كەشە قازاقستان رەسپۋبليكاسىنىڭ شىۇ-داعى توراعالىعى شەڭبەرىندە ەلىمىز سىرتقى ىستەر ءمينيسترى ەرجان قازىحانوۆتىڭ شىۇ ۇلتتىق ۇيلەستىرۋشىلەرىمەن جانە تۇراقتى قىزمەت ورگاندارى باسشىلارىمەن كەزدەسۋى ءوتتى.
كەزدەسۋ بارىسىندا ۇلتتىق ۇيلەستىرۋشىلەر قازاقستان سىرتقى ساياسات ۆەدومستۆوسىنىڭ باسشىسىن استانادا 10-12 ماۋسىمدا وتكەن ۇلتتىق ۇيلەستىرۋشىلەر كەڭەسى وتىرىسىنىڭ قورىتىندىلارىمەن تانىستىردى جانە الداعى بولاتىن استاناداعى شىۇ سامميتىندەگى قۇجاتتارعا قول قويۋ دايىندىعى تۋرالى حابارلادى.
كەزدەسۋدەن شىعىپ, جۋرناليستەرگە سۇحبات بەرگەن شانحاي ىنتىماقتاستىق ۇيىمىنداعى قىتايدىڭ ۇلتتىق ۇيلەستىرۋشىسى تسزي يانچي: «ءبىز شانحاي ىنتىماقتاستىق ۇيىمىنا كەيىنگى توراعالىعىمىز بارىسىندا قازاقستاننىڭ تاجىريبەسى نەگىزىندە جۇمىس ىستەيتىن بولامىز. مەنىڭشە, قازاقستان شانحاي ىنتىماقتاستىق ۇيىمىنداعى توراعالىعى بارىسىندا ءبىراز جەتىستىكتەرگە جەتتى. قازاقستان ۇيىمنىڭ دامۋىنا ۇلكەن ۇلەس قوسىپ, ونىڭ ىنتىماقتاستىعىن كۇشەيتۋگە قىزمەت ەتتى. ۇيىم اياسىندا قولعا الىنعان باعدارلامالاردىڭ ارقاسىندا ايماقتىق قاۋىپسىزدىك ماسەلەسىنە ەرەكشە نازار اۋدارىلىپ, ءبىزدىڭ كوركەيىپ-ءوسۋىمىزگە قاجەتتى جاعداي جاسالدى. وسى ءۇشىن ءبىز قازاقستانعا ءوز ريزاشىلىعىمىزدى بىلدىرەمىز», دەدى.
وسى ورايدا كەلەسى توراعالىق قىزمەتى قىتاي حالىق رەسپۋبليكاسىنا كوشەتىندىگىنە توقتالعان تسزي يانچي: «قازاقستاننان كەيىن ۇيىمعا توراعالىق ەتەتىن قىتاي حالىق رەسپۋبليكاسى وسى ەلدىڭ سالىپ كەتكەن ءىزى نەگىزىندە جۇمىس جاساپ, شانحاي ىنتىماقتاستىق ۇيىمىن دامىتۋعا بارىنشا كۇش سالاتىن بولادى. ول ءۇشىن ءبىز ناقتى باعدارلامالار مەن ءىس-شارالار جوسپارىن ۇسىنامىز», دەپ اتاپ ءوتتى.
انار تولەۋحانقىزى.