«ورتكە تيگەن داۋىلداي» ءورشىل ولەڭدەرىمەن قازاق پوەزياسىنا جاڭا لەپ, ەرەكشە ەكپىن الىپ كەلگەن داۋىلپاز اقىن قاسىم امانجولوۆتىڭ تۋعانىنا 100 جىل تولۋىنا بايلانىستى اقىن شىعارماشىلىعىنا ارنالعان ءمادەني ءىس-شارالار جەر-جەردە ءوتىپ جاتقانى بەلگىلى. وسىنداي يگى شارانىڭ ءبىرى تاياۋدا س.قوجامقۇلوۆ اتىنداعى جەزقازعان قازاق مۋزىكالىق دراما تەاترىندا دا ءوتتى.
اقىن ولەڭىمەن اتتاس «ەي, ءتاكاپپار دۇنيە, ماعان دا ءبىر قاراشى!» دەگەن اتپەن قويىلعان پوەتيكالىق قويىلىم كوپتىڭ كوڭىلىنەن شىقتى. قويىلىمنىڭ ستسەناريىن جازعان ءارى ساحناعا شىعارعان رەجيسسەر تەاتردىڭ تالانتتى اكتريساسى رايحان يبراەۆا.
جينالعان قوپشىلىك اقىن ولەڭدەرى بىرىنەن سوڭ ءبىرى كەزەكپەن وقىلاتىن ادەتتەگى جىر كەشىن كۇتىپ وتىرعان. الايدا, قويىلىمنىڭ وزگەشە باستالۋىنىڭ ءوزى بۇل شىعارمانىڭ كوتەرەر جۇگى سالماقتى ەكەنىن بايقاتتى. جۇرەكتى تەربەتەر اۋەنمەن بىرگە ساحنا شىمىلدىعى جايىمەن سىرعىپ اشىلعان ساتتە كوزگە تۇسكەنى – ساحنا بۇرىشىندا تۇرعان شاعىن ۇستەل.ۇستەل ۇستىندە كىتاپ-قاعاز, بالاۋىز شام. بەينە اقىن قاسىم تۇنىمەن مايشامنىڭ جارىعىمەن بۇرقىراتىپ ولەڭ جازىپ, ورنىنان ەندى تۇرىپ كەتكەندەي. سول كەزدە كورەرمەن زالىنان كوتەرىلگەن ەكى-ءۇش جاس ۇستەلدى جاعالاي وتىردى. ساحنا تورىندەگى پورترەتتەن ولارعا «سەن نەتكەن باقىتتى ەدىڭ كەلەر ۇرپاق؟» – دەپ اقىن ءارى قىزىعا, ءارى سىناي قاراپ تۇرعانداي. بالالاردىڭ ءبىرى قاسىم امانجولوۆتىڭ:
بالالار – ءبىزدىڭ بولاشاق!
سۇيسىنەمىز. سۇيەمىز.
بۇل بولاشاق تاماشا-اق,
بولاشاققا يەمىز, – دەگەن جىر جولدارىن وقىپ, بولاشاقتىڭ يەسى – بۇگىنگى جاستارعا ۇلكەن سەنىم ارتقان, جانى – وت, رۋحى – بيىك اقىننىڭ ارتىندا قالدىرعان مول مۇراسى تۋرالى نە بىلەتىندەرىن ورتاعا سالۋعا شاقىردى. قالعاندارى بۇل ۇسىنىستى قولداپ, اقىننىڭ الماس قىلىشتاي جارقىلداعان ولەڭدەرىن بىرىنەن-ءبىرى ءىلىپ الىپ, جىگەرلەنە وقي جونەلدى. ساحناداعى قويىلىم كورىنىستەرى دە وسى جاستاردىڭ ورتاعا سالعان ويى, تولعانىستارى سياقتى ءوربىدى.
اقىن ءومىرى مەن شىعارماشىلىعىنىڭ باستى-باستى كەزەڭدەرى – بالالىق جانە جالىندى جاستىق شاق, ارايلى الماتىداعى اقىندىق قالىپتاسۋ كەزەڭدەرى مەن ۇلى وتان سوعىسى, سوعىستان كەيىنگى شابىتتى شىعارماشىلىق جىلدارى قامتىلعان قويىلىمنىڭ كوپتىڭ كوڭىلىنەن شىعۋى ءۇشىن تەاتر ارتىستەرى مەن جەزقازعان مۋزىكالىق كوللەدجى اكتەرلىك فاكۋلتەتىنىڭ ستۋدەنتتەرى بارىنشا كۇش سالدى.
العاشقى كورىنىس قاسىمنىڭ بالالىق شاعى, اكەدەن جاستاي قالىپ, جەتىمدىكتىڭ تاقسىرەتىن تارتقان كەزى تۋرالى سىر تولعايدى.
قىس. قىستاۋ. اتا-مەكەن قىزىلداعى
ەرتتەۋلى اتتار تولى قورا ماڭى.
تومپاڭداپ ۇيگە جالعىز كەلە جاتتىم,
تويدىرىپ كۇرەسىننىڭ سىرعاناعى.
جارماسىپ بوساعاعا ۇيگە ەنگەندە,
تۇسكەندەي بولدى جۇرەك ىرشىپ جەرگە, –
سۇپ-س ۇلىق جاتتى اكەم الدىمىزدا,
بۇركەنىپ جاينامازىن وڭ جاق توردە, – دەپ تەبىرەنەدى جەتىمدىكتىڭ تاۋقىمەتى يىعىنا ەرتە تۇسكەن بالا قاسىم اكە تابىتى جانىندا تۇرىپ.
بۇدان كەيىنگى كورىنىستەردە قاسىمنىڭ ورال پەداگوگيكا ينستيتۋتىندا وقىعان جالىندى جاستىق شاعى, الماتىعا كەلىپ جۋرناليستىك قىزمەتكە كىرىسكەن, اقىندىققا ءبىرجولا بەت بۇرىپ, اباي ۇلگىسىنە, اۋدارماشىلىققا دەن قويعان جانە قازاق پوەزياسىندا ءوز ءۇنىن تانىتقان كەزدەرى كەزەڭ-كەزەڭىمەن كورىنىس تاۋىپ, وسىعان وراي سىرشىل سەزىمگە تولى, جىگەرلى جىرلارى وقىلدى.
قازاقتىڭ كەڭ دالاسىن, سارىارقانىڭ سارى جايلاۋىن, ەرتىستەي سۇلۋ وزەنىن, ورالى مەن جايىعىن, اقباستى الاتاۋىن جالىندى ماحاببات, سارقىلماس ساعىنىشپەن جىرلاعان قاسىمنىڭ:
قوش بول, دوسىم, جاقىنىم,
ۋاقىت تىعىز, ءسوز قىسقا.
كەتىپ بارا جاتىرمىن,
سۇراپىل ءبىر سوعىسقا, – دەپ مايدانعا اتتانىپ, وت پەن وقتىڭ ورتاسىندا ءجۇرىپ, جانارتاۋداي جالىندى جىرلارىمەن الاپات سوعىستىڭ ادامزاتقا اكەلگەن اپاتىن, ءومىر مەن ءولىمنىڭ ارپالىسىن, جاۋىنگەرلەردىڭ ەرلىك سيپاتىن شىنايى كورسەتكەن اقىننىڭ بولەكشە تۇلعاسىن تەاتر اكتەرلەرى ەركە ءبايدەشوۆ, جاسۇلان تۇسىپبەكوۆ, باقىتجان يبراەۆ, ابىلقاسىم شومان ۇلى, قۇرمان يگىباەۆ, تەمىرجان جانبوتاەۆ «سەن – ءفاشيسسىڭ, مەن – قازاقپىن», «سىرلاسىم», «اقىن ءولىمى تۋرالى اڭىز», «باۋىرجان», «دوستار, قايدا جۇرسىڭدەر؟», «ءۇستىمدە سۇر شينەلىم» دەگەن ولەڭدەرى ارقىلى اسەرلى جەتكىزە الدى.
الاپات ءورتتىڭ ورتاسىنان امان شىققان اقىن جۇرەك :
كەلدىم سەنى ساعىنىپ,
التىن ۇيام – الماتىم.
كەڭ كوشەڭدە باسار نىق,
مەن ءبىر اقىن – سولداتىڭ, – دەپ شاتتانا جىرلايدى. اقىن ولەڭدەرىنىڭ وسى كەزدەگى باستى تاقىرىبى ماحاببات , باتىرلىق, ەرلىك , تۋعان جەردىڭ جاسىل جايلاۋى, تاستان-تاسقا سەكىرگەن بال بۇلاعى ەكەنىن كورەرمەن «الماتى», «ساقىپجامال», «ماحاببات پەرىشتەسى», «داريعاشىم» ت.ب. ولەڭدەر ارقىلى تانىدى.
ءبىر سوزبەن ايتقاندا, لاپىلداعان جالىنداي ەكپىنىمەن قازاق پوەزياسىن ءدۇر سىلكىندىرگەن قاسىم امانجولوۆتىڭ ماڭگى ولمەس ولەڭدەرى مەن تەاتردىڭ ءانشى-ارتىستەرى دۇيسەن كەنجەەۆ, ءابىلقاسىم شومان ۇلى, جاسۇلان ءتۇسىپبەكوۆ, اينۇر دوسىمباەۆا ورىنداعان اقىننىڭ سوزدەرىنە جازىلعان قازاق كومپوزيتورلارىنىڭ «داريعا, سول قىز», «تۋعان جەر», «ءوزىم تۋرالى», «ورالىم», «جاس داۋرەن», «الما باعىندا», «اقساۋلە» سياقتى اندەرىنىڭ قۇدىرەتتى رۋحى كورەرمەننىڭ جۇرەگىن باۋراپ, جۇرەكتەرىنە ىستىق لەپ تۋعىزىپ, ەرەكشە كۇيگە بولەدى. قازاقستاننىڭ حالىق ءارتىسى, قازاقستاننىڭ ەڭبەك سىڭىرگەن قايراتكەرى دوسجان جانبوتاەۆ ەرەكشە جىگەرمەن وقىعان اقىننىڭ «ەي, تاكاپپار دۇنيە, ماعان دا ءبىر قاراشى!» اتتى ولەڭى قويىلىمنىڭ سوڭعى نۇكتەسى, قورىتىندى ءتۇيىنى بولدى.
ءۇمىتاي مولدابەرگەن, س.قوجامقۇلوۆ اتىنداعى مۋزىكالىق تەاترى ادەبيەت ءبولىمىنىڭ مەڭگەرۋشىسى.
جەزقازعان قالاسى.