كەشە ورتالىق سايلاۋ كوميسسياسىنىڭ مۇشەسى مارات سارسەمباەۆ ءباسپاسوز ءماسليحاتىندا سەنات دەپۋتاتتارىن سايلاۋ ۇدەرىسىنىڭ ءوتۋى جايلى بايانداپ بەردى.
ونىڭ ايتۋىنشا, كەشە استانا ۋاقىتى بويىنشا ساعات 12.30-عا دەيىنگى ءمالىمەتتەر بويىنشا, تاڭداۋشىلاردىڭ وتىرىستارىنا 96,6 پايىز ءماسليحات دەپۋتاتتارى قاتىسىپتى. وڭىرلەردە تاڭداۋشىلاردىڭ داۋىس بەرۋ شاراسى جۇيەلى وتكەن. «وبلىستىق, استانا جانە الماتى قالالىق سايلاۋ كوميسسيالارى الدىن الا بەرگەن مالىمەتتەر بويىنشا, كۇندىزگى ۋاقىتتا 371 بايقاۋشى تىركەلىپ ۇلگەرىپتى. ولاردىڭ ىشىندە سەنات دەپۋتاتتىعىنا كانديداتتاردىڭ 33 سەنىم بىلدىرىلگەن ادامى, شەت مەملەكەتتەر مەن حالىقارالىق ۇيىمداردىڭ 52 بايقاۋشىسى, ساياسي پارتيالاردان 29 بايقاۋشى, قوعامدىق ۇيىمداردىڭ 32 بايقاۋشىسى ەلىمىزدىڭ جانە شەتەلدىك بۇقارالىق اقپارات قۇرالدارىنىڭ 220 وكىلى بولدى», دەدى وسك مۇشەسى.
ونىڭ مالىمەتىنشە, تاڭداۋشىلاردىڭ وتىرىستارى قالىپتى جاعدايدا وتكەن. سايلاۋ زاڭناماسىن بۇزۋ فاكتىلەرى تىركەلمەگەن. ورتالىق سايلاۋ كوميسسياسىنا, سونداي-اق استانا مەن الماتى قالالىق سايلاۋ كوميسسيالارىنا سايلاۋ ۇدەرىسىنە قاتىسۋشىلاردان شاعىمدار مەن وتىنىشتەر تۇسپەگەن.
ورتالىق سايلاۋ كوميسسياسىنىڭ ءمۇشەسى تاتيانا وحلوپكوۆا دا ارىپتەسىن قۋاتتادى. ول پارلامەنت سەناتىنىڭ دەپۋتاتتارىن سايلاۋ كەزىندە سايلاۋ زاڭناماسىن بۇزعان ەشقانداي فاكتىلەردىڭ ورىن الماعانىن اتاپ ءوتتى. «سايلاۋ كوميسسيالارىنا دا, باسقا دا ورگاندارعا دا سايلاۋ ۇدەرىسىنە قاتىسۋشىلار, ازاماتتار, ۇيىمدار تاراپىنان ەشقانداي ارىز-شاعىمدار كەلىپ تۇسپەدى», دەدى ت.وحلوپكوۆا.
ءلايلا ەدىلقىزى.