«گوسەكسپەرتيزا» رمك-دا ساراپتاۋ جۇمىستارىنىڭ بارىسىن ەلەكتروندىق اقپاراتتىق جۇيە بويىنشا باقىلاۋ جۇيەسىنىڭ تۇساۋكەسەرى بولىپ ءوتتى.
ساراپتاۋ جۇمىسىنىڭ بارىسىن ەلەكتروندىق-اقپاراتتىق جۇيە بويىنشا جۇرگىزۋ مەملەكەتتىك ساراپتاۋ ۇدەرىستەرىنىڭ اشىقتىعىن جانە مولدىرلىگىن, ونىڭ قورىتىندىلارىنىڭ حالىققا جەتكىزىلۋىن قامتاماسىز ەتەدى. بۇل جۇيە باس وفيستەگى اقپاراتتىق جۇمىستىڭ بارىسىن عانا جاريالاپ قويمايدى, سونىمەن بىرگە, كاسىپورىننىڭ بارلىق وڭىرلىك بولىمشەلەرىندە اتقارىلىپ جاتقان جۇمىستىڭ بارىسىن كورسەتەدى. مەملەكەتتىك ساراپتاۋ جۇيەسىنە تۇسكەن بارلىق جوبالاۋ سمەتالىق قۇجاتتارى جەدەل تۇردە رمك-نىڭ www.gosexpertiza.kz سايتىنا ءتۇسىپ وتىرادى. وسىنىڭ ارقاسىندا ينۆەستورلار, بيۋدجەتتىك باعدارلامالاردىڭ اكىمشىلەرى, تاپسىرما بەرۋشىلەر مەن جوبالاۋشىلار كەز كەلگەن ۋاقىتتا قازاقستاننىڭ قاي وڭىرىندە بولماسىن ءتىپتى, الەمنىڭ قاي نۇكتەسىندە بولماسىن وزدەرىنىڭ جوبالارى جونىندەگى مەملەكەتتىك ساراپتاۋدىڭ قالاي ءجۇرىپ جاتقاندىعى تۋرالى حاباردار بولا الادى.
بۇگىندە وسى سايتتا ءىرى جوبالار بويىنشا دەرەكتەر بار. نەگىزىنەن جالپى قۇنى 500 ميلليون تەڭگە بولاتىن جوبالار ورنالاستىرىلعان. ۇستىمىزدەگى جىلدىڭ اياعىنا دەيىن ساراپتاۋعا تۇسكەن بارلىق جوبالىق سمەتالىق قۇجاتتار ەلەكتروندىق اقپارات جۇيەسىنە قوسىلادى. سونىمەن بىرگە, وسى سايتتا جوبالاردىڭ مۇراعاتى ورنالاستىرىلادى. سايت قولدانۋشىلارى ينتەراكتيۆتىك رەجىمدە وزدەرىن تولعاندىراتىن ماسەلەلەردى نەمەسە سۇراقتاردى جولداۋعا بولادى.
– بىرىڭعاي جۇيە قولدانۋ ءتاسىلى ساراپتاۋ بارىسىنا جان-جاقتى باقىلاۋ جاساۋعا مۇمكىندىك بەرەدى, – دەيدى «گوسەكسپەرتيزا» رمك-نىڭ باس ديرەكتورى بىرلىك ەرەجەپوۆ. – سونىمەن بىرگە, بۇل جۇيە ءبىزدىڭ قىزمەتكەرلەرىمىزدىڭ جانە جوبالاۋ ۇيىمدارىنىڭ جاۋاپكەرشىلىگىن ارتتىرادى. قولدانىستاعى ءتارتىپ بويىنشا وڭىرلەردەن تۇسەتىن جوبالاۋ سمەتالىق قۇجاتتار 45 كۇن ىشىندە, ال تەحنيكالىق ساراپتاۋ 60 كۇن ىشىندە مەملەكەتتىك ساراپتاۋدان وتۋگە ءتيىس. قازىر بۇل مەرزىمدى قىسقارتۋ ماقساتىنداعى جۇمىستار جۇرگىزىلىپ جاتىر.
رەسپۋبليكامىزدىڭ قۇرىلىس جانە تۇرعىن ءۇي-كوممۋنالدىق شارۋاشىلىعى اگەنتتىگى توراعاسىنىڭ ورىنباسارى جاندوس اكىمجانوۆتىڭ ايتۋىنشا, بۇگىندە قازاقستاندا كوپتەگەن جوبالاۋ ۇيىمدارى جۇمىس ىستەيدى. الايدا, ولاردىڭ اتقاراتىن جۇمىسىنىڭ ساپاسى كوڭىلدەگىدەي ەمەس. كوپ رەتتە ساراپتاۋعا جىبەرىلگەن جوبالار مەملەكەتتىك ساراپتاۋدان ءوتۋ ءۇشىن ۇزاق مەرزىم بويى جاتىپ قالادى.
– ءبىز بۇل رەتتە تاپسىرما بەرۋشىلەردىڭ جاۋاپكەرشىلىگىن ءتومەندەتپەۋ جونىندە ماسەلە قويىپ وتىرمىز, وسى ۇسىنىسىمىزدى دەپۋتاتتار دا قولدايدى دەپ سەنەمىز, – دەيدى ج.اكىمجانوۆ. اگەنتتىك توراعاسىنىڭ ايتۋى بويىنشا, بىزدە بۇگىندە كوپتەگەن جوبالاۋ ۇيىمدارى جۇمىس ىستەيدى. ولاردىڭ جۇمىسىنا جان-جاقتى باقىلاۋ قويۋ كەرەك-اق.
ساراپتاۋ جۇمىسىنىڭ ەلەكتروندىق ءپىشىنىنىڭ تۇساۋكەسەرىندە سويلەگەن پارلامەنت ءماجىلىسىنىڭ دەپۋتاتى سانسىزباي ەسىلوۆ بۇل ەلەكتروندىق جۇيەنىڭ سىبايلاس جەمقورلىققا قارسى يگى ىقپالى بار ەكەندىگىن اتاپ كورسەتتى. وسى باسقوسۋ بارىسىندا 2010 جىلدان بەرى «گوسەكسپەرتيزا» رمك-نىڭ جۇمىسىنداعى مەملەكەتتىك ساراپتاۋ جۇمىسى بىرىڭعاي ەلەكتروندىق جۇيە بويىنشا جۇزەگە اسىرىلاتىندىعى اتاپ كورسەتىلدى.
جالپى العاندا «گوسەكسپەرتيزا» رمك جىل باسىنان بەرى قۇرىلىس سالاسىنداعى 3665 سمەتالىق جوبالاۋ جۇمىسىن قاراعان. بۇل 2010 جىلدىڭ سايكەس مەرزىمىمەن سالىستىرعاندا 97 پايىزدى قۇرايدى. ساراپتاۋ بارىسىندا 3577 جوبا مەملەكەتتىك ساراپتاۋدان ءوتىپ, قالعاندارى قايتا جەتىلدىرۋ ساتىسىنا جىبەرىلدى. مەملەكەتتىك ساراپتاۋ ورگاندارىنىڭ ۇسىنىس-ەسكەرتپەلەرىن جۇزەگە اسىرۋ بارىسىندا قايتادان جاسالعان جوبالاۋ قۇجاتتارى قۇرىلىس جوبالارى بويىنشا سمەتالىق قارجىنىڭ 339 ميلليارد تەڭگەسىن ۇنەمدەۋگە مۇمكىندىك بەردى. الداعى ۋاقىتتا مەملەكەتتىك ساراپتاۋ جۇمىستارى ەلەكتروندىق اقپاراتتىق جۇيە ارقىلى ءجۇرگىزىلىپ, ەكونوميكامىز ءۇشىن يگى ناتيجەسىن بەرەتىندىگى داۋسىز.
رىستى الىبەكوۆا.