الديلە, اسەم مۋزىكا!
ءيا, كەشەدەن بەرى ەل تاريحىندا جانە كۇللى ورتالىق ازيا ايماعىندا تۇڭعىش رەت «كلاسسيك» جاڭا راديوستانساسى ىسكە قوسىلدى. بەكزات مۋزىكاعا نەگىزدەلگەن جاڭا راديو – قۇرمانعازى اتىنداعى قازاق ۇلتتىق كونسەرۆاتورياسى مەن «حابار» اگەنتتىگىنىڭ بىرلەسكەن مەديا-جوباسى بولىپ تابىلادى.
وسى ايتۋلى وقيعاعا بايلانىستى سەنبى كۇنى قۇرمانعازى اتىنداعى ۇلتتىق كونسەرۆاتوريادا ءباسپاسوز ءماسليحاتى ءوتىپ, جاڭا راديو تولقىننىڭ جاي-جاپسارى ايتىلىپ, تۇساۋكەسەر ءراسىمى وتكەن-ءدى.
مۇنداي راديوستانسانى ءدۇنيەگە اكەلۋدەگى ماقسات – اكادەميالىق مۋزىكالىق مادەنيەتتى وتاندىق تىڭدارماندار ءۇشىن قولجەتىمدى ەتۋ.
– ادەتتە, شەت ەلدەرگە بارعاندا كلاسسيكالىق راديونى ءجيى تىڭدايتىن ەدىم. سول كەزدە وسىنداي كاسىبي راديو ءبىزدىڭ ەلدە دە بولسا عوي دەپ ىلعي دا ارمانداپ جۇرەتىنمىن. اقىرى «حابار» اگەنتتىگىنىڭ مۇرىندىق بولۋىمەن جوبا ىسكە استى, – دەيدى وسى يدەيانىڭ اۆتورى ءجانيا ءاۋباكىروۆا.
قازىرگە اتالمىش راديو الماتى قالاسىنداعى 102,8 FM ءجيىلىگىندە حابار تاراتادى. ەفيردى جوسپارلاۋ, باعدارلامالاردى جاساۋ ىسىمەن كاسىبي مۋزىكا يەلەرى اينالىساتىن بولادى.
وسىلايشا «Classic» راديوسىنىڭ حابار تاراتۋ جۇيەسى ءار كەزەڭدەگى, ءتۇرلى ستيلدەگى, سان الۋان باعىتتاعى كلاسسيكالىق مۋزىكالارعا نەگىزدەلگەن. سونداي-اق, ەفيردە قازاقستان مەن الەم مادەنيەتىنىڭ تىنىس-تىرشىلىگىن ۇنەمى باقىلاپ وتىرار ءتول باعدارلامالارعا دا ورىن بەرىلگەن. مۋزىكالىق ارنادا اتاقتى كومپوزيتورلار, ورىنداۋشىلار مەن الەم ونەرىنىڭ التىن قورىنا ەنگەن تۋىندىلار جايلى راديوحابارلار دا تاراتىلماق. وعان قوسا قۇرمانعازى اتىنداعى قازاق ۇلتتىق كونسەرۆاتورياسىنىڭ ورگاندى زالىندا وتەتىن كونتسەرتتەردەن تىكەلەي ترانسلياتسيالار ۇيىمداستىرۋ دا جوسپارلانۋدا.
باستاپقى كەزەڭدە بۇل راديونى الماتى قالاسىندا عانا تىڭداۋعا مۇمكىندىك بار ەكەنىن جوعارىدا اتاعانبىز. دەگەنمەن, ۋاقىت وتە كەلە «Classic» راديوسىن قازاقستاننىڭ بارلىق ءوڭىرىنىڭ مۋزىكاسۇيەر قاۋىمى تىڭدايتىن بولادى. سونداي-اق حابار تاراتىلا باستاعان العاشقى كۇننەن باستاپ كلاسسيكالىق مۋزىكانى ۇلىقتايتىن راديوتولقىن ساندىق فورماتتا ۇسىنىلاتىن بولادى. كۇنىنە بىرنەشە رەت ەفيرگە قازاقستاندىق جانە الەمدىك مۋزىكا مادەنيەتى تۋرالى جان-جاقتى ماعلۇماتتار مەن اقپاراتتىق باعدارلامالار شىعارۋ جوسپارلانىپ وتىرعان بولسا, قىركۇيەكتەن باستاپ ءتۇرلى اۆتورلىق راديوباعدارلامالار, سۇحباتتار, اتاقتى مۋزىكانتتاردىڭ ومىرىنەن سىر شەرتەتىن حابارلار, جاڭالىقتار بەرىلمەك.
– ءبىزدىڭ ماقساتىمىز – كلاسسيكالىق مۋزىكا مادەنيەتىن بارشا قازاقستاندىق تىڭداۋشىلارعا جەتكىزىپ, الەمنىڭ اسەمدىگىنە لايىقتى ۇلەس قوسۋ. مادەنيەت – قوعامىمىزدىڭ اجىراماس بولشەگى. رۋحاني قۇندىلىقتاردى قالىپتاستىراتىن مادەنيەت. كلاسسيكالىق راديونىڭ كىرپىشىن قالاي وتىرىپ, ءبىز سول رۋحاني قۇندىلىقتىڭ قوعامدا ىرگەسى قالانۋىنا, زايىرلى, وركەنيەتتى, دەموكراتيالىق باعىتتاعى ەل اتانۋىمىزعا ۇلەس قوسامىز دەپ سەنىممەن ايتا الامىز, – دەيدى «حابار» اگەنتتىگى» اق ءتوراعاسىنىڭ ورىنباسارى قانات ساحاريانوۆ.
«حابار» اگەنتتىگىنىڭ كرەاتيۆتى ديرەكتورى ەرجان ءسۇلەيمەنوۆتىڭ ايتۋىنشا, كلاسسيكالىق مۋزىكا راديوتولقىنىن قۇرۋ تالعامى جوعارى تىڭدارماندار لەگىنىڭ كوڭىلىنەن شىعۋ بولىپ تابىلادى.
قازىرگى تاڭدا «كلاسسيچەسكوە ۋترو», «دىحانيە گارموني», «افيشا», «كونتسەرتنىي زال» اتتى تاقىرىپتىق باعدارلامالاردى ەركەعالي راحماديەۆ, تولەگەن مۇحامەدجانوۆ, اقتوتى رايىمقۇلوۆا, باكىر باياحۋنوۆ, ۆلاديمير گروسس, باحتيار امانجول سىندى بەلگىلى قازاقستاندىق مۋزىكانتتار ازىرلەۋ ۇستىندە.
ال تورونتودان ەكسكليۋزيۆتى حابارلاردى «Classic» راديوسى ءۇشىن تانىمال مۋزىكاتانۋشى ەۆگەني بىچكوۆ ازىرلەپ تۇراتىن بولسا, دجازعا ارنالعان ارنايى باعدارلامالاردى مۋزىكانتتار –ۆلاديمير وسيپوۆ, ميحايل بالابيچەۆ, فارحاد يبراگيموۆ, يرەن اراۆينالار دايىندايتىن بولىپ وتىر.
راديونىڭ فورماتى اۋديتوريامەن تىكەلەي اڭگىمە-دۇكەن قۇرۋ مۇمكىندىگىن دە قاراستىرادى. «مۋزىكا سالونى» باعدارلاماسىندا تىڭدارماندار وزدەرىنىڭ مۋزىكا الەمى مەن ورىنداۋشىلارعا قاتىستى كوزقاراستارىن ءبىلدىرىپ, سۇيىكتى شىعارمالارىن اۋە تولقىنىنا شىعارۋدى سۇرايتىن بولادى.
ايناش ەسالي, الماتى.
سۋرەتتەردى تۇسىرگەن بەرسىنبەك سارسەنوۆ.