پاۆلودار وبلىسىنىڭ تەمىر جول كاسىپورىندارى ماشينا قۇراستىرۋدا پرەزيدەنتتىك يندۋستريالىق-يننوۆاتسيالىق باعدارلامانىڭ كوشباستاۋشىسىنا اينالدى
قازاقستاننىڭ ۆاگون جاساۋ كومپانياسى – ەلىمىزدىڭ ۇدەمەلى يندۋستريالىق-يننوۆاتسيالىق باعدارلاماسىنا سايكەس, وتە قىسقا مەرزىمدە ىسكە قوسىلعان جاڭا كاسىپورىن. بۇل جوبا 2008 جىلى مەملەكەت باسشىسىنىڭ قازاقستان حالقىنا جولداۋىندا ايتىلعان: «جىلجىمالى قۇرامعا سۇرانىستى تومەندەتۋ ماقساتىندا وتاندىق ماشينا جاساۋدى دامىتۋ سالاسىندا كەشەندى شارالاردى جۇزەگە اسىرۋ كەرەك» دەگەن تاپسىرماسىنا وراي جۇزەگە اسىرىلدى.
جوبانى جۇزەگە اسىرۋشى – «قازاقستان تەمىر جولى» ۇك» اق پەتروپاۆلدىڭ «زيكستو» اق جانە ەكىباستۇزدىڭ «تامان» جشس نەگىزىندە «قازاقستاندا جاسالعان» ماركالى جارتىلاي جۇك ۆاگوندارىن جاساۋدىڭ وڭتايلى ەكەندىگىن باعامدادى. 2010 جىلى «قازاقستاننىڭ ۆاگون جاساۋ كومپانياسى» 114 ۆاگوندى شىعارسا, بيىلعى جىلى 1,5 مىڭ ۆاگوندى پايدالانۋعا بەرمەك. كومپانيا تولىق قۋاتىندا قىزمەت ەتكەن كەزدە جىلىنا بەس مىڭ ۆاگون شىعاراتىن بولادى. كاسىپورىن الدىنا قويىلعان باستى ماقسات – قازاقستاننىڭ ۇدەمەلى يندۋستريالىق-يننوۆاتسيالىق باعدارلاماسىنا سۇبەلى ۇلەس قوسا وتىرىپ, ۇلتتىق تاسىمالداۋ كومپانياسىنىڭ ساپالى جۇك ۆاگوندارىنا سۇرانىسىن قاناعاتتاندىرۋ. كاسىپورىننىڭ باستى ەرەكشەلىگى سوندا – ونىڭ جاڭاشىلدىعىندا جانە جاڭا قۇرال-جابدىقتاردى وندىرىسكە بارىنشا جىلدام ءارى كەرەگىنشە ورنالاستىرا بىلۋىندە كورىنەدى. كۇنى بۇگىن كومپانيا ەڭبەككەرلەرىنىڭ بىلىكتىلىگىن كۇن ساناپ وسىرە وتىرىپ, جاڭا تەحنيكا مەن تەحنولوگيانىڭ قۇلاعىندا وينايتىن دارەجەگە جەتكىزىپ, ىرىكتەۋدەن وتكىزىپ جاتىر. تسەحتاردا گەرمانيا, يتاليا, اۆستريا, شۆەتسيا, شۆەيتساريا, رەسەي, ۋكراينانىڭ ۆاگون جاساۋ كاسىپورنىنا قاجەتتى ستاندارتتى جانە ستاندارتتان تىس قۇرىلعىلارى جەتكىزىلىپ, قۇراستىرىلۋدا. ساپالىق مەنەدجمەنتى حالىقارالىق ستاندارتتىڭ ISO 9001: 2009 قۇرايدى. قازىرگى تاڭدا شىعارىپ جاتقان ونىمدەرى – 70 توننالىق جۇك تيەيتىن جارتىلاي ۆاگونى. بۇعان دەيىن قولمەن اتقارىلىپ كەلگەن جۇمىستاردىڭ دەنىن ەندىگى جەردە كومپيۋتەرلىك قۇرىلعىلار مەن اۆتوماتتاندىرىلعان تەحنيكالار اتقارادى. تسەحتاردىڭ بارىندە جاقىندا اكەلىنگەن قۇرال-جابدىقتاردىڭ جانىندا ءبىر-ءبىر شەتەلدىك ينجەنەر مەن قازاقستاندىقتاردى بايقادىق. ارقايسىسىنىڭ تۇسىنا ايالداعان كومپانيا باس ينجەنەرى ولەگ چۋدوپال جاڭا تەحنيكانىڭ ارتىقشىلىقتارىن مايىن تامىزا ماقتاي جونەلەدى. اتاعىنان ات ۇركەتىن الەمنىڭ ماقتاۋلى كومپانيالارىنىڭ ىشىنەن تاڭداۋلىلارىمەن ىسكەرلىك قارىم-قاتىناستىڭ جولعا قويىلا باستاعاندىعىن ايتىپ ماسايرايدى. شىندىعىندا, حالىقتىق تامسىلىندە ايتىلعانداي, ادامنىڭ جۇمىسى باستاعانىنان بىلىنەتىندىگى راس ەكەن. ءبىزدىڭ كەلەتىندىگىمىزدەن بەيحابار بولعانىمەن, التى بىردەي ات شاپتىرىم الاڭدارىندا ارتىق اۋىس شاشىلعان تەمىر جاڭقالارى, تەحنيكا قالدىقتارى كورىنبەيدى. بارلىعى ورىن ورنىندا, قىزدىڭ جيعان جۇگىندەي. تەحنيكالىق جۇيەنىڭ ءبولىم باستىعى سەرگەي اترۋشكين مەن مينسكىنىڭ وندىرىستىك ينجەنەرلىك بيۋروسىنىڭ ينجەنەرى الەكساندر رورف چەحتىڭ «Magway» كومپانياسىنىڭ ءونىمىن زاۋىتقا ورناتىپ, ەكىباستۇزدىقتاردى ۇيرەتىپ جاتىر ەكەن. ولار جەرگىلىكتى حالىقتىڭ مەيىرباندىعىن, قوناقجايلىلىعىن, ءىلىم-بىلىمگە قۇشتارلىعىن ايرىقشا ماقتايدى. ۋكراينانىڭ «تەحۆاگونماش» زاۋىتىنىڭ ينجەنەرى يۋرا لاچنو مەن «كۆك» سلەسارى يۆان مەركەل ەرەكشە ءتىل تابىسقان كورىنەدى. قاراپايىم دانەكەرلەۋشى مەن سلەساردىڭ ساعاتتاپ جاسايتىن جۇمىسىن اۆتوماتتاندىرىلعان جاڭا تەحنيكا قۇرالىمەن ساناۋلى سەكونتتە عانا جاسايدى. بىرنەشە مينوتتە ۆاگوندى اۋدارىپ, توڭكەرەتىن دە پۋلتپەن باسقارىلاتىن قۇرال ورناتىلعان. اسا اۋىر زاتتاردى ورنىنان باسقا جەرگە جەتكىزەتىن اسپالى كراندى قىزدار ۇرشىقشا ۇيىرگەن. جارتىلاي ۆاگون جاساۋعا اكەلىنگەن قاڭىلتىر قابىعى مەن تەمىر بۇيىمدارىنىڭ باستاپقى قالپىنان ۆاگوندى تولىق قۇراستىرعانعا دەيىنگى ونداعان ۇدەرىستەردىڭ بارلىعى دا ەشقايدا شىعارىلماي دايىن ونىمگە دەيىن تۇگەلدەي زاۋىت ىشىندە اتقارىلادى. ءبىر قىزىعى – بۇرىنعى زاۋىتتارداعىداي اۋىر تەحنيكالاردىڭ تارسىل-گۇرسىلى, بۇرقىراعان شاڭ-توزاڭ, جۇمىسشىلاردىڭ ىشقىنعان اششى ايعايى جوق. اركىم ءوز شارۋاسىمەن اۋرە. ەڭ سوڭعى جاڭا تسەحتى ارالاۋ بارىسىندا ولەگ چۋدوپال مىناداي تىم ۇساق بولىپ كورىنگەنىمەن قىزىقتى تاجىريبەنى جايىپ سالدى. بۇل سوڭعى تسەحتا بولاشاقتا كومپانياعا جەتكىزىلەتىن قاڭىلتىر قابىرشاعى ابدەن تازالانىپ, جۋىلىپ, سۇرگىلەنىپ, ارلەنەدى ەكەن. سونشا تازالاۋدىڭ, وڭدەۋدىڭ ناتيجەسىندە دايىن ۆاگوننىڭ پايدالانىلۋ مەرزىمىن تاعى دا ونداعان جىلدارعا ۇزارتۋعا بولاتىندىعىن عالىمدار انىقتاپ وتىرعان كورىنەدى. بۇدان ءىرى كاسىپورىندا ۇساق-تۇيەكتىڭ بولمايتىندىعىن اڭعاردىق. كومپانيا ءالەمدىك تاجىريبەنىڭ سوڭعى ۇلگىلەرىن, جاڭا تەحنولوگيالار مەن تەحنيكالاردىڭ تىڭ تاجىريبەلەرىن وندىرىسكە ەنگىزۋدى باتىل قولعا العان. «قازاقستاننىڭ ۆاگون جاساۋ كومپانياسى» ەلباسى كوزدەگەن يندۋستريالىق-يننوۆاتسيالىق باعدارلاماسىنىڭ وتاندىق ەكونوميكاداعى تابىستى قادامىنىڭ ناقتى ءبىر مىسالى. رەسپۋبليكا ەكونوميكاسىنىڭ قارىشتاپ دامۋىنا, جۇك جونەلتۋشىلەر مەن جەتكىزۋشىلەردى ساپالى كولىكپەن قامتۋ تالابىنا وراي, وتاندىق جىلجىمالى قۇرامنىڭ جاڭا ءونىمى دەر كەزىندە قولعا الىنعان جانە رەكوردتىق مەرزىمدە وڭتايلى ورىندالعان جوبا بولىپ وتىر. ەسكەندىر ەرتاي, سەرگەي استرەلين. قۆك ءوندىرىسى تۇگەلدەي اۆتوماتتاندىرىلعانكاسىپورىندا 500 جۇمىس ورنى اشىلدى
ۆاگوندى جاساۋ ءىسى ۇنەمى باقىلاۋدا ۇستالادى كاسىپورىن تىرەگى – بىلىكتى ماماندار شەتەلدىك ماماندار تاجىريبە الماسۋدا كۆك تسەحى «قازاقستاندا جاسالعان» جۇك ۆاگونى وتاندىق ماشينا قۇراستىرۋ كوشباسشىسى