كەشە استاناداعى تاۋەلسىزدىك سارايىندا بۇگىن, ياعني 7 ماۋسىم كۇنى اشىلاتىن 7-ءشى دۇنيەجۇزىلىك يسلام ەكونوميكالىق فورۋمى (ديەف) تۋرالى ءباسپاسوز كونفەرەنتسياسى بولىپ ءوتتى. وعان ديەف-ءتىڭ قور توراعاسى تۋن مۋسا حيتام, قازاقستان رەسپۋبليكاسى يندۋستريا جانە جاڭا تەحنولوگيالار مينيسترلىگىنىڭ ينۆەستيتسيالار جونىندەگى كوميتەت ءتوراعاسى اسىلحان سەرىكوۆ, قازاقستان رەسپۋبليكاسى پرەمەر-ءمينيسترىنىڭ ورىنباسارى, قازاقستاننىڭ يسلام قارجىسىن دامىتۋ اسسوتسياتسياسىنىڭ توراعاسى ەرلان بايداۋلەت قاتىستى. بۇل فورۋم تمد جانە ورتالىق ازيا اۋماعىندا تۇڭعىش رەت وتكەلى وتىر.
7-ءشى ديەف «عالامدىق ەكونوميكالىق دامۋ: قارىم-قاتىناس, باسەكەلەستىك, ىنتىماقتاستىق» تاقىرىبىندا وتەدى. فورۋم اياسىندا يسلام بانكينگى, قارجىلىق ينفراقۇرىلىمدى دامىتۋ, شوب دامىتۋ, ەنەرگيانىڭ بالاما كوزدەرىن, حالال يندۋسترياسى جانە تاعى دا باسقا ءماسەلەلەردى تالقىلاۋ جوسپارلانعان بىرنەشە سەسسيا ۇيىمداستىرىلماق.
ديەف اياسىندا بىرقاتار ماڭىزدى قۇجاتتارعا قول قويىلادى دەپ كۇتىلۋدە. اتاپ ايتقاندا, قازاقستان ۇكىمەتى مەن ساۋد ارابياسى كورولدىگى ۇكىمەتى اراسىنداعى كونۆەنتسيا, سونداي-اق يسلام دامۋ بانكى اراسىندا ءوزارا تۇسىنىستىك مەموراندۋمى سەكىلدى بىرنەشە قۇجات بار, دەپ اتاپ ءوتتى ينۆەستيتسيالار ءجونىندەگى كوميتەت باسشىسى اسىلحان سەرىكوۆ. بۇل مەموراندۋمدا يسلام دامۋ بانكىنىڭ ەلىمىزدەگى قىزمەتىنىڭ كەلەشەگى كورىنىس تاپپاق. مەموراندۋم شەڭبەرىندە يدب دەنساۋلىق ساقتاۋ, ەنەرگەتيكا, ءوندىرىس سالالارىندا ماڭىزدى جوبالاردى قارجىلاندىرىپ, قازاقستانداعى يسلامدىق بانكينگ دامۋىنا قولداۋ كورسەتەدى. سونداي-اق, ءبىز ءباا-مەن قوسارلانعان سالىق سالۋدى بولدىرماۋ تۋرالى كونۆەنتسياعا قول قويامىز, دەدى ول.
دۇنيەجۇزىلىك يسلام ەكونوميكالىق فورۋمىنىڭ قور ءتوراعاسى تۋن مۋسا حيتام فورۋمدى قازاقستاندا وتكىزۋ تۋرالى ۇسىنىستى ۇيىمداستىرۋ كوميتەتى ءبىراۋىزدان قولداعاندىعىن ايتتى. مەن 7-ءشى دۇنيەجۇزىلىك يسلام ەكونوميكالىق فورۋمىنىڭ قازاقستاندا وتكەلى وتىرعانىنا قۋانىشتىمىن. ءبىزدىڭ نەگىزگى ماقساتىمىز – فورۋم ارقىلى تەك يسلام ەلدەرى اراسىندا عانا ەمەس, جالپى بارلىق مەملەكەتتەرمەن ىنتىماقتاستىق بايلانىستاردى نىعايتىپ, وسى قارىم-قاتىناستى ۇلتتىق دەڭگەيدەن الەمدىك ءدارەجەگە دەيىن كوتەرۋ, دەدى تۋن مۋسا حيتام.
7-ءشى ديەف اياسىندا ينۆەستيتسيالىق جوبالاردىڭ كورمەسى ۇيىمداستىرىلادى. وعان ءتۇرلى سالالار بويىنشا 120 جوبا قاتىسپاق. ديەف-ءتىڭ ىسكەر ايەلدەر جانە جاس كوشباسشىلار فورۋمىن قازاقستان رەسپۋبليكاسى پرەمەر-ءمينيسترى كارىم ءماسىموۆ اشسا, 7-ءشى ءدۇنيەجۇزىلىك يسلام ەكونوميكالىق فورۋمىنىڭ سالتاناتتى اشىلۋ ءراسىمىنە ەلباسى نۇرسۇلتان نازارباەۆ قاتىسادى دەپ كۇتىلۋدە. جالپى, شاراعا شەت ەلدەن 2000-نان استام بيزنەس وكىلدەرى, الەمدىك دەڭگەيدەگى ەكونوميستەر مەن قارجىگەرلەر قاتىسپاق.
ۆەنەرا تۇگەلباي.