2025 جىلدى قازاقستان حالقى وڭ تابيعي وسىممەن اياقتادى. ەلدە 329 600 ءسابي دۇنيەگە كەلسە, 133 200 ادام قايتىس بولدى. ناتيجەسىندە 196 400 ادامعا تەڭ تابيعي ءوسىم قالىپتاستى. دەگەنمەن ساراپشى سۇلتان ۆاليحانوۆتىڭ ايتۋىنشا, بۇل ءوسىمنىڭ قۇرىلىمى بىركەلكىلىگىن جوعالتىپ, وسال بولا تۇسكەن, دەپ جازادى Egemen.kz.
ساراپشى جالپى تۋ كوەففيتسيەنتى حالىقتىڭ 1000 ادامىنا 16,17 بولعانىن ايتادى. بۇل 2024 جىلعى 18,29 كورسەتكىشىنە قاراعاندا تومەن. تۋ دەڭگەيى ءالى دە وڭ ۇلەس قوسىپ وتىر, بىراق دەموگرافيالىق ءوسىمدى جەدەلدەتەتىن فاكتور رەتىندە بۇرىنعىداي ءرول اتقارا المايدى. ءولىم-ءجىتىم كورسەتكىشى 6,53-كە تەڭ بولدى (2024 جىلى 6,63). وسىلايشا, 2025 جىلعى تابيعي ءوسىم كوەففيتسيەنتى حالىقتىڭ 1000 ادامىنا 9,64 بولىپ, وتكەن جىلمەن سالىستىرعاندا ايتارلىقتاي تومەندەدى.
دەموگرافيا ءھام دۇنيەتانىم
ايلىق ديناميكا كورسەتكەندەي, تابيعي ءوسىم جىل ىشىندە تۇراقسىز بولدى: كەيبىر ايلاردا ورتاشا جىلدىق دەڭگەيدەن تومەن ءتۇسىپ, قورىتىندى ناتيجە تەك جيناقتالعان اسەر ارقىلى قالىپتاستى. دەموگرافيالىق ءوسىم تەربەلىستەرگە سەزىمتال ءارى تۇراقتىلىعى السىرەدى.
«وڭىرلىك كورسەتكىشتەردە ايىرماشىلىق ايقىن بايقالادى. تۋ دەڭگەيى جوعارى وڭىرلەرگە تۇركىستان وبلىسى (21,92), شىمكەنت قالاسى (21,41), ماڭعىستاۋ وبلىسى (21,11) جاتادى. بۇل اۋماقتار ۇلتتىق دەموگرافيالىق ءوسىمنىڭ ەداۋىر بولىگىن قالىپتاستىرادى. ال سولتۇستىك قازاقستان وبلىسىندا ءولىم كوەففيتسيەنتى 11,51, شىعىس قازاقستان وبلىسىندا 11,30, قوستاناي وبلىسىندا 9,92 بولدى. ءولىم-ءجىتىم جوعارى وڭىرلەردە حالىقتىڭ ەگدە جاستاعى ۇلەسى كوپ بولعاندىقتان, بۇل كورسەتكىشتەر ينەرتسيالىق سيپاتقا يە جانە جىل ىشىندە كۇرت تومەندەمەيدى», دەيدى ساراپشى.
سۇلتان ۆاليحانوۆ اتاپ وتكەندەي, ەلدىڭ تابيعي ءوسىمى ەندى ساناۋلى وبلىستار مەن قالالارعا شوعىرلانىپ, ەكونوميكا ءۇشىن بىركەلكى فون بولۋدان قالدى. ءبىر وڭىرلەردە الەۋمەتتىك ينفراقۇرىلىمعا سۇرانىس وسسە, ەكىنشىلەرىندە ەڭبەك الەۋەتى قىسقارىپ, دەنساۋلىق ساقتاۋ مەن الەۋمەتتىك قولداۋ جۇيەسىنە قىسىم كۇشەيەدى.
«نەكە جانە وتباسى ستاتيستيكاسى دا وسى بەيتاراپ ەمەس قۇرىلىمدى كورسەتەدى. 2025 جىلى ەلدە 114 500 نەكە تىركەلسە, 45 500 اجىراسۋ بولدى. بۇل ءاربىر ەكىنشى نەكەنىڭ تۇراقسىز ەكەنىن, ءۇي شارۋاشىلىقتارى مەن وتباسىلىق شەشىمدەردىڭ موبيلدىگى مەن تۇراقسىزدىعىن كورسەتەدى», دەدى سۇلتان ۆاليحانوۆ.
قورىتىندىلاي كەلە, 2025 جىلى قازاقستاندا تابيعي ءوسىم ساقتالسا دا, ول قۇرىلىمدىق تۇرعىدان بىركەلكى بولمادى. ۇلتتىق كورسەتكىش وڭ بولسا دا, ناقتى دەموگرافيالىق تەڭگەرىم تەك شەكتەۋلى وڭىرلەرگە تاۋەلدى. دەموگرافيالىق ءوسىم ىشكى قۇرىلىمدىق كەرنەۋلەردىڭ ينديكاتورىنا اينالا باستاعان.
يلون ماسك الەمدىك تۋ كورسەتكىشىن بەينەلەيتىن كارتا ۇسىندى