جۋىردا الماتىدا ەلباسى نۇرسۇلتان نازارباەۆتىڭ ءۇستىمىزدەگى جىلدىڭ 17 ساۋىردەگى تاپسىرماسىنا بايلانىستى, سونداي-اق پرەمەر-ءمينيستردىڭ ءبىرىنشى ورىنباسارى ومىرزاق شوكەەۆتىڭ جانە جەر رەسۋرستارىن باسقارۋ اگەنتتىگىنىڭ توراعاسى ءو.وزىبەكوۆتىڭ 2011 جىلعى 20 ساۋىردەگى «اۋىلشارۋاشىلىق جەرلەرى رەۆيزياسىنىڭ ماسەلەلەرى تۋرالى» حاتتامالىق تاپسىرماسىنا سايكەس «يگەرىلمەي جانە ءتيىمسىز پايدالانىپ جاتقان اۋىل شارۋاشىلىعى ماقساتىنداعى جەرلەردى انىقتاۋ جۇمىسىنىڭ بارىسى تۋرالى» القالى جيىن بولىپ ءوتتى.
جيىندا جاقىندا عانا الماتى وبلىسى تالعار اۋدانى, بەساعاش اۋىلى ماڭىنداعى ورىن العان زاڭسىز جەر باسىپ الۋ فاكتىسى ءتارىزدى كەلەڭسىز جايتتەردىڭ بۇدان بىلاي قايتالانباۋى ءۇشىن ەلباسى تاپسىرماسىن شۇعىل ارادا جۇزەگە اسىرۋ جاعى ءسوز بولدى.
تالعار, ىلە, قاراساي, ەڭبەكشىقازاق, جامبىل اۋداندارى اكىمدەرىنىڭ ورىنباسارلارى مەن ونداعى جەر قاتىناستارى باسقارماسى باسشىلارى, سونداي-اق الماتى وبلىسى اكىمىنىڭ تىكەلەي نۇسقاۋىمەن قۇرىلعان ارنايى كوميسسيا مۇشەلەرى اتالعان وتىرىستا كۇن تارتىبىندە تۇرعان وسى وزەكتى ماسەلەنى قالاي دا وڭدى تۇردە شەشۋ جونىندە ءوز ويلارىن ورتاعا سالدى.
بايانداماشى الماتى وبلىسى جانە الماتى قالاسى بويىنشا وڭىرارالىق جەر ينسپەكتسياسى باستىعىنىڭ ورىنباسارى ابدوللا جولداعۇتوۆ اتالعان يگەرىلمەي جاتقان جەرلەردى مەملەكەت تاراپىنان رەتتەۋگە قاتىستى 5 ءتۇر بويىنشا ساتىلاپ جۇزەگە اسىرۋدىڭ الگوريتمىن كوپشىلىك نازارىنا ۇسىندى.
جيىن سوڭىندا وعان قاتىسۋشىلار ءبىراۋىزدان شەشىم قابىلداپ, الداعى ۋقىتتا وسى ءبىر ءتۇيىنى قيىن تۇيتكىلدى ماسەلەنى شەشۋدە «ءبىر جاعادان باس, ءبىر جەڭنەن قول شىعارا» وتىرىپ بىرلەسە جۇمىس ىستەۋگە كەلىسىپ تاراستى.
ايناش ەسالي, الماتى.