قازاقستان مەن ورتالىق ازياداعى اۆتوكولىك سالاسىنداعى ەڭ ءىرى كومپانيالاردىڭ ءبىرى «Astana Motors» ۇجىم قىزمەتكەرلەرىنە جاڭا كونستيتۋتسيا نەگىزدەرىن ءتۇسىندىرۋ ماقساتىندا جيىن ءوتتى. كومپانيانىڭ باس ديرەكتورى بەكنۇر نەسىپباەۆ الماتى يندۋستريالىق ايماعىندا ورنالاسقان وندىرىستىك الاڭىندا ەڭبەك ۇجىمىمەن ارنايى كەزدەستى, دەپ جازادى Egemen.kz.
كەزدەسۋ بارىسىندا قىزمەتكەرلەرگە ەلىمىزدىڭ جاڭا كونستيتۋتسياسى جوباسى جونىندە تۇسىندىرمە جۇمىستارى جۇرگىزىلىپ, 15 ناۋرىز كۇنى وتەتىن رەفەرەندۋمنىڭ ەل بولاشاعى ءۇشىن ستراتەگيالىق ماڭىزدىلىعى ايتىلدى. سونىمەن بىرگە كونستيتۋتسياعا ەنگىزىلگەن جاڭا وزگەرىستەر مەن تولىقتىرۋلار كەڭىنەن تالقىلاندى. قۇجاتتا ايقىندالعان نەگىزگى باعىتتار مەن باستى قاعيداتتارعا ەرەكشە نازار اۋدارىلدى.
گيدروتەحنيكتەر جاڭا كونستيتۋتسيا بويىنشا رەفەرەندۋم وتكىزۋدى قولدادى
كومپانيا باسشىسى رەفورمالاردىڭ ەلىمىزدىڭ دامۋىنا, بيزنەس پەن ونەركاسىپتىڭ وركەندەۋىنە, سونداي-اق قۇقىقتىق مەملەكەتتى نىعايتىپ, ەڭبەك ادامىن قورعاۋعا باعىتتالعانىن اتاپ ءوتتى.
«ۇسىنىلىپ وتىرعان جاڭا كونستيتۋتسيا جوباسى اشىقتىق پەن جاۋاپكەرشىلىكتى ارتتىرۋعا باعىتتالعان. بيزنەس ءۇشىن بۇل ينۆەستيتسيالاردى قورعاۋ مەن تۇراقتىلىقتى بىلدىرەدى. ال ازاماتتار ءۇشىن بۇل – كەپىلدىك بەرىلگەن قۇقىقتار, الەۋمەتتىك ادىلەتتىلىك جانە بولاشاققا دەگەن سەنىمدىلىك. تەك وسىنداي جاعدايلاردا عانا ءوندىرىس دامي الادى, جاڭا جۇمىس ورىندارى قۇرىلادى جانە ادامداردىڭ ءال-اۋقاتى ارتادى.
ەل ازاماتتارى رەتىندە ءبىز قازاقستان رەسپۋبليكاسىنىڭ جاڭا كونستيتۋتسياسىن جانە ونىڭ دامۋ ساياساتىن قولدايمىز, سونداي-اق رەفەرەندۋمعا مىندەتتى تۇردە قاتىسامىز», دەدى بەكنۇر نەسىپباەۆ.
ءسوز سوڭىندا بەكنۇر نەسىپباەۆ ۇجىم قىزمەتكەرلەرىن رەفەرەندۋمعا بەلسەندى قاتىسۋعا جانە ەل بولاشاعىن ايقىندايتىن باستامالارعا قولداۋ كورسەتۋگە شاقىردى.
ءوز كەزەگىندە «Astana Motors» ۇجىمى الداعى رەفەرەندۋمدى قولدايتىنىن جەتكىزىپ, جاڭا كونستيتۋتسيانىڭ ەلىمىزدىڭ دامۋىنا وڭ وزگەرىستەر اكەلەتىنىنە سەنىم ءبىلدىردى.
اقتوبەلىك جاستار كونستيتۋتسيانىڭ جاڭا جوباسىنا قولداۋ ءبىلدىردى