بىرىڭعاي ۇلتتىق تەستىلەۋ تاپسىرعاننان كەيىن مەكتەپ بىتىرۋشىلەر ءۇشىن ماماندىق پەن جوعارى وقۋ ورنىن تاڭداۋ كەزەڭى باستالادى. وسىعان بايلانىستى تالاپكەرلەر اراسىندا قاي باعىتتار بويىنشا مەملەكەتتىك ءبىلىم بەرۋ گرانتىن الۋ مۇمكىندىگى جوعارى ەكەنى وزەكتى ماسەلە بولىپ وتىر. ۇلتتىق ستاتيستيكا بيۋروسىنىڭ دەرەكتەرىنە سايكەس, 2025-2026 وقۋ جىلىندا قازاقستاندا 73,5 مىڭ ستۋدەنت مەملەكەتتىك گرانت ارقىلى جوعارى وقۋ ورنىنا قابىلدانعان. جالپى العاندا, بۇل بارلىق ستۋدەنتتەردىڭ شامامەن 35,2%-ىن قۇرايدى. سوڭعى جىلدارمەن سالىستىرعاندا گرانت يەگەرلەرىنىڭ سانى 60%-دان استام ارتقانىمەن, ولاردىڭ ۇلەسى ايتارلىقتاي وزگەرمەگەن, دەپ حابارلايدى Egemen.kz.
سالالار بويىنشا تالداۋ كورسەتكەندەي, ەڭ جوعارى گرانت ۇلەسى «جاراتىلىستانۋ عىلىمدارى, ماتەماتيكا جانە ستاتيستيكا» باعىتىندا تىركەلگەن – 73,9%. سونداي-اق «اۋىل شارۋاشىلىعى جانە بيورەسۋرستار» (64,4%) مەن «ۇلتتىق قاۋىپسىزدىك جانە اسكەري ءىس» (61,2%) سالالارىندا دا گرانتپەن تۇسكەندەر كوپ.
ال نارىقتا باسەكەسى جوعارى «بيزنەس, باسقارۋ جانە قۇقىق» باعىتىندا گرانت ۇلەسى بار بولعانى 7% عانا. بۇل سالادا گرانت الۋ الدەقايدا قيىن ەكەنىن كورسەتەدى.
جەكە ماماندىقتار اراسىندا «فيزيكا جانە حيميا عىلىمدارى» (91%), «جانۋار شارۋاشىلىعى» (90,5%), «بالىق شارۋاشىلىعى» (89,3%) سياقتى باعىتتاردا گرانتپەن ءتۇسۋ كورسەتكىشى وتە جوعارى. IT سالاسىنا جاقىن «اقپاراتتىق قاۋىپسىزدىك» (84%) پەن «تەلەكوممۋنيكاتسيالار» (69,9%) دا پەرسپەكتيۆالى باعىتتاردىڭ قاتارىندا.
ينجەنەرلىك ماماندىقتاردا دا مەملەكەت تاراپىنان قولداۋ جوعارى: قۇرىلىس, ءوندىرىس جانە ينجەنەريا سالالارىندا گرانتپەن وقيتىن ستۋدەنتتەر ۇلەسى 50-65% ارالىعىندا.
ال ەڭ تومەن كورسەتكىشتەر قۇقىقتانۋ (2,5%), شەت تىلدەرى (9%), بيزنەس جانە باسقارۋ (10,4%) جانە لوگيستيكا (11,3%) باعىتتارىندا تىركەلگەن.
سونىمەن قاتار 26,2 مىڭ ستۋدەنت الەۋمەتتىك جانە كۆوتالىق ساناتتار بويىنشا گرانت العان. ولاردىڭ ىشىندە كوپبالالى جانە تولىق ەمەس وتباسىلاردىڭ بالالارى, اۋىل جاستارى, ىشكى كوشىپ-قونۋشىلار, جەتىم بالالار مەن مۇگەدەكتىگى بار ازاماتتار بار.
مامانداردىڭ ايتۋىنشا, گرانت سانى مەن باعىتتارداعى باسەكە تالاپكەرلەردىڭ تاڭداۋىنا تىكەلەي اسەر ەتەدى, سوندىقتان ماماندىق تاڭداۋدا تەك قىزىعۋشىلىقتى عانا ەمەس, نارىقتاعى باسەكەنى دە ەسكەرۋ ماڭىزدى.
ەسكە سالايىق, 10 مامىردا قازاقستاندا نەگىزگى ۇلتتىق بىرىڭعاي تەستىلەۋ (ۇبت) باستالدى. بيىلعى سىناق 10 شىلدەگە دەيىن جالعاسادى.
ەلىمىزدە 2023-2024 جىلدار ارالىعىندا وقۋدان شىعارىلعان تۇلعالارعا قايتا گرانت بەرىلىپ, 85 ميلليون تەڭگەدەن استام قارجى نەگىزسىز جۇمسالعان.
بۇعان دەيىن ۇبت-عا قاتىستى جاڭاشا وزگەرىستەردىڭ قانداي بولاتىنىن جازعان ەدىك.