كەشە استانادا وتەتىن شانحاي ىنتىماقتاستىق ۇيىمىنىڭ مەرەيتويلىق سامميتىنە ارنالعان «شانحاي ىنتىماقتاستىق ۇيىمى – ىنتىماقتاستىق پەن قاۋىپسىزدىك جولىنداعى 10 جىل» جيناعى مەن «قازاقستان: ەل مەن جەر» اتتى فوتوالبومنىڭ تانىستىرىلىمى ءوتتى.
بيىل ۇيىم قۇرىلعانىنا 10 جىل تولۋىنا وراي ەلوردامىز استانادا شىۇ-عا مۇشە ەلدەر مەملەكەت باسشىلارى كەڭەسىنىڭ وتىرىسى وتەتىنى بەلگىلى. ءدۇنيەگە كەلگەن كۇنىنەن باستاپ, ايماقتاعى تىنىشتىق پەن قۋاتتىلىق, سەنىم مەن ىنتىماقتاستىق باعىتىندا بىرلەسە تىرشىلىك ەتىپ جاتقان شىۇ الەمدىك قوعامداستىق الدىندا پىكىرىنە قۇلاق تۇرەر ىرگەلى ۇيىمعا اينالعانى ايان. مىنە, وسى ىنتىماقتاستىققا تولى 10 جىلدى قۇجاتتارمەن سويلەتكەن جيناق «شانحاي ىنتىماقتاستىق ۇيىمى – ىنتىماقتاستىق پەن قاۋىپسىزدىك جولىنداعى 10 جىل» دەپ اتالىپتى. وندا ۇيىم قۇرىلعالى بەرى قابىلدانعان نەگىزگى قۇجاتتاردىڭ توپتاماسى بەرىلىپ, ونى پاراقتاعان جان ىنتىماقتاستىقتىڭ قالايشا نەگىزى قالانىپ, جەمىستى جۇمىستىڭ قانداي قۇجاتتارعا سۇيەنىپ جاسالعانىن ۇعادى.
تانىستىرىلىمدا جۇرتشىلىق نازارىنا ۇسىنىلعان ەندى ءبىر دۇنيە – «قازاقستان: ەل مەن جەر» اتتى فوتوالبوم بولدى. حالقىمىزدىڭ بۇگىنگى تىنىسى ونىڭ سپورتتىق, مادەني-الەۋمەتتىك جەتىستىكتەرى, ەكونوميكاداعى تابىستارى – وسىنىڭ بارلىعى كوركەم فوتوسۋرەتتەرمەن بەزەندىرىلگەن البومدا ۇلتتىق ناقىشتارمەن قاتار, قازاقستاننىڭ باي تابيعاتى نەگىزىندە كورىنىس تاۋىپتى. ەلىمىزدىڭ بۇگىنگى تىنىسى جايىندا سىر شەرتەتىن فوتوماتەريالدار وزگە تۇگىل قازاقستاندىقتاردىڭ ءوزىن ەلەڭدەتكەندەي.
شانحاي ىنتىماقتاستىق ۇيىمىنىڭ باس حاتشىسى مۇراتبەك يماناليەۆتىڭ ايتۋىنشا, مەرەيتويلىق سامميتكە ارنالىپ شىعارىلعان وسى تانىمدىق ماتەريالدار ءىس-شاراعا قاتىسۋشى بارلىق دەلەگاتتارعا تاراتىلاتىن كورىنەدى.
انار تولەۋحانقىزى.