇدان بولەك تاعى 10 كاسىپكەرگە 1 000 000 تەڭگەدەن بەرىلدى.
قولداۋ تاپقان باستامالار اۋقىمى ءارتۇرلى. قۇيما ءمارمار مەن گرانيتتەن شۇڭعىلشا جاساۋ, ۇلتتىق سالت-داستۇرگە ارنالعان كيىمدەر مەن اتريبۋتتار تىگۋ ءارى جالعا بەرۋ, ءۇي ىرىمشىگى مەن تاعام ونىمدەرىن شىعارۋ, دارۋمەندى باتونچيك ءوندىرۋ, ويۋ-ورنەكپەن كومكەرىلگەن اۆتورلىق سومكەلەر تىگۋ, پودكاست ستۋدياسىن ىسكە قوسۋ سىندى جوبالار بار. فورۋم كۇندەرى وتكەن كورمە-جارمەڭكەدە وسى جۇمىستار جۇرت نازارىنا ۇسىنىلدى.
جوبا ىسكە قوسىلعان 2012 جىلدان بەرى كوپساتىلى قولداۋ ەكوجۇيەسى قالىپتاستى. بازالىق وقۋدان گرانتتىق قارجىلاندىرۋعا دەيىنگى تەتىك جۇيەلەندى. ەل اۋماعىندا 150 مىڭنان استام ايەل تەگىن كۋرستان ءوتتى. ناتيجەسىندە 10 مىڭنان استام شاعىن كاسىپ اشىلىپ, 13 مىڭنان اسا جاڭا جۇمىس ورنى پايدا بولدى. بيىلدىڭ وزىندە 18 مىڭنان استام ادام ءبىلىمىن جەتىلدىردى. وقۋ مازمۇنى جىل سايىن جاڭارىپ وتىرادى. وتكەن جىلى جاساندى ينتەللەكت قۇرالدارىن ءىس جۇزىندە پايدالانۋ كۋرسى ەنگىزىلدى.
ون ءۇش جىل ىشىندە بايقاۋ جەڭىمپازدارىنىڭ 178-ءى گرانت يەگەرى اتاندى. ولاردىڭ كوبى وڭىرلەرىندە تالىمگەرگە اينالىپ, كاسىپكەرلىك مادەنيەتتىڭ ورنىعۋىنا ىقپال ەتىپ ءجۇر. ىسكەر ايەلدەر ءوز تاجىريبەسىن ءبولىسىپ, جاڭا باستامالارعا جول اشىپ جاتىر.
ء«بىز قاتىسۋشىلار جەتىستىگىن ماقتان تۇتامىز. بۇل جوبا كاسىپكەرلىك الەۋەتتى جۇيەلى تۇردە دامىتۋدىڭ ناقتى ۇلگىسىنە اينالدى. تۇلەكتەر تەك جەكە كاسىبىن وركەندەتىپ قويماي, ەل ەكونوميكاسىنىڭ بولاشاعىنا ۇلەس قوسىپ كەلەدى», دەدى «الەۋمەتتىك ديناميكا» قوعامدىق قورىنىڭ ديرەكتورى ەلەنا وجگو.
كومپانيا وكىلى الەكساندرا اككيرمان دا باستامانىڭ تيىمدىلىگىنە توقتالدى. ونىڭ ايتۋىنشا, جوبا اياسىنداعى قولداۋ ناقتى ناتيجە بەرىپ, جاڭا جۇمىس ورىندارىنىڭ اشىلۋىنا سەرپىن بەرگەن.
باستامانى حالىقارالىق قور, «جاسىل ەكونوميكا جانە G-Global دامىتۋ» كواليتسياسى مەن Coca-Cola كومپانياسىنىڭ جەرگىلىكتى قۇرىلىمى قولداپ كەلەدى. ۇيىمداستىرۋ ءىسىن «الەۋمەتتىك ديناميكا» قوعامدىق قورى ۇيلەستىرەدى. ءونىمدى جۇمىسپەن قامتۋ مەن ورنىقتى دامۋعا قوسقان ۇلەسى ءۇشىن جوبا بىرنەشە مارتە كاسىبي ءارى مەملەكەتتىك ماراپاتتارعا يە بولدى. بۇل ونىڭ شاعىن بيزنەستى وركەندەتۋدەگى ءتيىمدى تەتىك ەكەنىن ايعاقتاي تۇسەدى.