شەتەلگە بارساڭىز قازاقستاننان كەلگەن دەلەگاتسيانىڭ قۇرامى ءار ءتۇرلى بولسا دا قازاق دەپ قابىلدايدى. سپورت جارىستارىندا دا سولاي. ماسەلەن, گەننادي گولوۆكين شارشى الاڭدا. جارىستى جۇرگىزىپ وتىرعان ورىس كوممەنتاتورى “بۇل قازاق” دەپ ءسوزىن ساباقتايدى. ءوزىمىزدىڭ ورىس قوي دەمەيدى.
ويتكەنى, گەننادي – قازاقستاننىڭ ازاماتى. وسىندا تۋعان, ءوسىپ-وركەندەگەن. بۇگىندە شەتەل شارشى الاڭدارىندا جۇدىرىقتاسىپ ءجۇر. ايتسە دە قازاق اتى قالعان جوق. جۇرەك جىليدى. ازاماتىم-اي دەيسىڭ. تۋعان توپىراعىن ءتاۋ ەتىپ جۇرگەن.
قازاقستان – سان الۋان ۇلت پەن ۇلىسقا اتامەكەن بولىپ وتىر. ەشقايسىسىن بوتەنسىڭ دەپ كەۋدەدەن يتەرگەن ەمەس. ەندەشە, ولاردىڭ تاراپىنان دا وتانىنا دەگەن ىستىق ىقىلاس بولۋ كەرەك قوي.
«قازاقتەلەكوم» اكتسيونەرلىك قوعامى وسىنداي يگى ىسكە ۇيىتقى بولدى.
2011 جىلعى 15 ناۋرىزدا «قازاقتەلەكوم» اق-تا مەملەكەتتىك ءتىلدى ەنگىزۋ مەن دامىتۋدىڭ 2011-2013 جىلدارعا ارنالعان باعدارلاماسىنىڭ ءبىرىنشى كەزەڭىن جۇزەگە اسىرۋ ماقساتىندا شەشىم شىعارىپ, ونى باستاپ كەتتى.
شىمكەنتتەگى وقو تەلەكوممۋنيكاتسيا ديرەكتسياسىنىڭ عيماراتىندا وتكەن بايقاۋعا جەتى ۇلتتىڭ وكىلىنەن 18 مامان سىنعا ءتۇستى. ماماندىقتارى دا ءارتۇرلى. «قازاقتەلەكوم» اق-تىڭ وسىنداي بايقاۋ وتكىزۋىنىڭ دە ءوز ءمانى بار. ويتكەنى, قىزمەت بابىمەن وسىندا ادامدار ءجيى كەلەدى. قازىر شەتەلدەردەن تاريحي وتانىنا ورالىپ جاتقان قانداستارىمىز كوپ. عۇمىرىندا ورىس ءسوزىن ەستىپ كورمەگەندەرى بار. شارۋاسىمەن «قازاقتەلەكومعا» كوپ كىرەدى. شۇلدىرلەپ وتىرعان شىركىن كەۋدەدەن يتەرگەندەي قىلادى. ءارى-بەرىدەن سوڭ – قازاقستاننىڭ مەملەكەتتىك ءتىلى – قازاق ءتىلى. ونى وسى مەكەمە قىزمەتكەرلەرى تارك ەتىپ جاتسا باسقا قايتپەك؟!
«قازاقتەلەكوم» اق باسشىلىعى وسى وقىلىقتىڭ ورنىن سوزبەن ەمەس ىسپەن تولتىرۋعا كوشىپ جاتىر. ونى بايقاۋ بارىسىندا تانىدىق.
– “قازاق قازاقپەن قازاقشا سويلەسسىن” دەگەندى مالدانبايىق. باسقالار دا سويلەسىن. نەگە ورىس پەن ۋكراين, نەمىس پەن كارىس, ۇيعىر مەن ءوزبەك كەزدەسە قالعاندا ءبىر-ءبىرىمەن مەملەكەتتىك تىلدە سويلەسپەيدى.
مەنىڭشە, وتانعا دەگەن پاتريوتتىق سەزىم وسىندايدان باستالادى, – دەيدى “الماتىتەلەكوم” تەلەكوممۋنيكاتسيا ديرەكتسياسىنىڭ مامانى الەكسەي تىنيانوۆ.
راس-اۋ. الەكسەي باۋىر قۇدايشىلىعىن ايتادى. قازاق ءتىلى – قازاقتىڭ عانا ەمەس قازاقستاندى وتانىم دەپ بىلەتىن, ەشقايدا كوشىپ كەتۋدى ويلامايتىن, ءتۇپ-تۇقيانىن وسى ەلمەن بايلانىستىرۋدى كوزدەيتىن ءاربىر ۇلت پەن ۇلىستاردىڭ ءتىلى بولسا كەرەك. قازاقتىڭ شيرەك بولىگى دۇنيە ءجۇزىنىڭ ءار مەملەكەتىندە ءومىر ءسۇرىپ جاتىر.
ءوزى ءومىر ءسۇرىپ جاتقان مەملەكەتتىڭ تىلىندە سويلەمەيمىن دەپ ايتا المايدى. ءومىر ءسۇرۋى ءۇشىن قاجەت. وسىنداي قاجەتتىلىك قازاقستانداعى دياسپورا وكىلدەرىنە دە تۋىپ كەلەدى. بۇل – ءومىر زاڭدىلىعى. الەكسەيدىڭ پىكىرى بارىنە جاقىن دەيتىنىمىز سوندىقتان. بايقاۋدا قازاق اندەرى شىرقالدى. ءشامشى ءان بولىپ, مۇقاعالي جىر بولىپ قۇيىلدى. ابىز اباي ۇلىلىقتان سىر شەرتتى. قازاق بيلەرى بيلەندى. تەلەكوممۋنيكاتسيا سالاسىنداعى قيىن تەرميندەر قازاقشا ءتارجىمالاندى.
“قازاقتەلەكومعا” ءىسى ءتۇسىپ كەلەتىندەردىڭ كوپ ەكەندىگىن ايتتىق. سەرۆيس جەلىسى قىزمەتكەرلەرى مەن تۇتىنۋشىلار اراسىندا ءار ءتۇرلى كەلىسپەۋشىلىك بولىپ جاتادى. وسىنداي قيىن جاعدايدا وپەراتور تىعىرىقتان شىعاردا نەگە جۇگىنەدى, جانجالدى باسۋ ءۇشىن قالاي سويلەۋى كەرەك؟!
بۇل دا بايقاۋ قويعان شارتتاردىڭ ءبىرى.
الماتى, استانا جانە رەسپۋبليكامىزدىڭ وبلىستارىنان كەلگەن ۇمىتكەرلەر مەيلىنشە جاقسى جاعىنان كورىنۋگە تىرىسىپ باقتى. ءبارى بىزدەي جاقسى دەسەك قاتەلەسپەسەك كەرەك. “كوش جۇرە تۇزەلەدى”.
بايقاۋ قورىتىندىسى بويىنشا اقمولا وبلىستىق تەلەكوممۋنيكاتسيا ديرەكتسياسىنىڭ ءبىرىنشى ساناتتاعى مامانى دميتري تيۋرين ءبىرىنشى ورىن الدى. “قازاقستانداعى بارلىق ۇلتتار مەن ۇلىستار قازاقشا ءسويلەسسىن” دەپ كوپشىلىكتىڭ كوكەيىندەگى ويدى قوزعاعان “الماتىتەلەكوم” قىزمەتكەرى الەكسەي تىنيانوۆ پەن پاۆلودارلىق ماگرا ياگۋدينا ەكىنشى ورىنعا يە بولدى. ال, اتىراۋلىق ەلەنا سولودنيكوۆا مەن قوستانايلىق ەۆگەنيا ۆىلكوۆا ءۇشىنشى ورىنعا شىقتى.
مەملەكەتتىك ءتىلدى قولداۋدا ەڭ ءبىرىنشى ورىنداردىڭ بىرىندە تۇرۋعا ءتيىس “قازاقتەلەكوم” اق ءتىل ۇيرەنەمىن دەۋشىلەرگە وسىنداي مەرەكە سىيلادى. مەملەكەتتىك ءتىلدىڭ قولدانۋ اياسىن كەڭەيتۋ ماقساتىندا ۇلكەن شارا وتكىزدى. ەل ءۇشىن كەرەك. قازاقستاندى وتانىم, بايتاق جۇرتتى – ەلىم دەيتىن ءاربىر ادام ءۇشىن كەرەك ءىس.
قولداۋعا, ءتىلى مەملەكەتتىك تىلدە سىنباي جۇرگەن مەملەكەتتىك مەكەمەلەر ءىلىپ اكەتەتىن جاقسى باستاما, جاقسى ءۇردىس بۇل.
باقتيار تايجان.
شىمكەنت.