كەشە پارلامەنت سەناتىنىڭ توراعاسى قايرات ءماميدىڭ توراعالىق ەتۋىمەن وتكەن جوعارعى پالاتانىڭ بيۋرو وتىرىسىندا ماجىلىستە ماقۇلدانعان زاڭ جوبالارىن ودان ءارى قاراستىرۋ ءۇشىن نەگىزگى كوميتەتتەر بەلگىلەندى, دەپ حابارلادى وسى پالاتانىڭ ءباسپاسوز قىزمەتى.
بيۋرو وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن جەتىلدىرۋ جانە قىلمىستىق زاڭنامانى ودان ءارى ىزگىلەندىرۋ ماسەلەلەرى بويىنشا ءوزگەرىستەر مەن تولىقتىرۋلار ەنگىزۋ تۋرالى» زاڭ جوباسى زاڭناما جانە قۇقىقتىق ماسەلەلەر كوميتەتىنە بەرىلدى. ال «حالىقتىڭ كوشى-قونى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى ءماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى الەۋمەتتىك-مادەني دامۋ كوميتەتىنە تاپسىرىلدى.
بيۋرو وتىرىسىندا سونداي-اق پالاتانىڭ 9 ماۋسىمدا بولاتىن كەزەكتى جالپى وتىرىسىنىڭ كۇن ءتارتىبىن قالىپتاستىرۋ جونىندەگى كوميتەتتەردىڭ ۇسىنىستارى تالقىلاندى. الداعى جالپى وتىرىستا قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى (تەحنيكالىق جانە كاسىپتىك ءبىلىم بەرۋدى جاڭعىرتۋ جوباسى), زياتكەرلىك مەنشىك قۇقىقتارىن ساقتاۋ جانە قورعاۋ سالاسىنداعى بىرىڭعاي رەتتەۋ قاعيداتتارى تۋرالى, قازاقستان مەن سولتۇستىك التانت شارتى ۇيىمى اراسىنداعى اۋعانستانداعى قاۋىپسىزدىككە جاردەمدەسۋ حالىقارالىق كۇشتەرىنىڭ قىزمەتىنە قاتىسۋ تۋرالى نوتالار الماسۋ نىسانىنداعى كەلىسىمدەردى راتيفيكاتسيالاۋ تۋرالى زاڭ جوبالارى قارالادى.
سونىمەن قاتار, قازاقستان مەن رەسەي اراسىنداعى «بايقوڭىر» كەشەنىن جالعا بەرۋ شارتىنا ءوزگەرىس ەنگىزۋ تۋرالى ۇكىمەتارالىق حاتتامانى جالعا بەرۋ شارتىنا وزگەرىس ەنگىزۋ تۋرالى, كەدەن وداعى شەڭبەرىندەگى داۋلار بويىنشا شارۋاشىلىق جۇرگىزۋشى سۋبەكتىلەردىڭ ەۋرازيالىق ەكونوميكالىق قوعامداستىقتىڭ سوتىنا ءجۇگىنۋى جانە ولار بويىنشا سوت ءىسىن جۇرگىزۋ ەرەكشەلىكتەرى تۋرالى شارت تۋرالى قۇجاتتاردى قاراۋ كوزدەلىپ وتىر.
دەپۋتاتتار سونداي-اق ەلىمىزدىڭ كەيبىر زاڭنامالىق اكتىلەرىنە ۋاكىلەتتى مەملەكەتتىك ورگاندار مەن قازاقستان رەسپۋبليكاسى ۇكىمەتىنىڭ تەكسەرىلەتىن سۋبەكتىلەرگە قويىلاتىن تالاپتاردى بەلگىلەيتىن نورماتيۆتىك قۇقىقتىق اكتىلەردى قابىلداۋ قۇزىرەتتەرىن قايتا قاراۋ, سونداي-اق رۇقسات بەرۋ جۇيەسىن جەتىلدىرۋ ءماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى بويىنشا كەلىسۋ كوميسسيالارىنىڭ جۇمىس ءناتيجەسىن قارايدى.