بەيسەنبىدەن جۇماعا قاراعان ءتۇنى ەلىمىزدىڭ ەڭ ۇزدىك كومانداسى «اقتوبە» ەۋروپا ليگاسىنىڭ 3-ءشى ىرىكتەۋ كەزەڭىندە ءبىراز ۋاقىت ارقالاپ جۇرگەن ءۇمىتىمىزدى اقتاماي, ءوز الاڭىندا رەسەيدىڭ «الانيا» كلۋبىنان ۇتىلۋعا ءماجبۇر بولدى.
ءسويتىپ, «اقتوبە» جىلداعى وسى كەزدە بولاتىن ادەتى بويىنشا تاعى دا ەۋروپا ليگاسىمەن قوش ايتىستى. بۇل ويىندا وتانداستارىمىز العاشقى كەزدەسۋدەگى ناتيجەنى قايتالاپ, ۇتىمدى پايدالانا الماي, جەڭىلىس تاپتى. وسى جەڭىلىس ءۇشىن ءبىز «اقتوبەنىڭ» بارلىق ويىنشىلارىنا كىنا تاعا المايمىز. ويىنشىلاردىڭ ءبارى شاماسى كەلگەنشە ادەمى ويناۋعا تىرىستى. «اقتوبە» وسىنداي جاۋاپتى سىنداردى ادەمى, قارسىلاستارىمەن نازىك ويناۋدى ابدەن بويىنا ءسىڭىرىپ العان سياقتى. كوماندانىڭ قارسىلاسىنان جەڭىلۋىنىڭ ءبىر سەبەبىن وسىمەن دە بايلانىستىرۋعا بولادى. ال قازاق كومانداسىنان گورى ەۋروپا الاڭدارىندا ءبىراز كويلەك توزدىرعان «الانيا» ولاي ەتپەدى. ءتىس قاققان, بىلىكتى باپكەر ۆالەري گاززاەۆتىڭ ۇلى, 31 جاستاعى ۆلاديمير گاززاەۆتىڭ كومانداسى «اقتوبە» سياقتى ويىندى شەكتەن تىس ادەمى, ساق ويناماي ءجيى-ءجيى شابۋىلدار جاساپ, دىتتەگەن ماقساتىنا جەتۋدى ويلاستىردى. ءسويتىپ, تەك ناتيجە ءۇشىن عانا ويناعان رەسەيلىكتەر ماتچتىڭ ەكىنشى جارتىسىندا الاڭ يەلەرىنە ءبىرىنشى بولىپ دوپ سوعىپ ۇلگەردى. راسىن ايتساق, وسى كەزدە «اقتوبە» ساسقالاقتاپ, مىڭداعان جانكۇيەرلەردىڭ الدىندا ەسەپتى تەڭەستىرە الماي, سول نازىك ويناۋ ادەتىن ءارى قاراي جالعاستىراتىن بولا ما دەپ تە ويلاعان ەدىك. الايدا نامىسقا تىرىسقان اقتوبەلىكتەر 75-مينوتتە ەسەپتى تەڭەستىرە الدى. دوپتىڭ اۆتورى دجيلاس راسى كەرەك, ادەمى گول سوقتى. وسى ويىندا «اقتوبەنىڭ» ساپىنداعى ماليك مانە شابۋىلعا ادەمى پاس شىعارىپ وتىردى. ەكىنشى تايمدا دجيلاس پەن حايرۋللين دوپ سوعۋ ءمۇمكىندىكتەرىن پايدالانا المادى. ال «الانيانىڭ» ساپىندا كومانداسىنا گول سىيلاعان وزبەكستان قۇراماسىنىڭ مۇشەسى بيكماەۆ الاڭ يەلەرىنە ءبىراز شەبەرلىگىن كورسەتىپ وينادى.
ويىن وسىلاي تەڭ ەسەپپەن اياقتالعان سوڭ, قوسىمشا بەرىلگەن جارتى ساعات ۋاقىتتا ەسەپ وزگەرمەدى. وسىدان كەيىن 11 مەترلىك پەنالتيدە «الانيانىڭ» جولى بولدى. پەنالتيدە قوناقتاردىڭ ءبارى گول سوقسا, ءبىزدىڭ كوماندادا مانە مەن دجيلاس قاقپاشىدان ايلاسىن اسىرا المادى. وسىلايشا, «الانيا» كەلەسى اينالىمعا شىقسا, «اقتوبە» تاعى دا ورتا جولدا جەر سيپاپ قالدى.
كوڭىلگە ءبىر قۋانىش ۇيالاتاتىنى, رەسەيلىك «سپورت-ەكسپرەسس» گازەتىنىڭ 4 تامىز كۇنگى سانىندا «اقتوبە» مەن «الانيا» كوماندالارىنىڭ ويىنى الدىندا شىققان ماتەريال بولدى. گازەتتىڭ «ەحالي ۆ ازيۋ, پوپالي ۆ ەۆروپۋ» دەگەن ماتەريالدا اقتوبەگە ويىن تۋرالى رەپورتاج دايىنداۋعا كەلگەن اۆتوردىڭ جەرگىلىكتى حالىقتىڭ قوناقجايلىعى, قالانىڭ تازالىعى, ەلىمىزدىڭ گۇلدەنىپ, وركەندەپ بارا جاتقانى تۋرالى جازعان ماقالاسى شىن مانىندە ادامنىڭ كوڭىلىن وسىرەدى ەكەن.