مەملەكەت باسشىسى قازاقستان حالقىنا بيىلعى جولداۋىندا «كوپتەگەن جىلدار بويى كوممۋنالدىق سەكتور قالعان-قۇتقاندى ءبولۋ قاعيداتى بويىنشا قارجىلاندىرىپ كەلدى. سونىڭ سالدارىنان 2008 جىلعا قاراي كوممۋنيكاتسيالاردىڭ 72 پايىزى جوندەۋدى نەمەسە اۋىستىرۋدى قاجەتسىنەدى», دەپ اتاپ كورسەتتى. وسىعان بايلانىستى ەل ۇكىمەتى 2011 جىلدىڭ 30 ءساۋىرىندە تۇرعىن ءۇي-كوممۋنالدىق شارۋاشىلىعىن جاڭعىرتۋدىڭ 2020 جىلعا دەيىنگى سالالىق باعدارلاماسىن بەكىتتى.
كەشە قۇرىلىس جانە تۇرعىن ءۇي-كوممۋنالدىق شارۋاشىلىعى ىستەرى اگەنتتىگىنىڭ وسى كەشەندى باعدارلامانىڭ ءىس جۇزىنە اسىرىلۋىنا بايلانىستى وتىرىسى بولىپ ءوتتى. وندا تۇرعىن ءۇي-كوممۋنالدىق شارۋاشىلىعىن جاڭعىرتۋدىڭ 2020 جىلعا دەيىنگە ارنالعان باعدارلاماسىن ءىس-جۇزىنە اسىرۋدىڭ العاشقى ءناتيجەلەرى قورىتىندىلاندى. وڭىرلەردە پاتەر يەلەرىمەن بولاشاق جوندەۋ جۇمىستارىنىڭ سمەتالىق جوباسىن بەلگىلەۋ جانە كوپ قاباتتى تۇرعىن ۇيلەردى جوندەيتىن مەردىگەر مەكەمەلەرمەن سمەتالىق جوبالاۋ جۇمىستارىن جۇرگىزۋ ماسەلەلەرى بويىنشا ءوزارا كەلىسىم-شارتتار جاساسۋ, قارجى جيناقتاۋ ەسەپ شوتتارىن اشۋ ماسەلەلەرى بويىنشا جان-جاقتى كەلىسىم جاسالىندى.
تۇرعىن ءۇي-كوممۋنالدىق شارۋاشىلىعى سالاسىن مودەرنيزاتسيالاۋدىڭ كەشەندى جوسپارى بويىنشا, قاناتقاقتى باعدارلاما رەتىندە وسكەمەن جانە سەمەي قالالارىندا تەرموجاڭعىرتۋ تاسىلدەرىن قولدانا وتىرىپ, جىلۋ ەنەرگياسىن 30 پايىزعا دەيىن ۇنەمدەۋگە ءمۇمكىندىك بەرەتىن كەشەندى جوندەۋ جۇمىستارى جۇرگىزىلگەن بولاتىن. بۇل جوبا ويداعىداي جۇزەگە اسىرىلدى. سونىمەن بىرگە, ۇستىمىزدەگى جىلى ەلىمىزدە وسى ءادىس بويىنشا 1200 كوپ پاتەرلى تۇرعىن ءۇي كەشەنىن جوندەۋ جوسپارلانعان. قازىر كوپ پاتەرلى تۇرعىن ۇيلەردى جوندەۋگە قاتىستى بارلىق دايىندىق جۇمىستارى اياقتالدى. كوندومينيمۋم نىساندارىنىڭ ورتاق مۇلكىنە كۇردەلى جانە اعىمداعى جوندەۋ جۇمىستارىن ءجۇرگىزۋدىڭ تەتىكتەرى رەتتەلدى.
سونىمەن بىرگە, قولعا الىنعان كەشەندى باعدارلامانىڭ تاعى ءبىر ماڭىزدى مىندەتى – جىلۋمەن, ەلەكترمەن, گازبەن قامتاماسىز ەتۋ جانە باسقا ينفراقۇرىلىمدىق ءجۇيەلەردى جاڭعىرتۋ بولىپ تابىلادى. باعدارلاما بويىنشا, 2015 جىلعا قاراي 24,4 مىڭ شاقىرىم ينفراقۇرىلىمدىق جەلىلەر جاڭارتىلاتىن بولادى. اتاپ ايتقاندا, ونىڭ ىشىندە 1,1 مىڭ شاقىرىم جىلۋ جۇيەسى, 3 مىڭ شاقىرىم گاز جەلىلەرى, 20,3 مىڭ شاقىرىم ەلەكتر جۇيەلەرى جاڭارتىلادى. تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋدىڭ 2011-2015 جىلدارعا ارنالعان ءبىرىنشى كەزەڭىندە جۇزەگە اسىرىلاتىن كەشەندى شارالارعا 451034 ميلليون تەڭگە قارجى بولىنبەك.
وتىرىستا اتاپ كورسەتىلگەندەي, بيىلعى جىلدىڭ العاشقى 6 ايىندا ەلىمىز بويىشا 415 كوپ پاتەرلى ۇيلەرگە ەنەرگەتيكالىق اۋديت ءجۇرگىزىلگەن. وسى شارانىڭ ءناتيجەسىندە كوپ پاتەرلى ۇيلەردىڭ ەنەرگەتيكالىق تيىمدىلىگى جونىندە ەسەپ جاسالىپ, بۇل تۇرعىن ءۇي كەشەندەرىنە جۇمسالاتىن ەنەرگيا قۋاتتارىن ۇنەمدەۋ تەتىكتەرى بەلگىلەندى. سونىمەن بىرگە, قوستاناي, قاراعاندى, ورال, تالدىقورعان, تاراز, قىزىلوردا, اقتوبە جانە شىمكەنت قالالارىنىڭ جىلۋ تاراتۋ جەلىلەرىنىڭ تەحنيكالىق جاعدايىنا باقىلاۋ جۇرگىزىلدى. وسىنىڭ ناتيجەسىندە 2011 جىلدىڭ قاراشاسىندا وسى سەگىز قالانىڭ جىلۋ جۇيەلەرىنىڭ تەحنيكالىق-ەكونوميكالىق جاعدايىن ناقتى انىقتاۋ جونىندە ەسەپ دايىندالىپ, ونىڭ تيىمدىلىگى انىقتالاتىن بولادى.
مەملەكەت باسشىسىنىڭ تىكەلەي تاپسىرماسىمەن ءىس جۇزىنە اسىرىلا باستاعان تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋ جانە قايتا جاڭعىرتۋ جۇمىستارىنىڭ بولاشاعى زور. بۇل رەتتە كوپ قاباتتى تۇرعىن ۇيلەردە تۇراتىن ءاربىر پاتەر يەسى بۇل كەشەندى شارانى تۇسىنىستىكپەن قابىلداپ, تۇرعىن ءۇي-كوممۋنالدىق شارۋاشىلىعىن قايتا قۇرۋ ىسىنە بەلسەندى ارالاسۋى كەرەك. بۇل ەلىمىزدىڭ بولاشاعى ءۇشىن جانە ەرتەڭگى ۇرپاقتىڭ قولايلى دا جاقسى جاعدايدا تۇرمىس قۇرۋى ءۇشىن اۋاداي قاجەت.
جىلقىباي جاعىپار ۇلى.