تايلاند پارلامەنتى تاعىنان تايدىرىلعان پرەمەر-مينيستر تاكسين چيناۆاتتىڭ تۋعان قارىنداسى يننگلكۋ چيناۆاتتى ۇكىمەت باسشىسى ەتىپ سايلادى. وعان دەپۋتاتتاردىڭ جارتىسىنان استامى ءوز داۋىستارىن بەردى.
44 جاستاعى كاسىپكەر وسى ەلدەگى تۇڭعىش ايەل پرەمەر-مينيستر بولىپ وتىر. SC Asset Corp دەۆەلوپەرلىك كومپانياسىنىڭ پرەزيدەنتى بولعان ي.چيناۆات وپپوزيتسيالىق پارتيانى باسقارىپ, سايلاۋدا جەڭىپ شىقتى. ءسويتىپ تايلاند پارلامەنتىندە 265 دەپۋتاتتىق ورىنعا يە بولدى. ال قازىرگى پرەمەر-مينيستر ابحيسيت ۆەتچاۆيۆا ءوز پارتياسىنىڭ جەڭىلىسكە ۇشىراۋىنا بايلانىستى وتستاۆكاعا كەتەتىنىن مالىمدەدى.
يسپانيادا تىنىشتىق بۇزىلا باستادى
يسپانيا استاناسى – ءمادريدتىڭ ورتالىق الاڭىندا كوشەگە شىعىپ, قارسىلىق بىلدىرۋشىلەر مەن پوليتسيا اراسىندا ورىن العان قاقتىعىستان جيىرماعا جۋىق ادام جاراقات العان. مۇنداي جاعداي مامىر ايىندا دا ورىن العان بولاتىن.
سول كەزدە ەكى مىڭعا تارتا ادام پۋەرتا دەل سول الاڭىنا جينالىپ, ءبىر اي بويى پالاتالى قالاشىقتا جاتىپ العان-دى. قازىر جاعداي قايتادان ۋشىعىپ تۇر. ەلدەگى جۇمىسسىزدىق پەن ءومىر ءسۇرۋ دەڭگەيىنىڭ تومەندىگىنە نارازى توپتى پوليتسيا ورتالىق الاڭعا جىبەرمەگەن. ىشكى ىستەر مينيسترلىگىنە باعىت العان ولاردى توقتاتپاق بولعان كەزدە پوليتسيامەن قاقتىعىس ورىن العان.
حاكەرلەر شابۋىلدى بەلسەندىرە ءتۇستى
قىتايدىڭ People s Daily گازەتى حالىقارالىق ۇيىمدار مەن ۇكىمەتتەر سايتتارىنا شابۋىل جاساعان حاكەرلىك ارەكەتتەرگە قىتايدىڭ ەش قاتىسى جوق دەپ مالىمدەدى. اتالعان گازەت قىتاي كومپارتياسى وك باسىلىمى بولىپ تابىلعانىمەن, رەسمي تۇلعالار تاراپىنان ەشقانداي مالىمدەمە جاسالماي وتىر.
Mc Afee كومپانياسى تاريحتا ءبىرىنشى رەت وسىنداي ءىرى حاكەرلىك شابۋىل بارىسىن تىركەۋ مۇمكىن بولعاندىعىن حابارلاعان. مۇنداي شابۋىلدان 72 قۇرىلىم جاپا شەكسە, سولاردىڭ قاتارىندا حالىقارالىق وليمپيادا كوميتەتى, بۇۇ, اقش, ءۇندىستان, ۆەتنام جانە وڭتۇستىك كورەيا دا بار. كومپانيا ساراپشىلارى حاكەرلىك شابۋىلدىڭ ارتىندا جالعىز تاپسىرىس بەرۋشى تۇرعاندىعىن جاريا ەتكەنىمەن, ونىڭ كىم ەكەنىن ازىرگە ايتپاي وتىر. بىراق كوپتەگەن ساراپشىلار ونى قىتاي ۇكىمەتىمەن بايلانىستىرۋدا.
اتلانت مۇحيتى تۇڭعيىعىن زەرتتەمەك
بۇۇ-نىڭ تەڭىز تابانى جونىندەگى حالىقارالىق ورگانى اتلانت مۇحيتىنىڭ تابانىنان التىن مەن مىس قورىن زەرتتەۋ ءۇشىن رەسەي تاراپىنا رۇقسات بەردى. وسىلايشا رەسەيدىڭ الەمدىك مۇحيت استىنان مينەرالدى رەسۋرستاردى بارلاۋ تۋرالى ءوتىنىشى قاناعاتتاندىرىلدى.
اتالعان ورگان تاريحتا ءبىرىنشى رەت ەشبىر ەلدىڭ ەكونوميكالىق ايماعىنا جاتپايتىن مۇحيت تابانىن بارلاۋعا رۇقسات بەرىپ وتىر. رەسەي تاراپى زەرتتەيتىن ۋچاسكەنىڭ اۋماعى 100 شارشى شاقىرىمدى قۇرايدى. نەگىزگى كەن كوزدەرى 2-4 شاقىرىمدىق تەرەڭدىكتە جاتىر دەگەن بولجام بار. سونداي-اق رەسەيدەن وزگە قىتاي, تىنىق مۇحيتىنداعى تونگو مەن ناۋرۋ ارالدىق مەملەكەتتەرى تاپسىرىستارى قاناعاتتاندىرىلعان.
ءبىر اپتا سيريا تاعدىرىن شەشە مە؟
سيرياعا ليۆيانىڭ تاعدىرىن قايتالاماۋ مۇمكىنشىلىگى بەرىلىپ وتىر. ماسكەۋدىڭ ۇسىنىسىمەن بۇۇ قاۋىپسىزدىك كەڭەسىندە وسى ماسەلە قولداۋ تاپقانىمەن, سيرياداعى جاعداي بويىنشا قىزۋ پىكىرلەر ورتاعا سالىنعان.
سوڭعى ءۇش كۇن ىشىندە جاعدايدىڭ ۋشىعىپ كەتكەنى سونشىلىقتى, كوپتەگەن بەيبىت قارسىلىق بىلدىرۋشىلەر وققا ۇشقان. ال داماسك ەلدى باستان باقايشىعىنا دەيىن قارۋلانىپ العان لاڭكەسشىلەردەن تازارتۋ وپەراتسياسى جۇرگىزىلىپ جاتقاندىعىمەن تۇسىندىرۋدە. باتىس ەلدەرى داماسكىگە قىسىم كورسەتۋ كەرەك دەسە, كەيبىر ەلدەر بۇعان قارسى. قالاي بولعان كۇندە سيريا ماسەلەسىن تالقىلاۋ ءبىر اپتاعا شەگەرىلدى.
مارستان وزگەرىس بايقالدى
عالىمدار مارستا ۇزىن قارا داقتاردى انىقتادى. پلانەتا بەتىندە سوزبالانىپ جاتقان مۇنداي سىزىقتار اعىپ جاتقان تۇزدى سۋ بولۋى دا مۇمكىن. امەريكالىق جانە شۆەيتساريالىق عالىمداردىڭ جاڭالىعى ورگانيزمدەردىڭ ءومىر سۇرۋىنە قاجەتتى سۋدىڭ اتالعان قىزىل پلانەتادا بولۋى مۇمكىن دەگەن پايىمىن راستاعانداي اسەر قالدىرىپ وتىر.
جۇقا سوزىلمالار توبەشىكتەردەن تومەن سىرعىپ, جازىقتارعا جايىلىپ جاتىر. ونىڭ ۇستىنە اتالعان سۇيىقتىقتار جازعى مەزگىلدە پايدا بولىپ, قىسقا تامان قايتادان كورىنبەي كەتەدى ەكەن. قالاي بولعاندا دا, عالىمدار سونشالىقتى سۋىقتا تۇششى سۋدىڭ بولۋى مۇمكىندىگىنە كۇمانمەن قارايدى. الايدا بيولوگتار لايلى اعىندا تۇزدى جەرلەردە ءومىر سۇرە بەرەتىن گالوباكتەريالاردىڭ بولۋى مۇمكىن دەگەن جورامالدار دا ايتىپ ءجۇر.
قىسقا قايىرىپ ايتقاندا:
*تۇركىمەنستان پرەزيدەنتىنىڭ سايلاۋى 2012 جىلى 12 اقپاندا وتەدى دەپ بەلگىلەنىپ وتىر. ەل پارلامەنتى (مەدجليس) وسىنداي شەشىم قابىلدادى. تۇركىمەن پرەزيدەنتتىگىنە وسى ەلدە تۋعان, جاسى 40-تان اسقان, بىراق 70-ءتى ەڭسەرمەگەن, مەملەكەتتىك ءتىلدى بىلەتىن, 15 جىلدان بەرى تۇركىمەنستاندا تۇراتىن ازامات قانا ءوز كانديداتۋراسىن ۇسىنا الادى.
*يتاليا رەيتينگىسىنىڭ قۇلدىراپ كەتۋىنە بايلانىستى وسى ەلدىڭ پروكۋراتۋراسى تاراپىنان Moody’s ي S&P وفيستەرىندە ءتىنتۋ جۇرگىزىلدى. ەل بيلىگى يتالياداعى قارىزدىق داعدارىستىڭ سالدارىن اتالعان رەيتينگ اگەنتتىكتەرى ادەيى قولدان جاسادى دەپ كۇدىكتەنۋدە.
*ليۆيا باسشىسى مۋاممار كاددافيدىڭ ۇلى حاميس ناتو تاراپىنان بولعان اۋە شابۋىلى كەزىندە قازا تاپتى, دەپ مالىمدەدى ب ۇلىكشىلەر وكىلى. سونىمەن بىرگە زليتەن قالاسىندا تاعى 32 ادام قازا تاپقان.
ينتەرنەت ماتەريالدارى نەگىزىندە ازىرلەندى.