الاكول شومىلۋ ماۋسىمىنا دايىن: جاعالاۋدى ەندى دروندار باقىلايدى

سوڭعى جىلدارى قىس مەزگىلىندەگى مۇز ماسسالارى مەن قاتتى جەلدەن كوتەرىلگەن تولقىندار جاعالاۋدى شايىپ, دەمالىس ورىندارىنا قاۋىپ توندىرگەن. وسىعان بايلانىستى وبلىس اكىمدىگى الاكول جاعالاۋىنىڭ 13 شاقىرىم اۋماعىن قامتيتىن قورعانىس جوباسىن قولعا الدى. قازىر كوكتۇما اۋىلىندا 960 مەتر, اقشي اۋىلىندا 200 مەتر جاعالاۋ بەكىتىلگەن. جوبا تولىق اياقتالعان سوڭ بۇل اۋماقتار زاماناۋي قوعامدىق جاعاجايعا اينالادى.

ينجەنەرلىك ينفراقۇرىلىم دا كەزەڭ-كەزەڭىمەن جاڭارتىلىپ كەلەدى. اقشي اۋىلىندا 69 شاقىرىم كارىز جەلىسىنىڭ قۇرىلىسى تولىق اياقتالعان. سونىمەن بىرگە اقشي مەن كوكتۇما اۋىلدارىنان شىعاتىن اعىن سۋلاردى قابىلداپ, تازارتاتىن زاماناۋي تازارتۋ قوندىرعىسى سالىنىپ جاتىر. نىساننىڭ قۋاتى تاۋلىگىنە 6500 تەكشە مەتردى قۇرايدى.

جازعى ماۋسىمدا الاكولگە قوسىمشا پويىزدار قاتىنايدى

بيىلعى ماۋسىمدا تۋريستەردىڭ جايلىلىعى ءۇشىن جاعالاۋعا قوسىمشا 100 قوقىس كونتەينەرى, 40 كيىم اۋىستىراتىن ورىن, 40 بيودارەتحانا, 40 قۇتقارۋ مۇناراسى, 13 شاقىرىم بۋي جەلىسى جانە 8 پيرس ورناتىلادى. سونىمەن قاتار بەسكول مەن اقشي اۋىلدارى اراسىندا 57 شاقىرىم ەلەكتر جەلىسى مەن 2 قوسالقى ستانتسيا ىسكە قوسىلعان.

تازالىق ماسەلەسىنە دە ەرەكشە كوڭىل ءبولىنىپ وتىر. وسى ماقساتتا ارنايى «الاكول تازالىق» كوممۋنالدىق مەملەكەتتىك مەكەمەسى قۇرىلىپ, ونىڭ ماتەريالدىق-تەحنيكالىق بازاسى 21 بىرلىك ارنايى تەحنيكامەن تولىقتىرىلعان. ەندى كول جاعالاۋىنداعى قوقىستى شىعارۋ, قوعامدىق اۋماقتاردى تازالاۋ, جاعاجايلاردى كۇتىپ ۇستاۋ جانە سانيتارلىق باقىلاۋ جۇمىستارى تۇراقتى تۇردە جۇرگىزىلەدى. جاعالاۋدا ماۋسىمدىق بريگادالار كۇن سايىن جۇمىس ىستەپ, كونتەينەرلەردىڭ ۋاقىتىلى بوساتىلۋى مەن دەمالىس ورىندارىنىڭ تازالىعىن قاداعالايدى.

الاكول اۋدانىنىڭ اكىمى الماس ابدينوۆتىڭ ايتۋىنشا, تۋريستەر سانى ارتقان سايىن قىزمەت كورسەتۋ ساپاسى دا جاقسارىپ كەلەدى.

«الاكولگە كەلەتىن تۋريستەردىڭ سانى ارتىپ جاتقاندىقتان, ءبىز جاعالاۋداعى قىزمەت كورسەتۋ ساپاسىن دا ۇنەمى جاقسارتىپ كەلەمىز. بيىل “الاكول تازالىق” مەكەمەسى قۇرىلىپ, تازالىق جۇمىستارى ءبىر جۇيەگە ءتۇستى. جاعالاۋداعى كيىم اۋىستىراتىن دۇنگىرشەكتەر سانى كوبەيتىلدى. قوسىمشا سانيتارلىق نىساندار ورناتىلىپ جاتىر. ەڭ باستىسى – الاكول جاعالاۋى جىل سايىن جاڭارىپ, دەمالۋشىلارعا قولايلى ءارى قاۋىپسىز ايماققا اينالىپ كەلەدى. بۇل جۇمىستار الداعى ۋاقىتتا دا جالعاسادى», دەدى اۋدان اكىمى.

الاكولگە جەتۋ دە جەڭىلدەگەن. جالپى ۇزىندىعى 488 شاقىرىم بولاتىن تالدىقورعان – ءۇشارال جانە ءۇشارال – دوستىق اۆتوموبيل جولدارى جاڭعىرتىلىپ, كولىك قاتىناسى جاقسارعان. ءۇشارال اۋەجايىنىڭ ۇشۋ-قونۋ جولاعى جوندەلىپ, ءىرى اۋە كەمەلەرىن قابىلداۋعا مۇمكىندىك جاسالدى. سونىمەن قاتار استانا, الماتى, وسكەمەن, سەمەي, پاۆلودار جانە قىزىلوردا قالالارىنان الاكول باعىتىنا 12 پويىز قاتىنايدى.

الاكول مەن بالقاش ءتۋريزمى: مەملەكەت باسشىسى جەتىسۋ وبلىسىنىڭ اكىمىنە بىرقاتار تاپسىرما بەردى

قاۋىپسىزدىك شارالارى دا كۇشەيتىلگەن. اقشي اۋىلىنداعى قۇتقارۋ بولىمشەسىندە 13 قۇتقارۋشى مەن 11 موتورلى قايىق تاۋلىك بويى كەزەكشىلىك ەتەدى. جازعى ماۋسىمدا كول جاعالاۋىندا 50 پوليتسيا قىزمەتكەرى جۇمىس ىستەيدى. قوعامدىق ءتارتىپ دروندار مەن 39 بەينەباقىلاۋ كامەراسى ارقىلى باقىلانادى. اقشي مەن كوكتۇما اۋىلدارىنداعى دارىگەرلىك امبۋلاتوريالار تاۋلىك بويى قىزمەت كورسەتەدى.

قازىر الاكول جاعالاۋىندا 277 تۋريستىك نىسان جۇمىس ىستەيدى. تەك 2025 جىلدىڭ وزىندە 17 جاڭا تۋريستىك نىسان پايدالانۋعا بەرىلگەن.